1

¹ E rile mo tshimologong Modimo wa tlhola legodimo le lefatshe.

² Lefatshe la bo le tobekanye fela, go sa itsege sepe; mme lefifi la bo le ntse fa godimo ga boteng. Mowa wa Modimo wa elama fa godimo ga metsi.

³ Modimo wa re: “A go nne lesedi.” Ga nna lesedi.

⁴ Modimo wa bona lesedi fa le le molemo; mme Modimo wa farologanya lesedi mo lefifing.

⁵ Modimo wa raya lesedi leina wa re: “Motshegare”; mme lefifi wa le raya leina wa re: “Bosigo”, mme ga nna maitseboa, ga ba ga nna moso, letsatsi le le lengwe fela.

⁶ Modimo wa re: “A go nne phuthologo fa gare ga metsi, e farologanye metsi le metsi.”

⁷ Modimo wa dira phuthologo, wa farologanya metsi a a kwa tlase ga phuthologo le metsi a a kwa godimo ga phuthologo; ga nna jalo.

⁸ Modimo wa raya phuthologo leina, wa re “Legodimo”. Ga nna maitseboa, ga ba ga nna moso, letsatsi la bobedi.

⁹ Modimo wa re: “A metsi a a kwa tlase ga legodimo a phuthegele felo go le gongwe, komelelo ya lefatshe e bonale.” Ga nna jalo.

¹⁰ Modimo wa raya komelelo leina wa re “Lefatshe”; phuthegelo ya metsi wa e raya leina wa re: “Mawatle”. Modimo wa bona fa go le molemo.

¹¹ Modimo wa re: “A lefatshe le tlhoge bojang, morogo o o tsalang peo, le setlhare sa loungo se se ungwang ka fa losikeng lwa sone, se peo ya sone e leng mo teng ga lone mo lefatsheng.” Ga nna jalo.

¹² Lefatshe la tlhoga bojang, morogo o o tsalang peo ka fa losikeng lwa one, le setlhare se se ungwang loungo lo peo ya sone e leng mo teng ga lone, ka fa losikeng lwa sone. Modimo wa bona fa go le molemo.

¹³ Ga nna maitseboa, ga ba ga nna moso, letsatsi la boraro.

¹⁴ Modimo wa re: “A go nne masedi mo phuthologong ya legodimo go farologanya motshegare le bosigo, a nne sesupo sa dipaka, le go nna malatsi le dingwaga.

¹⁵ A nne masedi mo phuthologong ya legodimo, go bonesa lefatshe.” Ga nna jalo.

¹⁶ Modimo wa dira masedi a magolo a mabedi: lesedi le legolo gore le laole motshegare, le lesedi le lebotlana gore le laole bosigo; wa dira le dinaledi.

¹⁷ Modimo wa a tlhoma mo phuthologong ya legodimo gore a bonese lefatshe.

¹⁸ Le gore a laole motshegare le bosigo, le go farologanya lesedi le lefifi; Modimo wa bona fa go le molemo.

¹⁹ Ga nna maitseboa, ga ba ga nna moso, letsatsi la bone.

²⁰ Modimo wa re: “A metsi a nyeudise thata dibopiwa tse di tsamayang, tse di nang le botshelo; a dinonyane di fofe fa godimo ga lefatshe, mo phuthologong e e atlhameng ya legodimo.”

²¹ Modimo wa tlhola maruarua a magolo a lewatle, le dibopiwa dingwe le dingwe tse di tshelang tse metsi a di nyeudisang thata, ka fa ditshikeng tsa tsone; le nonyane, nngwe le nngwe e e diphuka, ka fa losikeng lwa yone. Modimo wa bona fa go le molemo.

²² Modimo wa di segofatsa, wa re: “Atang, lo ntsifale, lo tlale ka metsi a a mo mawatleng; le dinonyane di ntsifale mo lefatsheng.”

²³ Ga nna maitseboa, ga ba ga nna moso, letsatsi la botlhano.

²⁴ Modimo wa re: “A lefatshe le ntshe dibopiwa tse di tshedileng ka fa ditshikeng tsa tsone: diruiwa, le tse di gagabang, le diphologolo le dibatana tsa lefatshe ka fa ditshikeng tsa tsone.” Ga nna jalo.

²⁵ Modimo wa dira diphologolo le dibatana tsa lefatshe ka fa ditshikeng tsa tsone, le diruiwa ka fa ditshikeng tsa tsone, le sengwe le sengwe se se gagabang fa fatshe, ka fa losikeng lwa sone. Modimo wa bona fa go le molemo.

²⁶ Modimo wa re: “A re direng motho mo setshwanong sa rona, ee, ka fa setshwanong sa rona; le gone a a laole ditlhapi tsa lewatle, le dinonyane tsa loapi, le dikgomo, le lefatshe lotlhe, le sengwe le sengwe se se gagabang fa fatshe.”

²⁷ Modimo wa tlhola motho mo setshwanong sa one tota, wa mo tlhola mo setshwanong sa Modimo; wa ba tlhola nona le tshadi.

²⁸ Modimo wa ba segofatsa; Modimo wa ba raya wa re: “Atang, lo ntsifale lo tlale ka lefatshe, lo le fenye, lo laole ditlhapi tsa lewatle, le dinonyane tsa loapi, le sengwe le sengwe se se tshedileng se se tsamayang mo lefatsheng.”

²⁹ Modimo wa re: “Bonang, ke lo neile morogo mongwe le mongwe o o tsalang peo, o o mo lefatsheng lotlhe, le setlhare sengwe le sengwe se se nang le loungo lwa setlhare lo lo ntshang peo; e tlaa nna dijo tsa lona.

³⁰ Le phologolo nngwe le nngwe le dibatana tsa lefatshe, le nonyane nngwe le nngwe ya loapi, le sengwe le sengwe se se gagabang fa fatshe se botshelo bo leng mo go sone, ke di neile morogo mongwe le mongwe o motala go nna dijo.” Ga nna jalo.

³¹ Modimo wa bona sengwe le sengwe se o se dirileng, mme bonang, ga bo go le molemo thata. Ga nna maitseboa, ga ba ga nna moso, letsatsi la borataro.

2

¹ Legodimo le lefatshe tsa wediwa, le dilo tsotlhe tse di mo go tsone.

² E rile ka letsatsi la bosupa, Modimo wa wetsa tiro ya one e o e dirileng; wa ikhutsa ka letsatsi la bosupa mo tirong yotlhe ya one e o e dirileng.

³ Modimo wa segofatsa letsatsi la bosupa, wa le itshepisa, gonne mo go lone o ne wa ikhutsa mo tirong yotlhe ya one, e Modimo o e tlhodileng wa e dira.

⁴ Tse, ke tsone ditshimologo tsa legodimo le tsa lefatshe, jale ka di tlholwa, ka motlha o Jehofa Modimo o dirileng lefatshe le legodimo ka one.

⁵ Go ne go ise go nne le setlhatshana sepe sa naga mo lefatsheng, le gone go ne go ise go tlhoge morogo ope wa naga, gonne Jehofa Modimo o ne a ise a nese pula mo lefatsheng, e bile go ne go se na motho ope yo o ka lemang lefatshe.

⁶ Ga tlhatloga mouwane mo lefatsheng wa nosa mmu otlhe.

⁷ Jehofa Modimo a bopa motho ka lorole lwa mmu, a budulela mowa wa botshelo mo dinkong tsa gagwe; motho a direga mowa o o tshedileng.

⁸ Jehofa Modimo a baya tshimo ka fa ntlheng ya botlhabatsatsi, mo Etene, a baya gone motho yo o mmopileng.

⁹ Jehofa Modimo a medisa mo mmung setlhare sengwe le sengwe se se kgatlhang mo matlhong, le se se molemo go jewa; setlhare sa botshelo le sone fa gare ga tshimo, le setlhare sa kitso ya molemo le bosula.

¹⁰ Noka ya tswa mo Etene e ya go nosa tshimo; ya re e tswa gone ya kgaogana, ya nna maphata a le mane.

¹¹ Leina la ya ntlha ke Pišone: Ke yone e e potologang lefatshe lotlhe la Hafila, kwa gouta e gone.

¹² Gouta ya lefatshe leo e molemo; go bile go na le beteleuma, le majana a berule.

¹³ Leina la noka ya bobedi ke Gihone; ke yone e potologang lefatshe lotlhe la Kuše.

¹⁴ Leina la noka ya boraro ke Hitekele: eo ke yone e e potang lefatshe la Asiria ka fa botlhabatsatsi, noka ya bone ke Euferatese.

¹⁵ Jehofa Modimo a tsaya monna, a mmaya mo tshimong ya Etene, go e baakanya le go e lebelela.

¹⁶ Jehofa Modimo a laola monna a re: “O ka ja fela setlhare sengwe le sengwe sa tshimo ka go rata;

¹⁷ mme setlhare sa kitso ya molemo le bosula, sone o se ka wa se ja gonne ka tsatsi le o jang ga sone ruri o tlaa swa.”

¹⁸ Jehofa Modimo a re: “Ga go molemo fa monna a ka nna a le esi; ke tlaa mo direla thuso e e mo lebanyeng.”

¹⁹ Ke gone ka moo phologolo nngwe le nngwe ya naga le nonyane nngwe le nngwe ya loapi Jehofa Modimo a di bopa ka mmu, a di isa kwa monneng, go bona ka fa o tlaa di rayang maina ka gone. Leina le monna o le reileng sebopiwa sengwe le sengwe se se tshedileng, ya nna lone leina la sone.

²⁰ Monna a raya dikgomo tsotlhe maina, le dinonyane tsa loapi, le phologolo nngwe le nngwe ya naga; mme Atame ene ga se ka ga bonwa thuso e e mo lebanyeng.

²¹ Jehofa Modimo a thulametsa monna ka boroko jo bogolo, mme a thulamela. Mme a ntsha logopo longwe lwa gagwe, a kopanya nama mo boemong jwa lone.

²² Logopo lo Jehofa Modimo o lo ntshitseng mo monneng, a lo dira mosadi, mme a mo isa kwa monneng.

²³ Monna a re: “Jaana yo, ke lesapo la marapo a me, le nama ya nama ya me; o tlaa bidiwa Mosadi, ka a ntshitswe mo Monneng.”

²⁴ Ke gone ka moo monna o tlaa tlogelang rraagwe le mmaagwe, o tlaa ngaparela mosadi wa gagwe; mme ba tlaa nna nama e le nngwe fela.

²⁵ Monna le mosadi wa gagwe ba bo ba sa ikatega, ka bobedi jwa bone; ba bo ba se na ditlhong.

3

¹ Jaana noga ya bo e le boferefere bogolo go ditshedi tsotlhe tsa naga tse Jehofa Modimo o di dirileng. Ya raya mosadi ya re: “Kana, a ruri Modimo o rile: ‘Lo se ka lwaa ja ditlhare tsa tshimo’?”

² Mosadi a raya noga a re: “Re ka ja loungo lwa ditlhare tsa tshimo;

³ mme loungo lwa setlhare se se fa gare ga tshimo, Modimo o rile: ‘Lo se ka lwa lo ja, le gone lo se ka lwa lo ama, lo ka tla lwaa swa.’ ”

⁴ Noga ya raya mosadi ya re: “Ruri ga lo ketla loo swa;

⁵ gonne Modimo o a itse gore, e tlaa re mo letsatsing le lo lo jang, foo matlho a lona a tlaa buduloga, mme lo tlaa nna jaaka Modimo, lo itse molemo le bosula.”

⁶ Mosadi a re a bona fa setlhare se le molemo go jewa, se bile se kgatlha mo matlhong, le gone fa setlhare se eletsega go tlhalefisa motho, a tsaya loungo lwa sone, a ja. A ba a lo naya monna wa gagwe a na nae, le ene a ja.

⁷ Ka tshoganetso matlho a bone boo babedi a buduloga, ba itemoga fa ba sa ikatega; mme ba rokaganya matlhare a mofeige, ba itirela diaparo.

⁸ Kgantele ba utlwa mokgwasa wa Jehofa Modimo a tsamaya mo tshimong, fa letsatsi le fefa, mme monna le mosadi wa gagwe ba iphitlha mo ditlhareng tsa tshimo, ba iphitlhela go bonala ga Jehofa Modimo.

⁹ Jehofa Modimo a bitsa monna, a mo raya a re: “O fa kae?”

¹⁰ Monna a re: “Ke utlwile mokgwasa wa gago mo tshimong, mme ka boifa, ka gobo ke ne ke sa ikatega, mme ka iphitlha.”

¹¹ Mme a re: “O boleletswe e mang fa o sa ikatega? A o jele setlhare se ke se go laetseng, ka re, o se ka wa se ja?”

¹² Monna a re: “Mosadi yo o mo nneileng gore ke nne nae, ke ene yo o nneileng ga setlhare, mme ka ja.”

¹³ Jehofa Modimo a raya mosadi a re: “Ke eng se o se dirileng?” Mosadi a re: “Noga e ntsieditse, mme ka ja.”

¹⁴ Jehofa Modimo a raya noga a re: “E re ka o dirile seo se, o hutsegile bogolo go dikgomo tsotlhe le diphologolo le dibatana tsa naga. O tlaa gopa ka mpa, o tlaa ja lorole ka malatsi otlhe a botshelo jwa gago.

¹⁵ Ke tlaa tsenya bobaba fa gare ga gago le mosadi, le fa gare ga losika lwa gago le losika lwa gagwe. Lone lo tlaa tapeta tlhogo ya gago, mme wena o tlaa loma serethe sa gagwe.”

¹⁶ A raya mosadi a re: “Ke tlaa go ntsifaletsa matshwenyego a go ima ga gago. O tlaa belega bana ka bohutsana; keletso ya gago e tlaa nna kwa monneng wa gago, mme o tlaa go laola.”

¹⁷ A raya Atame a re: “E re ka o reeditse lentswe la mosadi wa gago, o jele ga setlhare se ke se go laetseng ka re: ‘O se ka wa se ja,’ mmu o hutsegile ka ntlha ya gago. O tlaa ja ga one ka letsapa, malatsi otlhe a botshelo jwa gago.

¹⁸ O tlaa go tswela mitlwa le mofero. O tlaa ja merogo ya naga.

¹⁹ O tlaa ja dijo ka mofufutso wa sefatlhogo sa gago go fitlhelela o boele mo mmung, gonne o ntshitswe mo go one. Gonne o lorole, mme o tlaa boela mo loroleng.”

²⁰ Monna a raya mosadi wa gagwe leina a re Efa, ka gobo e le mmabatshedi botlhe.

²¹ Jehofa Modimo a direla Atame le mosadi wa gagwe diaparo tsa matlalo, a ba apesa.

²² Jehofa Modimo a re: “Bonang, motho o diregile jaaka mongwe wa rona, o itse molemo le bosula; jaanong e ka tla ya re gongwe a ntsha seatla sa gagwe a tsaya le ga sone setlhare sa botshelo, a ja, a tshela ka bosenabokhutlo.”

²³ Ke gone ka moo Jehofa Modimo a mo ntsha mo tshimong ya Etene, a ya go lema mmu o a ntshitsweng mo go one.

²⁴ Jalo a lelekela motho kwa ntle; kwa ntlheng ya botlhabatsatsi ga tshimo ya Etene a baya ditšheruba, le kgabo ya tšhaka e e tukang, e kgadikanela ntlheng tsotlhe, go thiba tsela e e yang setlhareng sa botshelo.

4

¹ Monna a itse Efa mosadi wa gagwe; a nna moimana a bona Kaine, a re: “Ke bonye monna ka thuso ya ga Jehofa.”

² Gape a bona Abele, monnawe. Abele e ne e le modisa wa dinku, Kaine e le molemi.

³ E rile motlha mongwe Kaine a tlisa ga loungo lwa mmu, a direla Jehofa tshupelo.

⁴ Abele, le ene a tlisa ga maitibolo a letsomane la gagwe, a na le mahura a lone. Mme Jehofa a itumelela Abele le tshupelo ya gagwe;

⁵ a se ka a itumelela Kaine le tshupelo ya gagwe. Jalo Kaine a nna bogale thata, le sefatlhogo sa gagwe sa befa.

⁶ Jehofa a raya Kaine a re: “Ana o galefetseng? Le sefatlhogo sa gago se befetseng?

⁷ A ga ke re fa o dira sentle o tlaa amogelesega? Mme fa o sa dire sentle, boleo bo ipobile fa mojakong; mme keletso ya jone e tlaa nna mo go wena, mme wena o bo laole.”

⁸ Kaine a bua le Abele, monnawe. Mme ga dirala ya re ba le kwa nageng, Kaine a kgomogela Abele monnawe, a mmolaya.

⁹ Jehofa a raya Kaine a re: “Abele monnao, o kae?” A araba a re: “Ga ke itse. A ke modisa wa ga nnake?”

¹⁰ Jehofa a re: “Ana o dirile eng? Lentswe la madi a ga monnao le mpitsa le tswa mo mmung.

¹¹ Jaanong o hutsitswe ke mmu, o o atlhamolotseng molomo wa one, go tsenya madi a ga monnao, a tswa seatleng sa gago.

¹² E tlaa re o lema mmu, ga o ketla o tlhola o go ntshetsa thata ya one; o tlaa nna mofaladi le mokgarakgatshegi mo lefatsheng.”

¹³ Kaine a raya Jehofa a re: “Petso ya me e feta mo nka go itshokelang.

¹⁴ Bona, gompieno o ntelekile mo lefatsheng, le sefatlhogo sa gago ke tlaa bo ke se fitlhegetse. Ke tlaa nna mofaladi le mokgarakgatshegi mo lefatsheng, mme go tlaa dirala gore mongwe fela yo o mponang a mpolaye.”

¹⁵ Jehofa a mo raya a re: “Ke gone le fa e le mongwe fela yo o tlaa bolayang Kaine, o tlaa busolosiwa gasupa.” Mme Jehofa a tlhomela Kaine sekao, e se re gongwe mongwe a mmona a mmolaya.

¹⁶ Kaine a tswa fa pele ga Jehofa, a aga mo lefatsheng la Note, go pota Etene ka fa botlhabatsatsi.

¹⁷ Kaine a itse mosadi wa gagwe, a nna moimana, a bona Enoke. A aga motse, a reelela motse leina la ga morwawe, a re ga Enoke.

¹⁸ Enoke a tshola Irate; Irate a tshola Mehujaele; Mehujaele a tsala Methušaele; Methušaele a tsala Lameke.

¹⁹ Lameke a tsaya basadi ba le babedi: leina la mongwe go twe, Ata, le leina la yo mongwe go twe, Sila.

²⁰ Ata a bona Jabale; ene e ne e le rraabone ba ba nnang mo ditenteng, ba na le dikgomo.

²¹ Leina la ga monnawe go ne go twe Jubale, ene e ne e le rra botlhe ba ba letsang harepe le lotlhaka.

²² Sila, le ene a bona Tubalekaine, e le mothudi wa ditshipi tse di segang, tsa kgotlho le tsa tshipi. Kgaitsadia Tubalekaine e ne e le Naama.

²³ Lameke a raya basadi ba gagwe a re: “Ata le Sila, utlwang lentswe la me: Lona basadi ba ga Lameke, lo reetse puo ya me, gonne ke bolaile monna ka a ne a ntlhabile, le lekau ka le ne le nkgolafaditse.

²⁴ E ka re fa Kaine a tlaa busolosediwa gasupa, ruri Lameke ene o tlaa busolosediwa gamasome a supa le metso e supa.”

²⁵ Atame a itse mosadi wa gagwe gape; mme a bona ngwana wa mosimane, a mo naya leina a re, Sethe. Mosadi a bua a re: “Modimo o ntaoletse losika lo longwe mo boemong jwa ga Abele; gonne Kaine o ne a mmolaile.”

²⁶ Sethe le ene a bona ngwana wa mosimane; a mo raya leina, a re, Enoše. Mo lobakeng loo batho ba simolola go bitsa leina la ga Jehofa.

5

¹ Lo, ke lone lokwalo lwa ditshika tsa ga Atame. Tsatsing le Modimo o tlhodileng motho ka lone, wa mo dira mo setshwanong sa one Modimo.

² Wa tlhola nona le tshadi, wa ba segofatsa, wa ba raya leina wa re “Batho” ka letsatsi le ba tlhodilweng ka lone.

³ Ya re Atame a sena go tshela dinyaga di le 130, a tshola ngwana wa mosimane yo o tshwanang nae, a ntse jaaka setshwano sa gagwe, a mo raya leina a re Sethe.

⁴ Atame a re a sena go tshola Sethe, malatsi a gagwe a nna dinyaga di le 800, a tshola tshimane le tshetsana.

⁵ Malatsi otlhe a Atame o tshedileng ka one e ne e le dinyaga di le 930, mme a swa.

⁶ Sethe a tshela dinyaga di le 105, a tshola Enoše.

⁷ Sethe a re a sena go tshola Enoše, a tshela dinyaga di le 807, a tshola tshimane le tshetsana.

⁸ Malatsi otlhe a ga Sethe e ne e le dinyaga di le 912, mme a swa.

⁹ Ya re Enoše a sena go tshela dinyaga di le 90, a tshola Kenane.

¹⁰ Enoše a re a sena go tshola Kenane a tshela dinyaga di le 815, a tshola tshimane le tshetsana.

¹¹ Malatsi otlhe a ga Enoše e ne e le dinyaga di le 905, mme a swa.

¹² Ya re Kenane a sena go tshela dinyaga di le 70, atshola Mahalalele.

¹³ Kenane a re a sena go tshola Mahalalele, a tshela dinyaga di le 840, a tshola tshimane la tshetsana.

¹⁴ Malatsi otlhe a ga Kenane e ne e le dinyaga di le 910, mme a swa.

¹⁵ Mahalalele a tshela dinyaga di le 65, a tshola Jarete.

¹⁶ Mahalalele a re a sena go tshola Jarete, a tshela dinyaga di le 830, a ba a tshola tshimane le tshetsana:

¹⁷ Malatsi otlhe a ga Mahalalele a ne e le dinyaga di le 895, mme a swa.

¹⁸ Jarete a tshela dinyaga di le 162, mme a tshola Enoke.

¹⁹ Jarete a re a sena go tshola Enoke, a tshela dinyaga di le 800, ke fa a tshola tshimane le tshetsana.

²⁰ Malatsi otlhe a ga Jarete e ne e le dinyaga di le 962, mme a swa.

²¹ Enoke a tshela dinyaga di le 65, mme a tshola Methusela.

²² Enoke a re a sena go tshola Methusela, a sepela le Modimo dinyaga di le 300, a tshola tshimane le tshetsana.

²³ Malatsi otlhe a ga Enoke e ne e le dinyaga di le 365.

²⁴ Enoke a sepela le Modimo; mme a tlhokafala, gonne Modimo o ne o mo tshotse.

²⁵ Methusela a tshela dinyaga di le 187, mme a tshola Lameke.

²⁶ Methusela a re a sena go tshola Lameke, a tshela dinyaga di le 782, a tshola tshimane le tshetsana.

²⁷ Malatsi otlhe a ga Methusela e ne le dinyaga di le 969, mme a swa.

²⁸ Lameke a tshela dinyaga di le 182, mme a tshola ngwana wa mosimane.

²⁹ A mo raya leina a re: Noa; a re: “Yo, o tlaa re gomotsa ka ga tiro ya rona, le ka ga letsapa la diatla tsa rona, ka ntlha ya mmu o Jehofa o o hutsitseng.”

³⁰ Lameke a re a sena go tshola Noa, a tshela dinyaga di le 595, a tshola tshimane le tshetsana.

³¹ Malatsi otlhe a ga Lameke e ne e le dinyaga di le 777, jalo a swa.

³² E rile Noa a le dinyaga di le 500, a tshola Sheme, le Hame le Jafethe.

6

¹ Ga dirala, e rile batho ba simolola go ntsifala mo lefatsheng, ba tshola bana ba basetsana.

² Bomorwa Modimo ba bona bomorwadia batho fa ba le bantle, jalo ba tsaya basadi mo go bone, botlhe ba ba ba ratang.

³ Jehofa a re: “Mowa wa me ga o ketla o nna o ganela le motho ka bosenabokhutlo, ka gobo le ene e bile ke nama. Le fa go ntse jalo malatsi a gagwe a tlaa nna dinyaga di le 120.”

⁴ Ga bo go le mekaloba mo lefatsheng mo malatsing ao. Le gone morago ga moo, fa bomorwa Modimo ba tsena mo go bomorwadia batho, ba tsala bana nabo, bao, e ne e le banna ba ba diganka tsa metlha ya bogologolo; banna ba ba itsegeng.

⁵ Mme Jehofa a bona fa boikepo jwa motho bo le bogolo mo lefatsheng, le go akanya ga megopolo ya pelo ya gagwe gotlhe, go le bosula ka metlha yotlhe.

⁶ Jehofa a ikwatlhaya ka a dirile motho mo lefatsheng, mme ga mo tlhokofatsa pelo.

⁷ Jehofa a re: “Ke tlaa senya motho yo ke mo dirileng ke mo tlosa mo lefatsheng, ene motho le phologolo le sebatana le se se gagabang le nonyane ya loapi; gonne ke a ikwatlhaya ka gobo ke di dirile.”

⁸ Mme Noa ene a bona bopelotlhomogi mo matlhong a ga Jehofa.

⁹ Tse, ke tsone ditshika tsa ga Noa. Noa e ne e le monna yo o siameng, a itekanetse mo ditshikeng tsa gagwe; Noa a sepela le Modimo.

¹⁰ Noa a tshola basimane ba le bararo: Sheme, Hame le Jafethe.

¹¹ Lefatshe le ne le senyegile fa pele ga Modimo, le ne le tletse thubakano.

¹² Modimo wa bona lefatshe, mme bona, le ne le senyegile; gonne batho botlhe ba sentse mekgwa ya bone mo lefatsheng.

¹³ Modimo wa raya Noa wa re: “Bokhutlo jwa batho botlhe bo fitlhile fa pele ga me; ka lefatshe le tletse thubakano ka ntlha ya bone. Bona, ke tlaa ba senya mmogo le lefatshe.

¹⁴ Itirele ntlo e e kokobalang ka dikgong tsa morukudu; dira matlwana mo ntlong, o e kane ka boka ka fa teng le ka fa ntle.

¹⁵ Sekao ke se, sa ka fa o tlaa e dirang ka gone: boleele jwa ntlo bo nne kana ka boleele jwa mabogo a le 300, le boatlhamo jwa yone bo nne mabogo a le 50, le bogodimo jwa yone bo nne mabogo a le 30.

¹⁶ O direle ntlo e e kokobalang marulelo, o sadise phatlha ya selekanyo sa lebogo fa gare ga lebota le marulelo. Mojako wa ntlo o o ntshe ka fa lotlhakoreng lwa yone. O e dire dikgaogano di le tharo tse di tlhatlaganyeng: e e fa tlase, le e e fa gare, le e e fa godimo.

¹⁷ Bona, ke tlaa tlisa morwalela wa metsi mo lefatsheng go senya nama yotlhe e mowa wa botshelo o leng mo go yone, go e tlosa fa tlase ga legodimo; dilo tsotlhe tse di mo lefatsheng di tlaa swa.

¹⁸ Ke tlaa tlhomamisa kgolagano ya me nao; o tlaa tsena mo ntlong e e kokobalang, wena, le bomorwao, le mosadi wa gago, le basadi ba bomorwao ba na nao.

¹⁹ Mo go tsotlhe tse di tshelang; tsa nama yotlhe, o tseye di le pedi tsa ditshika tsotlhe, o di ise mo ntlong eo go di tshedisa nao; di nne e tona le e namagadi.

²⁰ Ga dinonyane ka fa ditshikeng tsa tsone, le ga diruiwa ka fa ditshikeng tsa tsone, ga sengwe le sengwe se se gagabang fa fatshe ka fa losikeng lwa sone, go tlaa tla kwa go wena di le pedi tsa losika longwe le longwe, go di tshedisa.

²¹ O itseele dijo tsotlhe tse di jewang, o di phuthele kwa go wena; mme e tlaa nna dijo tsa gago le tsa tsone.”

²² Noa a dira jalo; mo go tsotlhe tse Modimo o di mo laoletseng, a dira fela jalo.

7

¹ Jehofa a raya Noa a re: “Tsena, wena le ntlo ya gago yotlhe mo ntlong e e kokobalang; gonne wena, ke go bonye o le tshiamo fa pele ga me mo losikeng lo.

² Ga ditshedi le diphologolo dingwe le dingwe tse di itshekileng o itseele di supa le di supa, e tona le e namagadi ya tsone; ga dikgomo le diphologolo tse di sa itshekang di le pedi, e tona le e namagadi ya tsone.

³ Ga dinonyane tsa loapi le tsone, di supa le di supa, e tona le e namagadi; go tshedisa losika mo lefatsheng lotlhe fela.

⁴ Gonne e tlaa re malatsi a supa a sena go feta, ke tlaa nesa pula mo lefatsheng ka malatsi a le 40 le masigo a le 40; dilo tsotlhe tse di tshedileng tse ke di dirileng, ke tlaa di senya ke di tlosa mo lefatsheng.”

⁵ Noa a dira gotlhe ka fa Jehofa a mo laetseng ka gone.

⁶ E rile morwalela wa metsi o nna mo lefatsheng, Noa a bo a le dinyaga di le 600.

⁷ Noa a tsena mo ntlong e e kokobalang, ene le bomorwawe, le mosadi wa gagwe le basadi ba bomorwawe nae, ka ntlha ya metsi a morwalela.

⁸ Ga ditshedi le diphologolo tse di itshekileng, le ga ditshedi le diphologolo tse di sa itshekang, ga dinonyane, le ga sengwe le sengwe se se gagabang fa fatshe,

⁹ tsa tsena ka bobedi le bobedi kwa go Noa mo ntlong, e tona le e namagadi, jaaka Modimo o laotse Noa.

¹⁰ Ga dirala ya re malatsi a supa a sena go feta, metsi a morwalela a nna mo lefatsheng.

¹¹ Ka ngwaga wa 600 wa botshelo jwa ga Noa, ka kgwedi ya bobedi, ka letsatsi la 17, ka letsatsi leo fela metswedi yotlhe ya boteng jo bogolo jo bo teng teng ya phunyega, le dithoba tsa legodimo tsa bulega.

¹² Pula ya na mo lefatsheng ka malatsi a le 40, le masigo a le 40.

¹³ Ka letsatsi leo fela Noa a tsena mo ntlong e e kokobalang, a na le Sheme, le Hame le Jafethe, bomorwa Noa, le mosadi wa ga Noa, le basadi ba bararo ba bomorwawe nae.

¹⁴ Bone le phologolo nngwe le nngwe le sebatana ka fa losikeng lwa tsone, le diruiwa tsotlhe ka fa ditshikeng tsa tsone, le sengwe le sengwe se se gagabang fa fatshe ka fa losikeng lwa sone, le mefuta yotlhe ya dinonyane ka fa losikeng lwa yone, nonyane nngwe le nngwe ya tse di diphuka tsotlhe,

¹⁵ tsa tsena kwa go Noa mo ntlong e e kokobalang, bobedi le bobedi jwa nama yotlhe e mowa wa go tshela o leng mo go yone.

¹⁶ Tse di tsenyeng, tsa tsena e le tona le namagadi tsa nama yotlhe fela, jaaka Modimo o mo laotse; Jehofa a mo tswalela mo teng.

¹⁷ Morwalela wa tswelela ka malatsi a le 40; metsi a kokomoga, a tsholetsa ntlo; ya tsholetsega godimo ga lefatshe.

¹⁸ Metsi a hupetsa, a kokomoga thata mo lefatsheng; ntlo ya tsamaya fa godimo ga metsi.

¹⁹ Metsi a kokomoga thata thata mo lefatsheng: dithaba tse di godileng tsotlhe fela, tse di kwa tlase ga legodimo tsa khurumetsega.

²⁰ Metsi a kokomogela godimo tekanyo ya boleele jwa mabogo a le some le botlhano; le tsone dithaba tsa khurumetsega.

²¹ Nama yotlhe e e tsamayang mo lefatsheng ya a swa, dinonyane le diruiwa, diphologolo le dibatana, le sengwe le sengwe se se gagabang fa fatshe, le batho botlhe.

²² Tsotlhe tse go leng mowa wa botshelo mo dinkong tsa tsone, tsa tse di mo komelelong, tsa a swa.

²³ Sengwe le sengwe se se tshedileng se se mo lefatsheng sa senngwa, batho le diruiwa, le se se gagabang, le dinonyane tsa legodimo; tsa senngwa tsa tlosiwa mo lefatsheng; ga sala Noa a le esi fela, le ba o nang nabo mo ntlong e e kokobalang.

²⁴ Metsi a hupetsa lefatshe ka malatsi a a 150.

8

¹ Modimo wa gopola Noa le sengwe le sengwe se se tshedileng, le diruiwa tsotlhe tse o nang natso mo ntlong e e kokobalang; Modimo wa fokisa phefo mo lefatsheng, metsi a kokobela.

² Metswedi ya boteng le yone ya thibala le dithoba tsa legodimo, le pula e e tswang legodimong ya kgaodiwa.

³ Metsi a nna a boa a fokotsega mo lefatsheng ka metlha yotlhe; morago, malatsi a a 150 a sena go feta, metsi a ngotlafala.

⁴ Ya re ka kgwedi ya bosupa, ka letsatsi la lesome le bosupa la kgwedi, ntlo e e kokobalang ya ema mo dithabeng tsa Ararate.

⁵ Metsi a nna a ngotlafala ka metlha yotlhe go ya go fitlha mo kgweding ya lesome; ka kgwedi ya lesome, le ka letsatsi la ntlha la kgwedi, ditlhora tsa dithaba tsa bonala.

⁶ Ga dirala ya re malatsi a le 40 a sena go feta, Noa a bula fensetere ya ntlo e e kokobalang e o neng a e dirile.

⁷ A ntsha mohukubu, mme wa tswa wa dikologa dikologa, ga tsamaya metsi a kgala mo lefatsheng.

⁸ A ba a ntsha lephoi, go bona gore a metsi a setse a ngotlegile mo lefatsheng.

⁹ Mme lephoi la se ka la fitlhela gope fa le ka bayang monoto wa lone gone, la boela kwa go ene kwa ntlong, gonne metsi a ne a sa ntse a bipile lefatshe lotlhe fela; a ntsha seatla sa gagwe, a le tsaya, a le busetsa mo go ene, mo ntlong.

¹⁰ A nama a sa tlhotse malatsi a mangwe a supa, a ntsha lephoi mo ntlong gape.

¹¹ Lephoi la boela kwa go ene maitseboa mme la bo le hupile mo molomong wa lone letlhare la motlhware. Jalo Noa a itse fa metsi a setse a ngotlegile mo lefatsheng.

¹² A fela a tlhotse malatsi a supa gape, a ba a ntsha lephoi gape mme la se ka la tlhola le boela kwa go ene.

¹³ Ga dirala, ya re ka ngwaga wa 601, ka kgwedi ya ntlha, le ka letsatsi la ntlha la kgwedi, metsi a bo a kgadile mo lefatsheng. Noa a tlosa sekhurumelo sa ntlo, a okomela, mmu wa bo o omile.

¹⁴ E rile ka kgwedi ya bobedi ka letsatsi la 27, lefatshe la bo le omeletse.

¹⁵ Modimo wa raya Noa, wa re:

¹⁶ “Tswa mo ntlong e e kokobalang, wena, le mosadi wa gago, le bomorwao, le basadi ba bomorwao.

¹⁷ O bo o tswe le sengwe le sengwe sa tse di tshedileng tse o nang natso, sa ditshedi tsotlhe; dinonyane, le diruiwa, le sengwe le sengwe se se gagabang mo lefatsheng, gore di tle di tsale thata, di ate, di ntsifale mo lefatsheng.”

¹⁸ Noa a tswa, le bomorwawe, le mosadi wa gagwe, le basadi ba bomorwawe.

¹⁹ Phologolo nngwe le nngwe le sebatana, se se gagabang sengwe le sengwe, le nonyane nngwe le nngwe, sengwe le sengwe se se tsamayang mo lefatsheng ka fa ditshikeng tsa tsone, tsa tswa mo ntlong e e kokobalang.

²⁰ Noa a agela Jehofa sebeso: a tsaya ga ditshedi le phologolo nngwe le nngwe e e itshekileng, le ga nonyane nngwe le nngwe e e itshekileng, a isa ditshupelo tsa phiso mo sebesong.

²¹ Jehofa a dupa monko o o monate, Jehofa a ithaya a re: “Ga nketla ke tlhola ke hutsa mmu gape ka ntlha ya motho, ka gobo go akanya ga pelo ya motho go le bosula go tswa bokaung jwa gagwe; le gone ga nketla ke tlhola ke laila dilo tsotlhe tse di tshelang jaaka ke dirile.

²² E tlaa re ka metlha yotlhe lefatshe le sa ntse le leyo, ga go ketla go khutla letsema le thobo, serame le mogote, lotlhabula le mariga, motshegare le bosigo.”

9

¹ Modimo wa segofatsa Noa le bomorwawe, wa ba raya, wa re: “Atang lo ntsifale, lo tlale ka lefatshe.

² Lo tlaa boifiwa, lo tlaa tshajwa ke phologolo nngwe le nngwe le sebatana sa lefatshe, le nonyane nngwe le nngwe ya loapi; gotlhe mo go nyeulang ka bontsi mo lefatsheng, le ditlhapi tsotlhe tsa lewatle, go tsentswe mo atleng sa lona.

³ Dilo tsotlhe tse di tsamayang tse di tshelang, di tlaa nna dijo tsa lona; jaaka merogo e metala, ke di lo neile tsotlhe fela.

⁴ Nama e e tlhakanyeng le botshelo jwa yone, jo e leng madi a yone, lo se ka lwa e ja.

⁵ Ruri madi a lona, madi a matshelo a lona, ke tlaa a lopa; ke tlaa a lopa mo phologolong nngwe le nngwe, le mo sebataneng; le mo seatleng sa motho e bong seatla sa morwa rramotho, ke tlaa lopa botshelo jwa motho.

⁶ “Le fa e le mang yo o tshololang madi a motho, le ene madi a gagwe a tlaa tshololwa ke motho; gonne Modimo o dirile motho mo setshwanong sa one.

⁷ “Lona, atang, lo ntsifale; lo tshole bana ba le bantsi mo lefatsheng, lo ntsifale mo go lone.”

⁸ Modimo wa bua le Noa, le bomorwawe ba na nae wa re:

⁹ “Bonang, ke tlhomamisa kgolagano ya me le lona, le losika lwa lona morago ga lona.

¹⁰ Ke e tlhomamisa le ditshedi tsotlhe tse lo nang natso, dinonyane, le dikgomo, phologolo nngwe le nngwe le dibatana tsa lefatshe tse lo nang natso; tsotlhe tse di tswang mo ntlong e e kokobalang, e bong diphologolo le dibatana tsotlhe tsa lefatshe.

¹¹ Ke tlaa tlhomamisa kgolagano ya me le lona; le gone nama yotlhe ga e ketla e tlhola e kgaolwa ka metsi a morwalela; le gone ga go ketla go tlhola go tla morwalela go senya lefatshe.”

¹² Modimo wa re: “Se, ke sone sesupo sa kgolagano e ke e dirang gare ga me le lona, le dilo tsotlhe tse di tshedileng, tse lo nang natso, go ya ditshikeng tse di se nang bokhutlo:

¹³ Ke tlhoma motshe wa me, ke le Modimo, mo lerung; o tlaa nna sesupo sa kgolagano gare ga me le lefatshe.

¹⁴ Go tlaa dirala gore, fa ke lere leru le okama lefatshe, go tlaa bonala motshe wa godimo mo lerung.

¹⁵ Ke tlaa gakologelwa kgolagano ya me, e e emeng fa gare ga me le lona, le dibopiwa tsotlhe tse di tshedileng tsa nama tsotlhe, mme metsi ga a ketla a tlhola a tswa morwalela go senya ditshedi tsotlhe.

¹⁶ Motshe wa godimo o tlaa nna mo lerung; mme ke tlaa o leba, gore ke tle ke gakologelwe kgolagano e e sa khutleng fa gare ga Modimo le dibopiwa tsotlhe tse di mo lefatsheng.”

¹⁷ Modimo wa raya Noa, wa re: “Se, ke sone sesupo sa kgolagano e ke e tlhomamisitseng fa gare ga me le ditshedi tsotlhe tse di mo lefatsheng.”

¹⁸ Bomorwa Noa ba ba duleng mo ntlong e e kokobalang e ne e le Sheme, le Hame le Jafethe. Hame ke rra Kanana.

¹⁹ Ba bararo bao e ne e le bomorwa Noa, jalo ga tswa mo go bone ba ba farafereng lefatshe lotlhe.

²⁰ Noa a simolola go nna molemi wa mbu, mme a tlhoma tshimo ya mofine.

²¹ A nwa bojalwa jwa mofine, a tagwa, a bo a sa ikatega a le mo mogopeng wa gagwe.

²² Hame, rra Kanana, a bona bosaikategang jwa ga rraagwe, a bolelela bomorwa rraagwe ba babedi kwa ntle.

²³ Sheme le Jafethe ba tsaya seaparo, ba se baya mo maruding a bone boo babedi, ba kata ka samorago, ba bipa bosaikategang jwa ga rraabo; difatlhogo tsa bone tsa bo di mo fularetse, ba se ka ba bona bosaikategang jwa ga rraabo.

²⁴ A thanya mo bojalweng jwa gagwe jwa mofine, a itse se morwawe yo mmotlana o se mo diretseng.

²⁵ A re: “A go hutsege Kanana. O tlaa nna motlhanka wa batlhanka mo go bomorwa rraagwe.”

²⁶ A ba a re: “A go bakwe Jehofa Modimo wa ga Sheme: A Kanana a nne motlhanka wa gagwe.

²⁷ A Modimo o godise Jafethe; o tlaa aga mo megopeng ya ga Sheme, mme a Kanana a nne motlhanka wa gagwe.”

²⁸ E rile morwalela o sena go feta, Noa a tshela dinyaga di le 350.

²⁹ Malatsi otlhe a ga Noa e ne e le dinyaga tse di 950, ke fa a swa.

10

¹ Tse, ke tsone ditshika tsa bomorwa Noa, e bong Sheme, Hame, le Jafethe. Ba tsala bana ba basimane morago ga morwalela.

² Bomorwa Jafethe ke Gomere le Magoge, le Matai, le Jafane, le Tubale, le Mešeke, le Tirase.

³ Bomorwa Gomere ke Ašekenase, le Rifathe, le Togarema.

⁴ Bomorwa Jafane ke Eliša, le Tarešiše, le Kitime, le Dotanime.

⁵ Ditlhake tsa merafe tsa kgaoganngwa ke bone, ka fa mafatsheng a bone, mongwe le mongwe ka fa lolemeng lwa gagwe, ka fa ditshikeng tsa bone, mo merafeng ya bone.

⁶ Bomorwa Hame ke Kuše, le Miseraime, le Pute, le Kanana.

⁷ Bomorwa Kuše ke Seba, le Hafila, le Sabeta, le Raama, le Sabeteka. Bomorwa Raame ke Sheba le Detane.

⁸ Kuše a tshola Nimerote; ene a simolola go nna seganka mo lefatsheng.

⁹ E ne e le motsomi yo o nonofileng fa pele ga Jehofa. Ke gone go tle go twe: “Jaaka Nimerote motsomi yo o nonofileng fa pele ga Jehofa.”

¹⁰ Tshimologo ya bogosi jwa gagwe e ne e le Babele, le Erege, le Akate, le Kalene, mo lefatsheng la Shinare.

¹¹ A tswa mo lefatsheng leo, a ya Asiria, a aga Ninefe, le Rehobotheire, le Kala,

¹² le Resene fa gare ga Ninefe le Kala, o e leng motse o mogolo.

¹³ Miseraime a tshola Baludime, le Baaname, le Balehabime le Banafetuhime

¹⁴ le Bapatherusime, le Bakaseluhime, mo go duleng Bafilisitia, le Kafetorime.

¹⁵ Kanana a tshola Sitone, wa gagwe wa ntlha, le Hethe,

¹⁶ le Bajebuse le Baamore, le Bagiregaše;

¹⁷ le Bahife le Baarike, le Basine;

¹⁸ le Baarefate le Basemare, le Bahamathe. Morago ga mo ditshika tsa Bakanana tsa anama.

¹⁹ Molelwane wa Bakanana wa simologa kwa Sitone, jaaka fa go tsamaiwa go lebilwe Gerare go ya go fitlha kwa Gasa; jaaka fa go tsamaiwa go lebilwe Sotoma le Gomora le Atema, le Seboime go fitlha kwa Laša.

²⁰ Bao, ke bomorwa Hame ka fa ditshikeng tsa bone, ka fa ditemeng tsa bone, mo mafatsheng a bone, mo merafeng ya bone.

²¹ Sheme, rra bana botlhe ba ga Ebere, mogoloa Jafethe, le ene a bona bana.

²² Bomorwa Sheme ke Elame le Asešure le Arepakešate le Lute, le Arame.

²³ Bomorwa Arame ke Use, le Hule, le Gethere, le Maše.

²⁴ Arepakešate a tshola Shela; Shela a tshola Ebere.

²⁵ Ebere a tshola bana ba basimane ba le babedi; leina la yo mongwe go twe Pelege, gonne lefatshe la kgaoganngwa mo metlheng ya gagwe; leina la ga monnawe, go twe, Joketane.

²⁶ Joketane a tshola Alemotate le Shelefe le Hasaremafethe le Jera;

²⁷ le Hatorame le Usale le Dikela;

²⁸ le Obale le Abimaele le Sheba;

²⁹ le Ofire le Hafila le Jobabe; botlhe bao, e ne e le bomorwa Joketane.

³⁰ Boago jwa bone bo ne bo simologa kwa Meša, jaaka fa go tsamaiwa go lebilwe Sefare, e le thaba e e kwa botlhabatsatsi.

³¹ Bao ke bomorwa Sheme ka fa ditshikeng tsa bone, ka fa ditemeng tsa bone, mo mafatsheng a bone, ka fa merafeng ya bone.

³² Tseo, ke ditshika tsa bomorwa Noa, ka fa ditshikeng tsa bone, mo merafeng ya bone; mme merafe ya kgaogana ka bone bao mo lefatsheng morago ga morwalela.

11

¹ Lefatshe lotlhe la bo le le puo e le nngwe fela, le mafoko a le mangwe fela.

² Mme ga dirala ya re batho ba etela kwa ntlheng ya botlhabatsatsi, ba fitlhela lobala longwe mo lefatsheng la Shinare; mme ba aga gone.

³ Ba raana, ba re: “Tlang re direng setene, re se bese se butswe thata.” Setene ya bo e le sone maje a bone, mme bitumena ya bo e le seretse sa bone.

⁴ Ba re: “Tlang re ikageleng motse, le kago e e godileng e setlhowa sa yone se tlaa fitlhang kwa legodimong, mme a re itireleng leina; e se re kgotsa ra phatlalalela mo lefatsheng lotlhe.”

⁵ Mme Jehofa a fologela go bona motse, le kago e e godileng e bana ba batho ba e agang.

⁶ Jehofa a re: “Bonang, ke batho ba le bangwe fela, ba bile ba na le puo e le nngwe fela botlhe; mme se ke sone se ba simololang go se dira. Jaanong ga ba ketla ba kgoreletsega mo go sepe se ba ikaeletseng go se dira.

⁷ Tlang re fologeng, re tlhakatlhakanye puo ya bone gone, gore ba se ka ba utlwana mo puong.”

⁸ Jalo Jehofa a ba phatlalaletsa le lefatshe lotlhe; mme ba khutla go aga motse.

⁹ Ke gone ka moo, leina la gone go tulweng Babele, ka gobo Jehofa a petekantse puo ya lefatshe lotlhe gone; Jehofa a ba phatlalaletsa le lefatshe lotlhe go tswa gone.

¹⁰ Tse, ke tsone ditshika tsa ga Sheme. O ne a le dinyaga di le 100, a tshola Arepakešate dinyaga di le pedi morago ga morwalela.

¹¹ Sheme a re a sena go tshola Arepakešate, a tshela dinyaga di le 500, a ntse a tshola tshimane le tshetsana.

¹² Arepakešate a tshela dinyaga di le 35, a tshola Shela.

¹³ Arepakešate a re a sena go tshola Shela, a tshela dinyaga di le 403, a ntse a tshola tshimane le tshetsana.

¹⁴ Shela a tshela dinyaga di le 30, a tshola Ebere.

¹⁵ Shela a re a sena go tshola Ebere, a tshela dinyaga di le 403, a ntse a tshola tshimane le tshetsana.

¹⁶ Ebere a tshela dinyaga di le 34, a tshola Pelege.

¹⁷ Ebere a re a sena go tshola Pelege, a tshela dinyaga di le 430, a ntse a tshola tshimane le tshetsana.

¹⁸ Pelege a tshela dinyaga di le 30, a tshola Reu.

¹⁹ Pelege a re a sena go tshola Reu, a tshela dinyaga di le 209, a ntse a tshola tshimane le tshetsana.

²⁰ Reu a tshela dinyaga di le 32, a tshola Seruge.

²¹ Reu a re a sena go tshola Seruge, a tshela dinyaga di le 207, a ntse a tshola tshimane le tshetsana.

²² Seruge a tshela dinyaga di le 30, a tshola Nahore.

²³ Seruge a re a sena go tshola Nahore, a tshela dinyaga di le 200, a ntse a tshola tshimane le tshetsana.

²⁴ Nahore a tshela dinyaga di le 29, a tshola Tera.

²⁵ Nahore a re a sena go tshola Tera, a tshela dinyaga di le 119, a ntse a tshola tshimane le tshetsana.

²⁶ Ya re Tera a sena go tshela dinyaga di le 70, a tshola Aberame, Nahore le Harane.

²⁷ Mme jaana tse, ke tsone ditshika tsa ga Tera. Tera a tshola Aberame, Nahore le Harane; Harane a tshola Lote.

²⁸ Harane a swa pele ga rraagwe Tera, mo lefatsheng le a tsaletsweng mo go lone, e bong Ure wa Bakalatea.

²⁹ Aberame le Nahore ba tsaya basadi: leina la mosadi wa ga Aberame, go twe Sarai; leina la mosadi wa ga Nahore go twe Mileka, morwadia Harane, rra Mileka le rra Iseka.

³⁰ Sarai ya bo e le moopa; a se na ngwana.

³¹ Tera a tsaya Aberame morwawe, le Lote morwa Harane, ngwana wa ngwana wa gagwe, le Sarai ngwetsi ya gagwe, mosadi wa ga Aberame morwawe, a tswa nabo mo Ure wa Bakalatea, go ya kwa lefatsheng la Kanana, mme ba fitlha mo Harane, ba aga gone.

³² Malatsi a ga Tera e ne e le dinyaga di le 205; a swela mo Harane.

12

¹ Jaana Jehofa a raya Aberame a re: “Tloga, o tswe mo lefatsheng la gaeno, le mo go bagaeno, le mo ntlong ya ga rraago, o ye kwa lefatsheng le ke tlaa le go supetsang.

² Ke tlaa dira morafe o mogolo ka wena; ke tlaa go segofatsa, ke dira leina la gago le nna legolo, gore wena o nne tshegofatso.

³ “Le gone ke tlaa segofatsa bone ba ba go segofatsang, le ene yo o go hutsang ke tlaa mo hutsa. Mo go wena, ditshika tsotlhe tsa lefatshe di tlaa segofala.”

⁴ Jalo Aberame a tsamaya jaaka Jehofa a ne a buile nae; le Lote a ya nae. Aberame a bo a le dinyaga di le 75 fa a tloga mo Harane.

⁵ Aberame a tsaya Sarai mosadi wa gagwe, le Lote morwa monnawe, le thoto ya bone yotlhe fela e ba neng ba e bapetse, le batho ba ba ba bonyeng mo Harane; ba tswa ba tsamaela kwa lefatsheng la Kanana, ba fitlha mo lefatsheng la Kanana.

⁶ Aberame a ralala lefatshe a tla a fitlha kwa felong ga Šhekeme, a tla mo mookeng wa ga More. Mokanana a bo a le mo lefatsheng ka lobaka loo.

⁷ Jehofa a bonala kwa go Aberame, a re: “Lefatshe le, ke tlaa le naya losika lwa gago.” Jaana a agela Jehofa yo o bonetseng kwa go ene sebeso gone.

⁸ A huduga gone, a ya kwa thabeng e e potileng Bethele ntlheng ya botlhabatsatsi, a tlhoma mogope wa gagwe, a potilwe ke Bethele ka fa bophirimatsatsi, le ke Ai ka fa botlhabatsatsi. A agela Jehofa sebeso gone, a bitsa leina le Jehofa.

⁹ Aberame a eta, a fela a ntse a tsamaela kwa Borwa.

¹⁰ Ga nna leuba mo lefatsheng. Ke fa Aberame a fologela kwa Egepeto go jaka gone, gonne leuba le ne le le letona mo lefatsheng.

¹¹ Mme ga dirala ya re a le gaufi le go tsena mo Egepeto, a raya Sarai mosadi wa gagwe a re: “A o ko o bone jaana, ke a itse fa o le mosadi yo montle go lejwa.

¹² Go tlaa dirala gore, e re Baegepeto ba go bona ba re: ‘Yo, ke mosadi wa gagwe;’ mme ba tlaa mpolaya, wena ba go lese.

¹³ Ke a go rapela, o tle o re, o kgaitsadiake, gore go tle go nne molemo mo go nna ka ntlha ya gago, gore mowa wa me o tshele ka wena.”

¹⁴ Mme ga dirala e rile Aberame a sena go fitlha mo Egepeto, Baegepeto ba bona mosadi fa a le montle thata.

¹⁵ Dikgosana tsa ga Faro tsa mmona, tsa mmoka kwa go Faro; mosadi a isiwa mo ntlong ya ga Faro.

¹⁶ Faro a tshola Aberame sentle ka ntlha ya mosadi. Aberame a amogela dinku, le dikgomo, le diesela tse ditona, le batlhanka, le malata, le diesela tse dinamagadi le dikamela.

¹⁷ Jehofa a betsa Faro le ntlo ya gagwe ka dipetso tse ditona, ka ntlha ya ga Sarai, mogatsa Aberame.

¹⁸ Ke fa Faro a bitsa Aberame a re: “Ana se o se ntiretseng ke eng? O ne o sa mpoleleleng fa e le mosadi wa gago?

¹⁹ O ne o buelang o re ke kgaitsadio? Ke ba ke ka mo tsaya ke re o tlaa nna mosadi wa me. Ke gone jaana, bona mosadi wa gago ke yo, mo tseye, o tsamaye.”

²⁰ Faro a laela banna bangwe ka ga gagwe, ba mmuledisa, le mosadi wa gagwe, le tsotlhe tse a nang natso.

13

¹ Aberame a tlhatloga mo Egepeto, ene le mosadi wa gagwe, le tsotlhe tse a nang natso, a na le Lote, a ya ntlheng ya Borwa.

² Aberame a bo a humile dikgomo thata, le selefera, le gouta.

³ A nna a tsamaya ka go fuduga fa, a ya go aga fale, a tswa Borwa a ba a fitlha le kwa Bethele, kwa felong fa tente ya gagwe e kileng ya nna gone mo tshimologong fa gare ga Bethele le Ai;

⁴ kwa felong ga sebeso se o kileng a se dira gone pele. Aberame a bitsa leina la ga Jehofa gone.

⁵ Lote yo o neng a tsamaya le Aberame, a bo a na le matsomane, le matlhape, le ditente.

⁶ Lefatshe la bo le sa ba lekana go ka nna mmogo, gonne dithoto tsa bone di ne di le dikgolo, ba retelelwa ke go aga mmogo.

⁷ Ga nna kgang fa gare ga badisa ba dikgomo tsa ga Aberame le badisa ba dikgomo tsa ga Lote. Le gone Bakanana le Baperise ba ne ba agile mo lefatsheng leo ka lobaka loo.

⁸ Aberame a raya Lote a re: “Ke a go rapela, a go se nne kgang fa gare ga me le wena, le fa gare ga badisa ba me le ba gago, gonne re bana ba monna a le mongwe fela.

⁹ A lefatshe lotlhe ga le fa pele ga gago? Ke a go rapela, o kgaogane le nna. E tlaa re fa o ya ka fa letsogong la molema, nna ke ye ka fa go le legolo; gongwe fa o ya ka fa letsogong le legolo, nna ke ye ka fa go la molema.”

¹⁰ Lote a tsholetsa matlho a gagwe, a bona lobala lotlhe lwa Joretane fa lo na le metsi sentle ntlheng tsotlhe. E ne e le pele ga Jehofa a senya Sotoma le Gomora, lo ne lo ntse jaaka tshimo ya Jehofa, le jaaka lefatshe la Egepeto, fa go iwa kwa Soare.

¹¹ Jalo Lote a itlhophela lobala lotlhe lwa Joretane. Lote a hudugela ntlheng ya botlhabatsatsi; ba kgaogana jalo.

¹² Aberame a aga mo lefatsheng la Kanana, Lote ene a aga mo metseng ya lobala, a nna a hudusa mogope wa gagwe go ya go fitlha kwa Sotoma.

¹³ Jaana banna ba Sotoma e ne e le baikepi le baleofi mo gogolo thata fa pele ga Jehofa.

¹⁴ Jehofa a raya Aberame, morago Lote a sena go kgaogana nae, a re: “Tsholetsa matlho a gago, fa o leng gone, o lebe ntlheng ya Botsheka, le kwa Borwa, le kwa Botlhabatsatsi, le kwa Bophirimatsatsi;

¹⁵ gonne lefatshe lotlhe le o le bonang, ke tlaa le naya wena, le losika lwa gago ka bosakhutleng.

¹⁶ Ke tlaa dira losika lwa gago lo nna jaaka lorole lwa lefatshe, ke gore, fa motho a ka bala lorole lwa lefatshe, foo losika lwa gago le lone lo tlaa balwa.

¹⁷ Nanoga, o ralale lefatshe ka boleele jwa lone, le ka boatlhamo jwa lone, gonne ke tlaa le go naya.”

¹⁸ Aberame a hudusa mogope wa gagwe, a tla a aga fa maokeng a ga Mamere a a mo Heberone, a agela Jehofa sebeso gone.

14

¹ Ga dirala e rile mo metlheng ya ga Amerafele kgosi ya Shinare, le Arioke kgosi ya Elasare, le Ketorelaomere kgosi ya Elame, le Titale kgosi ya Goime,

² ba tsosa ntwa le Bera kgosi ya Sotoma, le Bireša kgosi ya Gomora, le Shinabe kgosi ya Atema, le Shemebere kgosi ya Seboime, le kgosi ya Bela, ke go re Soare.

³ Ba botlhe ba kopanela mo mokgatšheng wa Sidime, fa jaanong go bidiwang Lewatle la Letswai.

⁴ Ba direla Ketorelaomere ka dinyaga di le 12; ka ngwaga wa motso wa boraro ba mo tsogologela.

⁵ Ka ngwaga wa lesome le bone, ga tla Ketorelaomere, le dikgosi tse a nang natso, ba kgemetha Barefaime mo Ašeterothe-Karenaime, le Basusime mo Hame, le Baemime mo Shafe-Kiriathaime.

⁶ Le Bahore mo Seire, thaba ya bone, go fitlha kwa Eleparane, yo o bapileng le sekaka.

⁷ Ba sokologa, ba fitlha kwa Enamišepate ke go re Kateše, ba kgemetha lefatshe lotlhe la Baamaleke, le la Baamore ba ba neng ba agile mo Hasasone-tamare.

⁸ Ga bolola kgosi ya Sotoma, le kgosi ya Gomora, le kgosi ya Atema, le kgosi ya Seboime, le kgosi ya Bela, ke go re Soare; ba ba abela ntwa mo mokgatšheng wa Sidime.

⁹ Ba e abela Ketorelaomere kgosi ya Elame, le Titale kgosi ya Goime, le Amerafele kgosi ya Shinare, le Arioke kgosi ya Elasare; dikgosi di le nne di tlhabana le tse tlhano.

¹⁰ Jaana mokgatšha wa Sidime wa bo o tletse didiba tsa bitumena; mme kgosi tsa Sotoma le Gomora tsa sia, tsa wela mo didibeng, ba ba falotseng ba tshabela kwa thabeng.

¹¹ Ba thopa dithoto tsotlhe tsa Sotoma le Gomora, le dijo tsotlhe tsa bone, ba tsamaya.

¹² Ba tshwara Lote, morwa monnaa Aberame, yo o agileng mo Sotoma, le dithoto tsa gagwe, ba tsamaya.

¹³ Ga tla mongwe yo o falotseng, a bolelela Aberame wa Mohebere: jaana ene a bo a agile fa maokeng a ga Mamere wa Moamore, morwa rraagwe Ešekole, le morwa rraagwe Anere; bao ya bo e le bathusanyi le Aberame.

¹⁴ E rile Aberame a utlwa fa monnawe a tshwerwe, a bolotsa banna ba gagwe ba ba rutegileng, ba ba tsaletsweng mo ntlong ya gagwe ba le 318, a ba latelela go ya go fitlha kwa Dane.

¹⁵ A ba ikabela bosigo, ene le batlhanka ba gagwe, a ba kgemetha, a ba letelela go fitlha kwa Hoba, o o potileng Damaseko ka fa ntlheng ya la molema.

¹⁶ A busa dithoto tsotlhe, le gone a ba a busa Lote, monnawe, le dithoto tsa gagwe, le basadi, le batho.

¹⁷ Kgosi ya Sotoma ya tswa, ya ya go mo kgatlhantsha a sena go boa kwa polaong ya ga Ketorelaomere, le dikgosi tse a neng a na natso, kwa mokgatšheng wa Shafe, ke gore, Mokgatšha wa Kgosi.

¹⁸ Melekiseteke kgosi ya Saleme a tswa a tshotse senkgwe le bojalwa jwa mofine; a bo a le moperesiti wa Modimo Mogodimodimo.

¹⁹ A mo segofatsa; a re: “A go segofadiwe Aberame ke Modimo Mogodimodimo, Mong wa legodimo le lefatshe.

²⁰ A go bakwe Modimo Mogodimodimo, o o tsentseng baba ba gago mo seatleng sa gago.” Mme a mo naya sabosome sa tsotlhe.

²¹ Kgosi ya Sotoma ya raya Aberame ya re: “Nnaya batho, wena o tseye dithoto.”

²² Aberame a raya kgosi ya Sotoma a re: “Seatla sa me ke se tsholeleditse Jehofa Modimo Mogodimodimo, Morui wa legodimo le lefatshe.

²³ Ka re ga nketla ka tsaya tlhale, le fa e le kgole ya setlhako, le fa e le sepe se e leng sa gago, e se re gongwe wa re: ‘Ke humisitse Aberame.’

²⁴ Fa e se se makau a se jeleng, le kabelo ya batho ba ke tsamaileng nabo, e bong Anere le Ešekole le Mamere, bao a ba tseye kabelo ya bone.”

15

¹ Morago ga dilo tse, lefoko la Jehofa la tla kwa go Aberame ka ponatshegelo la re: “O se ka wa boifa, Aberame. Ke nna thebe ya gago, le tuelo ya gago e kgolo e e feteletseng.”

² Aberame a re: “Morena Modimo, ana o tlaa nnaya eng ka e le fano ke ntse fela ke se na ngwana, mme ene yo o tlaa nnang morui wa ntlo ya me e le Eliesere wa Modamaseko?”

³ Aberame a re: “Bona, ga o a nnaya losika lope, mme bona, motho fela yo o tsaletsweng mo ntlong ya me o tlaa nna moja boswa jwa me.”

⁴ Mme, bonang, lefoko la ga Jehofa la tla kwa go ene la re: “Motho yo, ga a ketla a nna moja boswa jwa gago; ene yo o tlaa tswang mo mmeleng wa gago o tlaa nna moja boswa jwa gago.”

⁵ A mo gogela kwa ntle a re: “A ko o lebe jaana kwa legodimong, o bale dinaledi, fa o ka di bala.” A mo raya a re: “Losika lwa gago lo tlaa nna kalo.”

⁶ A dumela Jehofa; a mo itumelela a kaya fa tumelo ya gagwe e le tshiamo.

⁷ A mo raya a re: “Ke nna Jehofa yo ke go ntshitseng mo Ure wa Bakalatea, go go naya lefatshe le, go le rua.”

⁸ A re: “Jehofa Modimo, ana ke tlaa itse ka eng fa ke tlaa le rua?”

⁹ A mo raya a re: “Ntlisetsa kgomo ya moroba e e dinyaga tharo, le podi e namagadi e e dinyaga tharo, le phelefu e e dinyaga tharo, le lephoi, le leebana.”

¹⁰ A tsaya tsotlhe tse, a di fatoganya ka bogare, a baya mofama, mongwe o lebaganye le o mongwe; dinonyane a se ka a di fatoganya.

¹¹ Manong a fologela mo ditotong, Aberame a a leleka.

¹² E rile letsatsi le phirima Aberame a welwa ke boroko jo botona; a tlelwa ke letshogo le poifo e kgolo.

¹³ Mme a raya Aberame a re: “Itse ruri fa losika lwa gago lo tlaa nna baeng mo lefatsheng le e seng la bone, ba tlaa ba direla; ba tlaa ba bogisa ka dinyaga di le 400.

¹⁴ Le one morafe oo, o ba tlaa o direlang, ke tlaa o sekisa; morago ba tlaa tswa ka dithoto tse dikgolo.

¹⁵ Mme wena, o tlaa ya kwa go borraago ka kagiso; o tlaa fitlhwa o tsofetse sentle thata.

¹⁶ E tlaa re mo losikeng lwa bone, ba tlaa boela kwano gape; gonne boikepo jwa Moamore ga bo ise bo tlale.”

¹⁷ Ga dirala ya re letsatsi le phirimile go le lefifi, bonang, leiso la leubelo le le kubang mosi, le lobone lo lo tukang, tsa ralala fa gare ga mefama eo.

¹⁸ Ka letsatsi leo Jehofa a dira kgolagano le Aberame a re: “Lefatshe le, ke le neile losika lwa gago, go tswa nokeng ya Egepeto go fitlha kwa nokeng e kgolo, noka ya Euferatese:

¹⁹ Mokene, le Mokenise, le Mokatemone,

²⁰ le Mohite, le Moperise, le Morefaime,

²¹ le Moamore, le Mokanana, le Mogiregaše, le Mojebuse.”

16

¹ Jaana Sarai, mosadi wa ga Aberame, a bo a sa bone bana nae; a bo a na le lelata, e le Moegepeto, leina la gagwe go twe, Hagare.

² Sarai a raya Aberame a re: “Bona jaana, Jehofa o ntlhokisitse go bona bana; ke a go rapela, ya kwa lelateng la me, e tle e re gongwe ke bone bana ka ene.” Aberame a reetsa lentswe la ga Sarai.

³ Sarai, mosadi wa ga Aberame, a tsaya Hagare wa Moegepeto, lelata la gagwe, a mo naya Aberame monna wa gagwe, gore e nne mosadi wa gagwe. E ne e le morago ga Aberame a sena go aga dinyaga di le lesome mo lefatsheng la Kanana.

⁴ A ya kwa go Hagare, a nna moimana; o rile a ipona a le moimana, a ikgodisa a simolola go nyatsa mohumagadi wa gagwe.

⁵ Sarai a raya Aberame a re: “Ke molato wa gago gore tiro e e sa siamang e, e ntirafalele. Ke isitse lelata la me mo sehubeng sa gago; o rile a ipona a imile a nnyatsa. A Jehofa a atlhole fa gare ga me le wena.”

⁶ Aberame a raya Sarai a re: “Bona, lelata la gago le mo seatleng sa gago; mo dire se se molemo mo matlhong a gago.” Sarai a mo direla ka bopeloethata; a tshaba sefatlhogo sa gagwe.

⁷ Moengele wa ga Jehofa a mo fitlhela fa motsweding wa metsi mo nageng, fa motsweding o o mo tseleng e e yang Shure.

⁸ A re: “Hagare, lelata la ga Sarai, o tswa kae? Mme o ya kae?” A re: “Ke tshaba sefatlhogo sa mohumagadi wa me, Sarai.”

⁹ Moengele wa ga Jehofa a mo raya a re: “Boela kwa mohumagading wa gago, o ineele mo seatleng sa gagwe.”

¹⁰ Moengele a ba a mo raya a re: “Ke tlaa ntsifatsa losika lwa gago thatathata, lo ba lo tla lo retela go balwa ke bontsi.”

¹¹ Moengele wa ga Jehofa a mo raya a re: “Bona, o moimana jaana, o tlaa bona ngwana wa mosimane; o tlaa raya ngwana leina o re: ‘Išemaele’, ka gobo Jehofa o utlwile patikego ya gago.

¹² “Ene o tlaa nna jaaka esela ya naga mo bathong; o tlaa lwantsha motho mongwe le mongwe; le motho mongwe le mongwe o tlaa mo lwantsha. O tlaa aga a lebaganye le bana botlhe ba ga rraagwe.”

¹³ A raya Jehofa yo o buileng nae leina, a re: “O Modimo o o bonang;” gonne a re: “A ntsaana ke bonye fano ene yo o mponang?”

¹⁴ Ke gone ka moo sediba sa bidiwa Beere-lahai-roi (ke go re: “Sediba sa Motshedi yo o mponang”). Bonang, se fa gare ga Kateše le Berete.

¹⁵ Hagare a bona ngwana wa mosimane le Aberame. Aberame a raya leina la ga morwawe yo Hagare a mmonyeng a re, Išemaele.

¹⁶ Aberame a bo a le dinyaga di le 86 fa Hagare a bona Išemaele nae.

17

¹ E rile Aberame a le dinyaga di le 99, Jehofa a bonala kwa go Aberame a mo raya a re: “Ke nna Modimo Mothatayotlhe; sepela fa pele ga me, o se na selabe sa molato.

² Ke tlaa dira kgolagano ya me fa gare ga me le wena, ke tlaa ba ke go ntsifatsa mo gogolo thata.”

³ Aberame a wela fa fatshe ka sefatlhogo. Modimo wa bua nae wa re:

⁴ “Ka ga me, bona, kgolagano ya me e na nao; o tlaa nna rra-bontsi jwa merafe.

⁵ Le gone leina la gago ga le ketla le tlhola le bidiwa Aberame, mme leina la gago le tlaa nna Aberahame; gonne ke go dirile raa-bontsi jwa merafe.

⁶ Mme ke tlaa go atisa mo gogolo thata, ke tlaa dira merafe ka wena, le dikgosi di tlaa tswa mo go wena.

⁷ “Ke tlaa tlhomamisa kgolagano ya me gare ga me le wena, le losika lwa gago sefularong sa gago, go ya le ditshika tsotlhe tsa bone, gore e nne kgolagano e e sa khutleng, ya go re, ke tlaa nna Modimo mo go wena le mo losikeng lwa gago sefularong sa gago.

⁸ Lefatshe la majako a gago, lefatshe lotlhe la Kanana, ke tlaa le naya wena le losika lwa gago sefularong sa gago, go nna boswa jo bo sa khutleng; ke tlaa nna Modimo wa bone.”

⁹ Modimo wa raya Aberahame wa re: “Ka ga gago, boloka kgolagano ya me, wena, le losika lwa gago sefularong sa gago, go ya le ditshika tsotlhe tsa bone.

¹⁰ Kgolagano ya me ke e, e lo tlaa e bolokang, fa gare ga me le wena le losika lwa gago, sefularong sa gago; banna botlhe le basimane botlhe mo go lona ba rupisiwe.

¹¹ Lo tlaa rupisiwa nama ya letlalo la bonna jwa lona; mme e tlaa bo e le sesupo sa kgolagano fa gare ga me le lona.

¹² A go rupisiwe mosimane mongwe le mongwe wa lona a le malatsi a a ferang mebedi, mo ditshikeng tsotlhe tsa lona, ene yo o tsaletsweng mo ntlong, gongwe yo o rekilweng ka madi mo moennyeng, yo e seng wa losika lwa gago.

¹³ Yo o tsaletsweng mo ntlong ya gago, le ene yo o rekilweng ka madi a gago, ba na le go rupisiwa fela. Kgolagano ya me e tlaa nna mo nameng ya lona, go nna kgolagano e e sa khutleng.

¹⁴ Mme banna le basimane ba ba sa rupisiwang, ba nama ya letlalo la bonna jwa bone e sa rupisiwang, mongwe le mongwe wa bone o tlaa kgaolwa mo bathong ba ga gabo; o tlodile kgolagano ya me.”

¹⁵ Modimo wa raya Aberahame wa re: “Ka ga Sarai, mosadi wa gago, o se ka wa bitsa leina la gagwe Sarai, leina la gagwe e nne Sara.

¹⁶ Ke tlaa mo segofatsa; gape, ke tlaa go naya ngwana wa mosimane ka ene. Ee, ke tlaa mo segofatsa, o tlaa nna mmamerafe: Dikgosi tsa ditšhaba di tlaa tswa mo go ene.”

¹⁷ Foo Aberahame a wela fa fatshe ka sefatlhogo, a tshega, a ithaya mo pelong a re: “A ngwana o ka bonwa ke yo o dingwaga di lekgolo? Le Sara yo o dingwaga di 90, a o ka bona ngwana?”

¹⁸ Aberahame a raya Modimo a re: “A bo Išemaele a ka ka a tshela a le fa pele ga gago.”

¹⁹ Modimo wa re: “Nnyaa, Sara mosadi wa gago o tlaa bona ngwana wa mosimane nao, o tlaa mo raya leina o re, Isake. Ke tlaa tlhomamisa kgolagano ya me nae, le losika lwa gagwe sefularong sa gagwe go nna kgolagano e e sa khutleng.

²⁰ Ka ga Išemaele, ke go utlwile. Bona, ke mo segofaditse, ke tlaa mo atisa, ke tlaa mo ntsifatsa mo go golo thata. O tlaa tsala dikgosana di le 12, ke tlaa mo dira morafe o mogolo.

²¹ Kgolagano ya me ke tlaa e tlhomamisa le Isake yo Sara o tlaa mmonang nao, ka lobaka lono lo lo tlhomameng lwa isago.”

²² Modimo wa khutla go bua nae; wa tlhatloga wa tswa fa go Aberahame.

²³ Aberahame a tsaya Išemaele morwawe, le botlhe ba ba tsaletsweng mo tlong ya gagwe, le botlhe ba ba rekilweng ka madi a gagwe, banna le basimane botlhe mo bathong ba ntlo ya ga Aberahame, a rupisa nama ya letlalo la bonna jwa bone ka letsatsi leo fela, jaaka Modimo o buile nae.

²⁴ Aberahame a bo a le dingwaga di 99 fa a rupisiwa nama ya letlalo la bonna jwa gagwe.

²⁵ Išemaele morwawe a bo a le dingwaga di le 13 fa a rupisiwa nama ya letlalo la bonna jwa gagwe.

²⁶ Ka letsatsi leo fela Aberahame a rupisiwa, le Išemaele morwawe.

²⁷ Le banna botlhe ba ntlo ya gagwe, ba ba tsaletsweng mo ntlong; le ba ba rekilweng ka madi mo moennyeng, ba rupisiwa nae.

18

¹ Jehofa a bonala kwa go ene fa maokeng a ga Mamere, a dutse mo mojakong wa mogope, go le mogote wa motshegare.

² A tsholetsa matlho a gagwe, a leba, mme bonang, ga bo go eme banna ba le bararo ba lebaganye nae. O rile a ba bona a tloga mo mojakong wa mogope, a siana a ya go ba kgatlhantsha, a ikobela fa fatshe a re:

³ “Morena wa me, a e re fa ke bonye tsalano mo matlhong a gago, ke a go rapela gore, motlhanka wa gago o se ka wa mo feta fela.

⁴ A lo ke lo mme go tlisiwe metsinyana, lo itlhapise dinao, lo itapolose fa tlase ga setlhare.

⁵ Ke tlaa tlisa senkgwenyana, lo ithethebatse pelo; ka e le fano lo gorogetse motlhanka wa lona, morago ga moo lo tlaa feta.” Ba re: “Dira jalo, jaaka o buile.”

⁶ Aberahame a itlhaganelela kwa go Sara mo mogopeng, a re: “Baakanya ka bofefo dielo di le tharo tsa boupe jo bo sweu jo bo boleta o bo dube, o bo o dire dinkgwe tsa dipapetla.”

⁷ Aberahame a sianela kwa matlhapeng, a gapa namane ya lebotla e e nama e boruma, a e neela motlhanka, a akofa a e baakanya.

⁸ A tsaya madila, le maši, le namane e o e baakantseng, a di baya fa pele ga bone. A ema fa go bone fa tlase ga setlhare, ba a ja.

⁹ Ba mo raya ba re: “Sara mosadi wa gago o kae?” A re: “Bonang, o mo mogopeng.”

¹⁰ A re: “Morago ga dikgwedi tse di bofera bongwe di sena go feta, ruri ke tlaa boela mo go wena, bona, Sara, mosadi wa gago o tlaa bona ngwana wa mosimane.” Sara a utlwa a le mo mojakong wa mogope o o fa morago ga gagwe.

¹¹ Jaana Aberahame le Sara ba bo ba tsofetse, ba tsofaletse ruri. Sara o ne a khutlike go nna ka mokgwa wa bosadi.

¹² Sara a tshega mo teng ga gagwe a re: “A ke ka bona boitumelo ke tsofetse, le morena wa me le ene a tsofetse?”

¹³ Jehofa a raya Aberahame a re: “Sara o ne a tshegelang, a re: ‘A ruri ke tlaa bona ngwana, nna yo ke tsofetseng?’

¹⁴ A go na le sengwe se se ka retelelang Jehofa? Ke tlaa re mo lobakeng lo lo laotsweng ke boele mo go wena, fa lobaka lo, lo bile lo tsile, Sara o tlaa bona ngwana wa mosimane.”

¹⁵ Foo Sara a itatola a re: “Ga ke a tshega!” gonne a boifa. Ene a re: “Nnyaa, o no o tshega.”

¹⁶ Banna ba, ba tloga gone foo, ba leba kwa Sotoma, Aberahame a ya nabo go ba buledisa.

¹⁷ Jehofa a re: “A ke tlaa lobela Aberahame se ke se dirang?

¹⁸ E tswa Aberahame ruri a tlaa nna morafe o mogolo le o o thata, e bile merafe yotlhe e tlaa segofala mo go ene.

¹⁹ Gonne ke mo tlhophile gore a tle a nne a laole bana ba gagwe, le ba ntlo ya gagwe morago ga gagwe, gore ba boloke tsela ya Jehofa go dira tshiamiso le katlholo gore Jehofa a tle a tlise mo go Aberahame se o se buileng ka ga gagwe.”

²⁰ Jehofa a re: “E re ka selelo ka ga Sotoma le Gomora se le segolo, le ka boleo jwa bone bo utlwisa botlhoko thata,

²¹ ke tlaa fologa jaana, ke ya go bona boo ba dirile gotlhe fela ka fa selelong se se fitlhileng kwa go nna; fa go sa nna jalo, ke tlaa itse.”

²² Banna ba, ba sokologa gone, ba tsamaela kwa Sotoma, mme Aberahame a nama a sa eme fa pele ga Jehofa.

²³ Aberahame a atamela a re: “A o tlaa nyeletsa basiami le baikepi?

²⁴ E tlaa re fa gongwe go ka nna le basiami ba le 50 mo motseng, a o tlaa nyeletsa o sa rekegele motse oo ka ntlha ya basiami ba ba 50 ba ba gone?

²⁵ A go nne kgakala nao go dira mo go ntseng jalo, go bolaya basiami le baikepi, ka e tlaa bo e le go re basiami ba ntse jaaka baikepi. Golo mo, a go nne kgakala nao; a Moatlhodi wa lefatshe lotlhe ga a ketla a dira tshiamo?”

²⁶ Jehofa a re: “E tlaa re fa ke fitlhela basiami ba le 50 mo Sotoma, mo teng ga motse, foo ke tlaa rekegela gotlhe ka ntlha ya bone.”

²⁷ Aberahame a fetola a re: “Bona jaana, nna yo ke leng lorole le molora, ke ipeile go bua le Jehofa.

²⁸ E tlaa re gongwe go tlhokafale ba le batlhano mo basiaming ba ba 50, a o tlaa senya motse otlhe ka go tlhoka ba le batlhano?” Mme a re: “Ga nketla ke o senya fa ke fitlhela ba le 45 gone.”

²⁹ A fela a bua nae gape, a re: “E tlaa re gongwe go fitlhelwe ba le 40 gone.” Mme a re: “Ga nke ke go dira ka ntlha ya ba ba 40.”

³⁰ A re: “A Morena wa me a se ka a nna bogale, ke tlaa bua. E tlaa re gongwe go fitlhelwe ba le 30 gone.” A re: “Ga nketla ke go dira fa ke fitlhela ba le 30 gone.”

³¹ A re: “Bona, jaana, ke ipeile go bua le Morena; e tlaa re gongwe go fitlhelwe ba le 20 gone.” Mme a re: “Ga nketla ke o senya ka ntlha ya ba ba 20.”

³² A re: “A Morena wa me a se ka a nna bogale, ke tlaa fela ke bua gangwe fela gape; e tlaa re gongwe go fitlhelwe ba le some gone.” A re: “Ga nketla ke o senya ka ntlha ya ba ba some.”

³³ Jehofa a tsamaya a sena go khutla go bua le Aberahame; Aberahame a boela kwa ga gagwe.

19

¹ Baengele ba babedi ba fitlha kwa Sotoma go le maitseboa, Lote a bo a dutse fa kgorong ya Sotoma. Ya re Lote a ba bona, a nanoga a ya go ba kgatlhantsha, a ikobela ka sefatlhogo fa fatshe.

² A re: “Bonang jaana, barena ba me, ke a lo rapela, a lo ke lo fapogele mo ntlong ya motlhanka wa lona, lo lale, lo itlhapise dinao tsa lona, lo tlaa phakela lo tsamaya.” Ba re: “Nnyaa re tlaa lala mo mmileng.”

³ A ba rapela thata, ke fa ba fapogela mo go ene, ba tsena mo ntlong ya gagwe; a ba direla modiro, a besa senkgwe se se sa bedisiwang, ba a ja.

⁴ E rile ba ise ba robale, banna ba motse, e bong banna ba Sotoma, ba dika ntlo, bannye le bagolo, batho botlhe ba tswa ntlheng tsotlhe fela.

⁵ Ba goa Lote, ba mo raya ba re: “Banna ba ba tsenyeng mo go wena sigong jono ba fa kae? Ba ntshetse kwano go rona, gore re tlhakanele dikobo nabo.”

⁶ Lote a tswela kwa go bone kwa mojakong, a tswala ntlo morago ga gagwe.

⁷ A re: “Ke a lo rapela bana ba ga rra, lo se ka lwa dira bosula jo bo kalo.

⁸ Bonang jaana ke na le bana ba basetsana ba le babedi ba ba iseng ba itse monna; ke a lo rapela, lo mme ke ba ntshetse kwa go lona, mme lo dire ka bone se se rategang mo matlhong a lona; mme banna ba, lo se ka lwa ba dira sepe, ka e le fa ba tsenye ka fa tlase ga moriti wa ditlhomeso tsa me.”

⁹ Ba re: “Thiboga foo.” Ba ba ba re: “Seo se sa motho se ne se tsile go jaka fela, mme jaanong o rata go re laola; jaana re tlaa go direla maswe bogolo go bone.” Ba pitlelela monna yo thata, e bong Lote, ba atamela, ba tla go thuba setswalo.

¹⁰ Banna ba, ba ntsha letsogo, ba gogela Lote kwa go bone mo ntlong, mme ba tswala ntlo.

¹¹ Banna ba ba ka fa mojakong wa ntlo ba ba foufatsa, bannye le bagolo; jalo ba itapisa fela ka gore ba senka mojako.

¹² Banna bao ba raya Lote ba re: “Fa o sa na le bangwe gape mono, bagwe ba gago le bomorwao, le bomorwadio, le mongwe fela yo o nang nao mo motseng, o ba ntshe felong fa;

¹³ gonne re tlaa senya felo fa, ka gobo selelo ka ga bone se diregile sekgobo fa pele ga Jehofa; jalo Jehofa o re romile gore re senye Sotoma.”

¹⁴ Lote a tswela kwa ntle, a ya go bua le bagwe ba gagwe ba ba neng ba tlaa tsaya bomorwadie a re: “Nanogang lo tswe felong fa, gonne Jehofa o tlaa senya motse o.” Mme mo go bagwe ba gagwe ya ne ekete ke motho yo o sotlang.

¹⁵ E rile bosigo bo anoga, foo baengele ba akofisa Lote ba re: “Nanoga, o tseye mosadi wa gago le bomorwadio ba babedi, ba ba fano; o ka tla wa nyelediwa mo tshiamologong ya motse.”

¹⁶ Mme a diega; banna bao ba mo tshwara ka seatla, le seatla sa mosadi wa gagwe, le seatla sa bomorwadie ba babedi, ka Jehofa a mo utlwela botlhoko. Ba mo ntshetsa kwa ntle, ba mmaya kwa ntle ga motse.

¹⁷ Ga dirala ya re ba sena go ba ntshetsa koo kwa ntle, a mo raya a re: “Tshaba o iphedise; se gadime, le gone o se ka wa emaema mo lobaleng lotlhe fela. Tshabela kwa thabeng, o tle o se ka wa nyelediwa.”

¹⁸ Lote a ba raya a re: “Nnyaa Jehofa wa me, a go se nne jalo!

¹⁹ Bona jaana, motlhanka wa gago o bonye bopelotlhomogi mo matlhong a gago, mme o totisitse kutlwelobotlhoko ya gago e o e ntshupeditseng ka go boloka botshelo jwa me; fela, ke palelwa ke go tshabela kwa dithabeng, ka e ka tla ya re gongwe bosula jwa ntshwara, mme ka swa.

²⁰ Bona jaana, motse o, o gaufi go ka tshabela kwa go one, e bile o monnye. A ko o mme ke tshabele gone, a ga o monnye? Mowa wa me o tlaa tshela.”

²¹ A mo raya a re: “Bona le ka ga selo se ke go amogetse gore ga nketla ke ribegetsa motse o o buileng ka ga one.

²² Akofa o tshabele gone, gonne ga nkake ka dira sepe o ise o fitlhe gone.” Ke gone ka moo leina la motse le bidiwa Soare, ke go re, Monnye.

²³ E rile Lote a fitlha mo Soare, letsatsi la bo le tlhabile.

²⁴ Foo Jehofa a nesetsa Sotoma le Gomora sulefura le molelo mo go tswang kwa go Jehofa mo legodimong.

²⁵ A ribegetsa metse eo, le lobala lotlhe fela, le banni botlhe ba metse le se se melang mo mmung.

²⁶ Mosadi wa gagwe a gadima a le fa morago ga gagwe, mme a tswa motlhoboloko wa letswai.

²⁷ Aberahame a phakelela kwa felong fa o neng a eme gone fa pele ga Jehofa.

²⁸ A leba kwa Sotoma le Gomora, le kwa lefatsheng lotlhe la lobala, a leba, mme mosi wa lefatshe wa bo o tlhatloga jaaka mosi wa leiso la leubelo.

²⁹ Ga dirala, ya re Modimo o senya metse ya lobala, Modimo wa gopola Aberahame, wa ntsha Lote mo gare ga thibegetso, fa o ribegetsa metse e Lote o neng a agile mo go yone.

³⁰ Lote a tlhatloga mo Soare, a aga mo thabeng, le bomorwadie ba babedi nae, ka gobo a boifa go aga mo Soare; a aga mo logageng, ene le bomorwadie ba babedi.

³¹ Yo mogolo a raya yo mmotlana a re: “Rraarona o tsofetse, mme ga go na monna mo lefatsheng yo o ka tsenang mo go rona ka fa mokgweng wa lefatshe lotlhe.

³² Ntlo re nose rraarona bojalwa jwa mofine, re tlaa lala nae, gore re tle re boloke losika lwa ga rraarona.”

³³ Ba nosa rraabo bojalwa jwa mofine sigong joo: yo mogolo a tsena a lala le rraagwe; mme a se ka a lemoga go robala ga gagwe, le fa e le go tsoga ga gagwe.

³⁴ Ga dirala ya re ka moso, yo mogolo a raya yo mmotlana a re: “Bona, sigo jwa maabane ke letse le rre; a re mo nose bojalwa jwa mofine sigo jono le jone; wena o tsene, o lale nae, gore re tle re boloke losika lwa ga rraarona.”

³⁵ Ba nosa rraabo bojalwa jwa mofine le ka jone sigo joo. Yo mmotlana a tloga a lala nae; mme a se ka a lemoga go robala ga gagwe, le fa e le go tsoga ga gagwe.

³⁶ Jalo bomorwadia Lote boo babedi ba imisiwa ke rraabo.

³⁷ Yo mogolo a bona ngwana wa mosimane, a mo raya leina a re: Moabe. Ke ene rra Bamoabe le gompieno.

³⁸ Yo mmotlana le ene a bona ngwana wa mosimane, a mo raya leina a re, Benami. Ke ene rra bana ba ga Amone le gompieno.

20

¹ Aberahame a tswa gone a etela kwa lefatsheng le le kwa Borwa, a aga fa gare ga Kateše le Shure; a jaka mo Gerare.

² Aberahame a bua ka ga Sara, mosadi wa gagwe, a re: “Ke kgaitsadiake:” Abimeleke kgosi ya Gerare a roma a ya go tsaya Sara.

³ Modimo wa tla mo go Abimeleke ka toro bosigo, wa mo raya wa re: “Bona, o moswi fela ka ntlha ya mosadi yo o mo tsereng; ka gobo e le mosadi wa monna o sele.”

⁴ Jaana Abimeleke o ne a ise a mo atamele; a re: “Morena a o tlaa bolaya le morafe o o siameng?

⁵ A le ene ka esi ga a nthaya a re: ‘Ke kgaitsadiake’? Le ene mosadi ka esi o rile: ‘Ke kgaitsadie.’ Ke dirile seo se ka pelo e e siameng fela, le ka diatla tse di phepa fela.”

⁶ Modimo wa mo raya mo torong wa re: “Ee, ke a itse fa o dirile seo se ka pelo e e siameng fela, le gone le nna ka go kganela gore o se ka wa nteofela. Ke gone ka mo ke se kang ka go leseletsa go mo ama.

⁷ Ke gone jaana, rebolela monna mosadi wa gagwe; gonne ene ke moperofite, o tlaa go rapelela, mme o tlaa tshela. Fa o sa mo rebole, o bo o itse fa ruri o tlaa swa, wena le botlhe ba e leng ba gago.”

⁸ Abimeleke a phakela ka moso, a bitsa batlhanka botlhe ba gagwe, a bolela dilo tse mo ditsebeng tsa bone; banna ba boifa thata.

⁹ Foo Abimeleke a bitsa Aberahame, a mo raya a re: “Ana o re diretse eng? Ke go leofetse mo go eng fa e bo ne ne jaana o tliseditse nna, le bogosi jwa me namane e tona ya boleo? O ntiretse ditiro tse di sa tshwanelang go dirwa.”

¹⁰ Abimeleke a raya Aberahame a re: “O ne o ikaeletse eng fa o ne o dira jaana?”

¹¹ Aberahame a re: “Ke ka gonne ke ne ke gopotse gore ruri ga go na ope yo o boifang Modimo mo felong fano. Ka re, ba tlaa mpolaya ka ntlha ya mosadi wa me.

¹² Le mororo ruri ke kgaitsadiake, morwadia rre, mme e seng morwadia mme, mme a tla a nna mosadi wa me.

¹³ E rile Modimo o nkgarakgatsha ke tswa ntlong ya ga rre, ka raya mosadi ka re: ‘Pelonomi ke e, e o tlaa e ntshupetsang; felong gongwe le gongwe kwa re tlaa fitlhang gone, o bolele ka ga me o re: Ke kgaitsadiake.’ ”

¹⁴ Abimeleke a tsaya dinku le dikgomo, le batlhanka, le malata, a di naya Aberahame, a ba a mo rebolela Sara mosadi wa gagwe.

¹⁵ Abimeleke a re: “Bona, lefatshe la me ke leo le fa pele ga gago; aga fela kwa o go ratang.”

¹⁶ A raya Sara a re: “Bona, ke neile kgaitsadio dipapetla tsa selefera di le 1 000. Bona, ke sebipo sa matlho mo go botlhe ba o nang nabo; mme o siamisitswe fa pele ga batho botlhe.”

¹⁷ Aberahame a rapela Modimo; Modimo wa fodisa Abimeleke, le mosadi wa gagwe, le malata a gagwe; ba bona bana.

¹⁸ Gonne Jehofa o ne a tswaletse ruri dipopelo tsotlhe tsa ba ntlo ya ga Abimeleke, ka ntlha ya ga Sara, mosadi wa ga Aberahame.

21

¹ Jehofa a lekola Sara jaaka a dikile a buile, Jehofa a direla Sara jaaka buile.

² Sara a nna moimana a bona ngwana wa mosimane le Aberahame, mo botsofeng jwa gagwe, ka lobaka lo lo laotsweng, lo Modimo o kileng wa bua nae ka ga lone.

³ Aberahame a raya morwawe yo o mo tsetseng, yo Sara o mmonyeng nae leina, a re, Isake.

⁴ Mme Aberahame a rupisa morwawe Isake a le malatsi a 8 jaaka Modimo o ne o mo laotse.

⁵ E rile Aberahame a tshola Isake morwawe, a bo a le dinyaga di le 100.

⁶ Mme Sara a re: “Modimo o mpolaisitse ditshego; mongwe le mongwe yo o utlwang o tlaa tshega le nna.”

⁷ A re: “Go ne go ka bua mang a raya Aberahame a re: ‘Sara o tlaa amusa bana’? Gonne ke bonye nae ngwana wa mosimane mo botsofeng jwa gagwe.”

⁸ Ngwana a tutuga, a kgwisiwa. Aberahame a dira modiro o mogolo ka letsatsi le Isake o kgwisiwang ka lone.

⁹ Sara a bona morwa Hagare wa Moegepeto, yo o mmonyeng le Aberahame, a sotla.

¹⁰ Ka ntlha ya moo a raya Aberahame a re: “Leleka mosadi wa lelata le morwawe, gonne morwa mosadi yo wa lelata ga a ketla a nna moja boswa le morwaake, e bong Isake.”

¹¹ Selo se, sa nna botlhoko thata mo matlhong a ga Aberahame ka ntlha ya ga morwawe.

¹² Modimo wa raya Aberahame wa re: “A go se nne botlhoko mo matlhong a gago ka ntlha ya mosimane, le ka ntlha ya mosadi wa gago wa lelata. O nne o reetse lentswe la ga Sara mo go tsotlhe tse o di go rayang; gonne losika lwa gago lo tlaa bidiwa ka Isake.

¹³ Le gone ke tlaa dira morafe ka ene morwa mosadi wa lelata, ka e le losika lwa gago.”

¹⁴ Aberahame a phakela ka moso, a tsaya senkgwe le sepako sa metsi, a di naya Hagare, a di baya mo maruding a gagwe, le ngwana, a mo tsamaisa; a tsamaya, a kgarakgatshega mo nageng ya Beerešeba.

¹⁵ Metsi a fela mo sepakong, mme a latlhela ngwana fa tlase ga setlhatshana sengwe.

¹⁶ A ya a dula a lebaganye nae kwa kgakalanyana, go le jaaka kwa motho o ka hulelang motswi gone, gonne a re: “A ke se ka ka bona go swa ga ngwana.” A dula a lebaganye nae, a tsholetsa lentswe la gagwe, a lela.

¹⁷ Modimo wa utlwa lentswe la mosimane; moengele wa Modimo a bitsa Hagare a le kwa legodimong, a mo raya a re: “Go a reng, Hagare? O se ka wa boifa, gonne Modimo o utlwile lentswe la mosimane kwa o gone.

¹⁸ Nanoga, o kakatlolole ngwana, o mo tshegetse ka letsogo; gonne ke tlaa mo dira morafe o mogolo.”

¹⁹ Modimo wa budulola matlho a gagwe, a bona sediba sa metsi, a ya a gelela sepako, a nosa mosimane.

²⁰ Modimo wa nna le mosimane, a gola; a aga mo nageng, a tswa mohula-ka-bora.

²¹ A aga mo nageng ya Parane. Mmaagwe a mo tseisa mosadi kwa lefatsheng la Egepeto.

²² Ga dirala ya re ka lobaka loo, Abimeleke a na le Pikole, molaodi wa ntwa ya gagwe, a bua le Aberahame a re: “Modimo o na nao mo go tsotlhe tse o di dirang.

²³ Ke gone jaana, inkanele fano ka Modimo, fa o se ketla o mpherekanela le fa e le morwaake, le fa e le morwa ngwanake. Fela ka fa pelonoming e ke e go diretseng, o tlaa e ntirela o bo o direla lefatshe le o jakileng mo go lone.”

²⁴ Aberahame a re: “Ke tlaa ikana.”

²⁵ Aberahame a omanya Abimeleke ka ntlha ya sediba sa metsi se batlhanka ba ga Abimeleke ba se tsereng ka dikgoka.

²⁶ Abimeleke a re: “Ga ke itse yo o dirileng selo se; le gone ga o a ka wa mpolelela, le gone ga ke ise ke utlwe, ke utlwa gompieno fela.”

²⁷ Aberahame a tsaya dinku le dikgomo, a di naya Abimeleke; mme bobedi jwa bone ba dira kgolagano.

²⁸ Aberahame a beela dikwanyana tse di namagatsana di supa fa thoko.

²⁹ Abimeleke a raya Aberahame a re: “Kana dikwanyana tse di namagatsana tse di supang, tse o di beileng di le tsosi, di kaya eng?”

³⁰ A re: “Dikwanyana tse di namagatsana tse di supang tse, o di tseye mo seatleng sa me, gore e nne sesupo sa me fa ke epile sediba se.”

³¹ Ke gone ka moo felo foo a go raya leina a re, Beerešeba, ka gobo ba ikanalanye boo babedi.

³² Jalo ba dira kgolagano mo Beerešeba; Abimeleke a nanoga le Pikole molaodi wa ntwa ya gagwe, ba boela kwa lefatsheng la Bafilisitia.

³³ Aberahame a tlhoma setlhare sa motamariseka mo Beerešeba; le gone leina la ga Jehofa, “Modimo o o sa khutleng”, a le bitsa gone.

³⁴ Aberahame a nna a jaka mo lefatsheng la Bafilisitia ka malatsi a le mantsi.

22

¹ Ga dirala ya re morago ga dilo tse, Modimo wa leka Aberahame, wa mo raya wa re: “Aberahame!” A araba a re: “Ke fano.”

² Wa re: “Tsaya morwao jaana, morwao yo o esi, yo o mo ratang, e bong Isake, o ye kwa lefatsheng la Moria, o mo dire tshupelo ya phiso gone, mo thabeng nngwe e ke tlaa e go bolelelang.”

³ Aberahame a phakela ka moso, a belesa esela ya gagwe, a ba a tsaya makau a gagwe a le mabedi, le Isake morwawe; a fatsetsa tshupelo ya phiso dikgong, a nanoga a ya felong kwa Modimo o go mmoleletseng.

⁴ Ya re ka letsatsi la boraro Aberahame a tsholetsa matlho a gagwe, a bona felo foo kwa kgakala.

⁵ Aberahame a raya makau a gagwe a re: “Salang fa le esela. Nna le mosimane re tlaa ya fale; re tlaa obama, re ba re boela kwano go lona.”

⁶ Aberahame a tsaya dikgong tsa tshupelo ya phiso, a di baya mo go Isake morwawe; a tsaya molelo ka seatla sa gagwe, le thipa; ba tsamaya mmogo boo babedi.

⁷ Isake a bua le Aberahame rraagwe a re: “Rra!” A re: “Ke fano, morwaaka.” A re: “Bona, molelo ke o, le dikgong; mme kwanyana ya tshupelo ya phiso e kae?”

⁸ Aberahame a re: “Morwaaka, Modimo o tlaa ipatlela kwanyana ya tshupelo ya phiso.” Jalo ba tsamaya mmogo boo babedi.

⁹ Ba tla ba fitlha felong kwa Modimo o go mmoleletseng. Aberahame a aga sebeso gone, a rulaganya dikgong, a golega Isake morwawe, a mmaya mo sebesong mo godimo ga dikgong.

¹⁰ Aberahame a ntsha letsogo a tsaya thipa, a re o bolaya morwawe,

¹¹ mme moengele wa ga Jehofa a mmitsa a le kwa legodimong a re: “Aberahame, Aberahame!” A re: “Ke fano.”

¹² A re: “O se ka wa baya mosimane seatla sa gago, le gone o se ka wa mo dira sepe; ka jaanong ke a itse fa o boifa Modimo, ka e le fa o se ka wa gana ka morwao yo o esi, fa ke mo tsaya.”

¹³ Aberahame a tsholetsa matlho a gagwe a leba, a bona, fa morago ga gagwe ga bo go le phelefu, e tshwerwe ka dinaka mo sekgweng. Aberahame a ya a tsaya phelefu, a e isa tshupelo ya phiso mo boemong jwa ga morwawe.

¹⁴ Aberahame a raya felo foo leina a re, Monei; jaaka go tle go buiwe le gompieno go twe, “Mo thabeng ya ga Jehofa-o-a-naya”.

¹⁵ Moengele wa ga Jehofa a bitsa Aberahame lwa bobedi a le kwa legodimong a re:

¹⁶ “Ke ikanne ka nna ka nosi, go bua Jehofa, ka o dirile selo se, wa se ka wa gana ka morwao yo o esi,

¹⁷ ke tlaa go segofatsa, ke ntsifatsa losika lwa gago jaaka dinaledi tsa legodimo, le jaaka mošawa o o mo dintshing tsa lewatle. Losika lwa gago lo tlaa rua kgoro ya metse ya baba ba lona.

¹⁸ Merafe yotlhe ya lefatshe e tlaa segofala mo losikeng lwa gago, ka o utlwile lentswe la me.”

¹⁹ Jalo Aberahame a boela kwa makaung a gagwe, ba nanoga ba tsamaya mmogo ba ya Beerešeba. Mme Aberahame a aga mo Beerešeba.

²⁰ Ya re morago ga dilo tse Aberahame a bolelelwa ga twe: “Bonang, Mileka le ene o bonye bana le Nahore, monnao.

²¹ Use, wa ntlha wa gagwe, le Buse monnawe, le Kemuele rra Arame,

²² le Kesete, le Haso, le Piletaše, le Jitelafe, le Bethuele.”

²³ Bethuele a tshola Rebeka. Ba ba ferang mebedi ba, Mileka a ba bona le Nahore, monnaa Aberahame.

²⁴ Mogadingwana wa gagwe, yo leina la gagwe go tweng Reuma, le ene a bona Teba, le Gahame, le Tahaše, le Maaka.

23

¹ Botshelo jwa ga Sara e ne e le dinyaga di le 127; e ne e le tsone dinyaga tsa botshelo jwa ga Sara.

² Sara a swela mo Kiriathe-areba, ke gore, Heberone, mo lefatsheng la Kanana. Aberahame a hutsafalela Sara le go mo lelela.

³ Aberahame a tswa fa pele ga moswi wa gagwe, a bua le bana ba ga Hethe, a re:

⁴ “Ke moeng le mojaki fela mo go lona. Nnayang felo ga phitlhelo mo go lona, e nne ga me, gore ke fitlhe moswi wa me, ke mo tlose mo matlhong a me.”

⁵ Bana ba ga Hethe ba fetola Aberahame ba mo raya ba re:

⁶ “Re utlwile morena wa me. O kgosana e kgolo thata mo go rona. Fitlha moswi wa gago mo go e e leng ntle ya diphupu tsa rona, fitlha moswi wa gago. Ga go na ope mo go rona yo o tlaa ganang ka phupu ya gagwe fa o e tsaya, gore o tle o fitlhe moswi wa gago.”

⁷ Aberahame a ema a ikobela beng ba lefatshe, e bong bana ba ga Hethe.

⁸ A bua nabo a re: “Fa e le go rata ga lona gore ke fitlhe moswi wa me, ke mo tlose mo matlhong a me, lo nkutlwe, lo nthapelele mo go Eferone, morwa Sohare,

⁹ gore a nneye logaga lwa Makapela, lo o nang nalo, lo lo fa sekhutlong sa sebata sa naga ya gagwe. A lo nneye ka tlhwatlhwa e e tshwanetseng, a dire mo ga lona, gore e nne felo ga me ga phitlhelo.”

¹⁰ Eferone a bo a dutse mo gare ga bana ba ga Hethe. Eferone wa Mohite a fetola Aberahame mo kutlong ya bana ba ga Hethe, e bong botlhe ba ba tsenang ka kgoro ya motse wa gagwe,

¹¹ a re: “Nyaa, morena wa me, o nkutlwe. Sebata sa naga ke a se go naya, le logaga lo lo mo go sone ke a lo go naya, fa pele ga bomorwa batho ba gaetsho ke a go go naya. Fitlha moswi wa gago.”

¹² Aberahame a ikoba fa pele ga batho ba lefatshe.

¹³ A bua le Eforone mo kutlong ya batho ba lefatshe a re: “Fa o rata, ke a go rapela, o nkutlwe. Ke tlaa go naya tlhwatlhwa ya sebata sa naga; e tseye mo go nna, mme ke tlaa fitlha moswi wa me gone.”

¹⁴ Eferone a fetola Aberahame a mo raya a re:

¹⁵ “Morena wa me, a ko o nkutlwe; kana sebata sa lefatshe se se lekanyweng ke dipapetla tsa selefera di le 400, e bo e le eng fa gare ga me nao? Ka re, fitlha moswi wa gago fela.”

¹⁶ Aberahame a utlwa Eferone; Aberahame a lekanyetsa Eferone selefera e o e badileng mo kutlong ya bana ba ga Hethe, dipapetla di le 400 tsa selefera, e le madi a a neng a tle a dumalanwe ke barekisi.

¹⁷ Jalo sebata sa naga ya ga Eferone se se mo Makapela, se se potileng Mamere ka kwano, go le sebata sa naga, le logaga lo lo mo go sone, le ditlhare tsotlhe tse di mo sebateng seo sa naga, le tse di mo molelwaneng tikologong ya sone, tsa tlhomamisediwa.

¹⁸ Aberahame go nna boswa fa pele ga bana ba ga Hethe, fa pele ga botlhe ba ba tsenang ka kgoro ya motse wa gagwe.

¹⁹ Morago ga mo, Aberahame a fitlha Sara mosadi wa gagwe mo logageng lwa sebata sa naga ya Makapela, ka kwano ga Mamere, ke go re, Heberone, mo lefatsheng la Kanana.

²⁰ Sebata sa naga, le logaga lo lo mo go sone ga tlhomamisediwa Aberahame ke bana ba ga Hethe go nna felo ga phitlhelo.

24

¹ Aberahame o ne a tsofetse, a tsofetse ruri, mme Jehofa o ne a segofaditse Aberahame mo dilong tsotlhe.

² Aberahame a raya motlhanka wa gagwe, mogolwane wa ntlo ya gagwe yo o laolang tsotlhe tse o nang natso a re: “Ke a go rapela, baya seatla sa gago se segolo fa tlase ga serope sa me,

³ gore o ikane ka Jehofa Modimo wa legodimo, le Modimo wa lefatshe, fa o se ketla o tseisa morwaake mosadi wa bomorwadia Bakanana ba ke agileng mo go bone;

⁴ mme o tlaa ya kwa lefatsheng la gaetsho, le kwa go ba e leng ba gaetsho, o ya go tseisa morwaake Isake mosadi gone.”

⁵ Motlhanka a mo raya a re: “E tlaa re gongwe mosadi a se ke a rate go ntshala morago go tla kwano lefatsheng leno? A e tlaa bo e le gore ke be ke ise morwao kwa lefatsheng le o tswang kwa go lone?”

⁶ Aberahame a mo raya a re: “O itise gore o se ka wa ba wa isa morwaake gone.

⁷ Jehofa Modimo wa legodimo, yo o nntshitseng mo ntlong ya ga rre le mo lefatsheng la botsalelo jwa me, yo o bileng a bua le nna, a ba a inkanela a re: ‘Lefatshe le, ke tlaa le naya losika lwa gago,’ ene o tlaa roma moengele wa gagwe fa pele ga gago, o tlaa tseisa morwaake mosadi wa gone.

⁸ E tlaa re fa mosadi a sa rate go go sala morago, foo o tlaa bo o gololesegile mo maikanong a; fa e se gore, o se ka wa ba wa isa morwaake gone, ke gone gosi fela.”

⁹ Motlhanka a baya seatla sa gagwe fa tlase ga serope sa ga Aberahame, mong wa gagwe, a mo ikanela mabapi le kopo e.

¹⁰ Motlhanka a tsaya dikamela di le some mo dikameleng tsa mong wa gagwe, a tsamaya. A bo a tshotse dilo dingwe tse dintle tsa tsotlhe tsa mong wa gagwe mo seatleng; a nanoga a ya kwa Mesopotamia, kwa motseng wa ga Nahore.

¹¹ A khubamisa dikamela ka mangole ka fa ntle ga motse, fa sedibeng sa metsi go le lobaka lwa maitseboa, e le lwa basadi go ya go ga metsi.

¹² A re: “Jehofa, Modimo wa ga mongwake Aberahame, ke a go rapela, o ntlisetse letlhogonolo gompieno, o bo o supetse mongwake Aberahame pelonomi.

¹³ Bona, ke eme fa motsweding wa metsi, bomorwadia banna ba motse ba tla go ga metsi.

¹⁴ A go dirafale gore morweetsana yo ke tlaa mo rayang ke re: ‘Ke a go rapela, a ko o sekege nkgwana ya gago gore ke nwe,’ mme fa a tlaa re: ‘Nwa, le dikamela tsa gago ke tlaa di nosa,’ ene yoo, e nne ene yo o mo laoletseng motlhanka wa gago Isake; ke tlaa bo ke itse ka mo fa o supeditse mongwake pelonomi.”

¹⁵ Ga dirala ya re a ise a swetse go bua, bona, Rebeka a tswa, ene yo o tsetsweng ke Bethuele morwa Mileka, mosadi wa ga Nahore, monnaa Aberahame, a tswa a beile nkgwana ya gagwe mo legetleng.

¹⁶ Morweetsana a bo a le montle thata go lejwa, e le kgarebana, le gone a ise a itsiwe ke monna ope. A fologela mo motsweding, a gelela nkgwana ya gagwe, a ba a tlhatloga.

¹⁷ Motlhanka a siana a ya go mo kgatlhantsha a re: “Ke a go rapela, a ko o nnose metsinyana mo nkgwaneng ya gago.”

¹⁸ Ene a re: “Nwa, morena wa me.” A akofa a rolela nkgwana ya gagwe mo seatleng, a mo nosa.

¹⁹ E rile a sena go swetsa go mo nosa a re: “Le dikamela tsa gago ke tlaa di gelelela di tsamaye di sweditse go nwa.”

²⁰ A akofa a tshela a nkgwana mo mokorong, a sianela gape kwa sedibeng go ga, a gelelela dikamela tsotlhe tsa gagwe.

²¹ Monna yo a mo tlhoma matlho thata; a itidimalela fela, gore a itse boo Jehofa a tlhogonolofaditse loeto lwa gagwe kgotsa nnyaa.

²² Ga dirala ya re dikamela di sena go nwa, monna a tsaya lenyena la gouta le le bokete jwa dikerame di le 5,5, le maseka a le mabedi a mabogo a le bokete jwa dikerame di le 110 tsa gouta.

²³ A re: “O morwadia mang? Ke a go rapela, mpolelela; a go na le bonno mo ntlong ya ga rraago gore re lale gone?”

²⁴ A mo raya a re: “Ke morwadia Bethuele, morwa Mileka, yo o mmonyeng le Nahore.”

²⁵ A fela a mo raya a re: “Re na le lotlhaka le dijo tse di lekanyeng, le bonno jwa go lala.”

²⁶ Monna a inamisa tlhogo a obamela Jehofa.

²⁷ A re: “A go bakwe Jehofa Modimo wa ga Aberahame mongwake, yo o sa latlhang kutlwelo botlhoko ya gagwe le boammaaruri jwa gagwe ka ga mongwake. Ka ga me, Jehofa o nkgogetse mo tseleng e e tlang mo ntlong ya bana ba ga rraagwe mongwake.”

²⁸ Morweetsana a siana a ya a bolelela ba ntlo ya ga mmaagwe ka fa mafokong a.

²⁹ Rebeka a bo a na le kgaitsadie, leina la gagwe go twe Labane. Mme Labane a sianela kwa monneng yole kwa motsweding.

³⁰ Labane o ne a bonye lenyena, le maseka a mabogo a ga kgaitsadie, a bile a utlwile mafoko a ga Rebeka kgaitsadie a re, monna yo o ntheile jaana le jaana. A tla mo monneng, mme bona, a bo a eme le dikamela fa motsweding.

³¹ A re: “Tsena, wena mosegofadiwa wa ga Jehofa! O emetseng fa ntle? Gonne ke baakantse ntlo le bonno jwa dikamela.”

³² Monna yo a tsena mo ntlong. Labane a belesolola dikamela, a mo naya lotlhaka le dijo tsa dikamela, le metsi a go tlhapa dinao tsa gagwe, le dinao tsa banna ba o nang nabo.

³³ Ga bewa dijo fa pele ga gagwe gore a je, mme a re: “Ga nketla ke e ja ke ise ke bolele se ke se tletseng.” Labane a mo raya a re. “Bolela.”

³⁴ A re: “Ke motlhanka wa ga Aberahame.

³⁵ Jehofa o segofaditse mongwake thata, a ba a tla a nna mogolo; o mo neile matsomane, matlhape, selefera, gouta, batlhanka, malata, dikamela le diesela.

³⁶ Sara, mosadi wa ga mongwake o rile a tsofetse a bona ngwana wa mosimane le mongwake. Ene o mo neile dilo tsotlhe tse o nang natso.

³⁷ Mongwake a inkanisa a re: ‘O se ka wa tseisa morwaake mosadi mo go bomorwadia Bakanana ba lefatshe le ke agileng mo go lone.

³⁸ O ye kwa ntlong ya ga rre, le kwa go bagaetsho, o ye go tseisa morwaake mosadi gone.’

³⁹ Ka raya mongwake ka re: ‘E tlaa re gongwe mosadi a se ke a rate go ntshala morago.’

⁴⁰ A nthaya a re: ‘Jehofa yo ke sepelang fa pele ga gagwe, o tlaa roma moengele wa gagwe go ya nao, a tlhogonolofatsa mosepele wa gago. O tlaa tseisa morwaake mosadi mo go bagaetsho, le mo go ba ntlo ya ga rre.

⁴¹ Foo o tlaa bo o gololesegile mo maikanong a me fa o fitlha mo go bagaetsho; e tlaa re fa ba se ka ba mo go neela, o tlaa bo o gololesegile mo maikanong a me.’

⁴² “Ke fitlhile gompieno kwa motsweding ka re: ‘Jehofa, Modimo wa ga mongwake Aberahame, a e re fa jaana o tlhogonolofatsa mosepele wa me o ke o tsamayang,

⁴³ bona, ke eme fa motsweding wa metsi; a go dirale gore, morweetsana yo o tlaa tlang go ga, yo ke tlaa mo rayang ke re: “Ke a go rapela, o nnose metsinyana mo nkgwaneng ya gago;”

⁴⁴ fa ene a tla a nthaya a re: “Go le wena nwa, le gone ke tlaa gelelela dikamela tsa gago,” a e nne mosadi yo Jehofa o mo laoletseng morwa mongwake.’

⁴⁵ “E rile ke ise ke swetse go bua mo pelong ya me, bona, Rebeka a tswa a beile nkgwana mo legetleng la gagwe, a fologela mo motsweding, a ga. Ka mo raya ka re: ‘Ke a go rapela, mma ke nwe.’

⁴⁶ A akofa a rola nkgwana mo legetleng la gagwe a re: ‘Nwa, ke tlaa ba ke nosa dikamela tsa gago le tsone.’ Jalo ka nwa, a ba a nosa dikamela le tsone.

⁴⁷ Ka mmotsa ka re: ‘O morwadia mang?’ Mme a re: ‘Ke morwadia Bethuele, morwa Nahore, yo Mileka o mmonyeng nae.’ Ka mo rwesa lenyena mo nkong ya gagwe le maseka mo mabogong a gagwe.

⁴⁸ Ka inamisa tlhogo ka obamela Jehofa. Ka baka Jehofa, Modimo wa ga mongwake Aberahame, yo o nkgogetseng mo tseleng e e siameng go tla ke tseisa morwa mongwake morwadia monnaa mongwake.

⁴⁹ Jaana, fa lo rata go direla mongwake ka pelonomi le boammaaruri, lo mpolelele; mme fa go sa nna jalo lo mpolelele; gore ke tle ke fapogele ka fa letsogong le le golo, kgotsa la molema.”

⁵⁰ Foo Labane le Bethuele ba mo fetola ba re: “Selo se se tswa mo go Jehofa; ga re kake ra bua nao se se bosula, kgotsa se se molemo.

⁵¹ Bona, Rebeka ke yo, o fa pele ga gago, mo tseye o tsamaye, a a nne mosadi wa morwa mong wa gago, jaaka Jehofa a buile.”

⁵² Ga dirala, ya re motlhanka wa ga Aberahame a utlwa mafoko a bone, a inamela fa fatshe fa pele ga Jehofa.

⁵³ Motlhanka a ntsha mekgabo ya selefera le mekgabo ya gouta, le diaparo, a di naya Rebeka. A ba a naya kgaitsadie le mmaagwe dilo tse di tlhokegang.

⁵⁴ Ba a ja, ba a nwa, ene le banna ba o nang nabo, ba lala gone ba tsoga ka moso. Ke fa ene a re: “Nnayang tsela gore ke ye kwa go mongwake.”

⁵⁵ Kgaitsadie le mmaagwe ba re: “A morweetsana a tlhole malatsi mangwe le rona le fa a ka ne a le some, morago ga moo o tlaa tsamaya.”

⁵⁶ Ene a ba raya a re: “Lo se ka lwa nkgoreletsa, etswa Jehofa a tlhogonolofaditse mosepele wa me. Nnayang tsela gore ke ye kwa go mongwake.”

⁵⁷ Ba re: “A re bitseng morweetsana re utlwe gore ene a reng.”

⁵⁸ Ba bitsa Rebeka ba mo raya ba re: “A o tlaa tsamaya le monna yo?” A re: “Ke tlaa tsamaya.”

⁵⁹ Ba naya Rebeka kgaitsadia bone tsela le mmelegi wa gagwe, le motlhanka wa ga Aberahame, le banna ba gagwe.

⁶⁰ Ba segofatsa Rebeka, ba mo raya ba re: “Kgaitsadia rona, o nne mma batho ba le makgolo a makgolo a mantsi! A losika lwa gago lo rue kgoro ya ba ba lo ilang.”

⁶¹ Rebeka a nanoga le barweetsana ba gagwe, ba pagama dikamela ba sala monna yo morago. Motlhanka yo a tsaya Rebeka a tsamaya.

⁶² Isake a bo a tla le tsela ya Beere-lahai-roi; gonne o ne a agile mo lefatsheng la Borwa.

⁶³ Isake a tswela kwa nageng go le maitseboa, a ya go tlhatlhanya, a tsholetsa matlho a gagwe, a leba mme bona, ga bo go tla dikamela.

⁶⁴ Rebeka le ene a tsholetsa matlho a gagwe a re a bona Isake, a pagologa kamela.

⁶⁵ A raya motlhanka a re: “Monna yo o tsamayang mo nageng a tla go re kgatlhantsha ke mang?” Motlhanka a re: “Ke mongwake.” A tsaya lesire a ipipa ka lone.

⁶⁶ Motlhanka a bolelela Isake dilo tsotlhe tse o di dirileng.

⁶⁷ Isake a mo isa mo mogopeng wa ga Sara, mmaagwe, mme a tsaya Rebeka a nna mosadi wa gagwe, a mo rata. Mme Isake a gomotsega morago ga loso lwa ga mmaagwe.

25

¹ Aberahame a tsaya mosadi yo mongwe, leina la gagwe go twe, Ketura.

² A bona nae Simerane, le Jokešane, le Metane le Midiane, le Išebake, la Shua.

³ Jokešane a tshola Sheba, le Detane. Bomorwa Detane e ne e le Ašurime, le Letušime, le Leumime.

⁴ Le bomorwa Midiane; e ne e le Efa, le Efere, le Hanoke, le Abita, le Eletaa. Botlhe bao e ne e le bana ba ga Ketura.

⁵ Aberahame a naya Isake tsotlhe tse o neng a na natso.

⁶ Bomorwa bagadingwana ba Aberahame o ne a na nabo, Aberahame a ba abela dineo, a ba tsamaisa ba tswa mo go Isake morwawe, ene a sa ntse a tshedile, mme ba ya ntlheng ya botlhabatsatsi, lefatsheng le le kwa botlhabatsatsi.

⁷ A, ke one malatsi a dinyaga tsa botshelo jwa ga Aberahame a sa ntse a tshedile, e bong dinyaga di le 175.

⁸ Aberahame a khutla, a swa a tsofetse sentle thata, e le monna mogolo, a tsamaile dingwaga; a phuthelwa kwa bathong ba ga gabo.

⁹ Bomorwawe Isake le Išemaele ba mo fitlha mo logageng lwa Makapela, mo sebateng sa naga se se potileng Mamere ka kwano, sa ga Eferone morwa Sohare wa Mohite;

¹⁰ e bong sebata sa naga se Aberahame o se rekileng mo baneng ba ga Hethe. Aberahame a fitlhwa gone le Sara mosadi wa gagwe.

¹¹ Mme ga dirala ya re morago ga loso lwa ga Aberahame Modimo wa segofatsa Isake morwawe. Mme Isake a aga fa Beere-lahai-roi.

¹² Jaana, tse ke tsone ditshika tsa ga Išemaele, morwa Aberahame, yo Hagare wa Moegepeto, lelata la ga Sara, o mmonyeng le Aberahame.

¹³ A, ke one maina a bomorwa Išemaele ka maina a bone, ka fa ditshikeng tsa bone; wa ntlha wa ga Išemaele ke Nebaiothe le Ketare, le Atebeele, le Mibesame,

¹⁴ le Mišema, le Duma, le Masa,

¹⁵ Hatate, le Tema, Jeture, Nafiše le Ketema.

¹⁶ Bao ke bomorwa Išemaele mme ao ke maina a bone, ka metsana ya bone, le ka mathibelelo a bone. Ke dikgosana di le 12 ka fa merafeng ya bone.

¹⁷ Tse, ke tsone dinyaga tsa botshelo jwa ga Išemaele, dinyaga di le 137. Mme a khutla, a swa: a phuthelwa kwa bathong ba ga gabo.

¹⁸ Ba aga ba simolola kwa Hafila ba ya go fitlha kwa Sure o o potileng Egepeto ka kwano, fa go iwa kwa Asiria. A nna a lebaganye le bana botlhe ba ga rraagwe.

¹⁹ Tse, ke tsone ditshika tsa ga Isake, morwa Aberahame; Aberahame a tshola Isake.

²⁰ Isake a ba a le dinyaga di 40 fa a tsaya Rebeka, morwadia Bethuele wa Mosiria, wa kwa Patanaarame, kgaitsadia Labane wa Mosiria go nna mosadi wa gagwe.

²¹ Isake a rapelela mosadi wa gagwe thata mo go Jehofa ka a le moopa. Jehofa a rapelesega, Rebeka mosadi wa gagwe a nna moimana.

²² Bana ba farakana mo teng ga gagwe; a re: “Fa go nna jaana ke a bo ke tshelelang?” A ya go botsa Jehofa.

²³ Jehofa a mo raya, a re: “Merafe e le mebedi e mo sebopelong sa gago. Ditšhaba di le pedi di tlaa kgaogana di tswa mo mpeng ya gago. Tšhaba nngwe e tlaa nna thata bogolo go tšhaba e nngwe. Yo mogolo o tlaa direla yo mmotlana.”

²⁴ E rile malatsi a gagwe a go belega a sena go fitlha, bonang, ga bo go le bana ba mafatlha mo sebopelong sa gagwe.

²⁵ Wa ntlha a tswa a le mohibidu gotlhe fela jaaka seaparo se se bobowa; ba mo raya leina ba re: Esau.

²⁶ Morago ga mo ga tswa monnawe; seatla sa gagwe sa bo se tshwere serethe sa ga Esau; leina la gagwe la bidiwa Jakobe. Isake a bo a le dinyaga di 60 fa mogatse a ba bona.

²⁷ Basimane ba thuthuga, Esau a nna motsomi yo o tlhoko, e le monna wa naga. Jakobe a bo a le monna yo o bori, a nna mo megopeng.

²⁸ Jaana Isake a rata Esau; ka a ne a tle a je nama ya diphologolo tsa gagwe, Rebeka a rata Jakobe.

²⁹ Jakobe a apaya dikgobe; Esau a tsena a tswa nageng, a bo a lapile.

³⁰ Esau a raya Jakobe a re: “Ke a go rapela, o mphe bohibidu joo; gonne ke lapile.” Ke gone ka moo leina la gagwe le biditsweng Etome, ke go re, Bohibidu.

³¹ Jakobe a re: “Mma ke reke gompieno botsalwapele jwa gago.”

³² Esau a re: “Bona, ke mo losong fela, botsalwapele bo tlaa nthusang?”

³³ Jakobe a re: “Inkanele pele.” Mme a mo ikanela, a rekisa botsalwapele jwa gagwe mo go Jakobe.

³⁴ Jakobe a fa Esau senkgwe le dikgobe tsa dinawa. A ja a nwa; a nanoga a tsamaya. Jalo Esau a nyatsa botsalwapele jwa gagwe.

26

¹ Ga nna leuba mo lefatsheng, morago ga leuba la ntlha le le kileng la nna mo metlheng ya ga Aberahame. Isake a ya kwa go Abimeleke, kgosi ya Bafilisitia kwa Gerare.

² Jehofa a bonala kwa go ene a re: “Se fologele kwa Egepeto; aga mo lefatsheng le ke tlaa le go bolelelang.

³ O nne o jake mo lefatsheng le, ke tlaa nna nao, ke go segofatsa; gonne mafatshe otlhe a, ke tlaa a naya wena le losika lwa gago. Ke tlaa tlhomamisa maikano a ke a ikanetseng Aberahame rraago.

⁴ Ke tlaa ntsifatsa losika lwa gago jaaka dinaledi tsa legodimo, ke ba ke naya losika lwa gago mafatshe a otlhe fela. Merafe yotlhe ya lefatshe e tlaa segofala mo losikeng lwa gago,

⁵ ka gobo Aberahame a ne a utlwa lentswe la me a boloka kaelo ya me, ditaolo tsa me, ditayo tsa me, le melao ya me.”

⁶ Isake a aga mo Gerare.

⁷ Banna ba felo foo ba mmotsa ka ga mosadi wa gagwe, mme a re: “Ke kgaitsadiake,” ka a boifa go re: “Ke mosadi wa me” gonne a re: “E tlaa re gongwe banna ba felo fa ba mpolaye ka ntlha ya ga Rebeka,” ka a ne a le montle go lejwa.

⁸ Mme ga dirala ya re a sena go nna gone ka lobaka lo loleele, Abimeleke kgosi ya Bafilisitia a okomela ka fensetere, a leba, a bona Isake a tshameka le Rebeka mosadi wa gagwe.

⁹ Abimeleke a bitsa Isake a re: “Bona, ruri ke mosadi wa gago! O ne o bua jang o re: ‘Ke kgaitsadiake’?” Isake a mo raya a re: “E ne e le ka gobo ke re: ‘E ka re gongwe ka swa ka ntlha ya gagwe.’ ”

¹⁰ Abimeleke a re: “Seo se o se re diretseng ke eng? Motho mongwe o ka bo a letse le mosadi wa gago a sa gopola sepe, o ka bo e le fano o re tshwarisitse molato.”

¹¹ Abimeleke a laya batho botlhe a re: “Yo o amang monna yo le fa e le mosadi wa gagwe, ruri o tlaa bolawa.”

¹² Isake a lema mo lefatsheng leo, kgetsi ya peo ya mmusetsa dikgetsi di le lekgolo mo thobong ya ngwaga oo, mme Jehofa a mo segofatsa.

¹³ Monna yo, a nna mogolo, a nna a humela pele a ba a tla a nna mogolo thata.

¹⁴ A na le dithuo tsa matsomane le dithuo tsa matlhape, le batho ba lolwapa ba le bantsi, mme Bafilisitia ba mo fufegela.

¹⁵ Mme jaana didiba tsotlhe tse batlhanka ba ga rraagwe ba kileng ba di epa mo metlheng ya ga Aberahame rraagwe, Bafilisitia ba di katela ka mmu.

¹⁶ Abimeleke a raya Isake a re: “Tswa mo go rona, gonne o nonofile bogolo go rona.”

¹⁷ Isake a huduga gone a thibelela mo mokgatšheng wa Gerare, a aga gone.

¹⁸ Isake a katolola didiba tsa metsi tse ba di epileng mo metlheng ya ga Aberahame rraagwe; gonne Bafilisitia ba ne ba di katetse morago ga loso lwa ga Aberahame; a di raya maina ka fa maineng a rraagwe o a di reileng.

¹⁹ Batlhanka ba ga Isake ba epa sediba mo mokgatšheng, ba phunya motswedi wa metsi a a elang gone.

²⁰ Badisa ba Gerare ba lwa le badisa ba ga Isake ba re: “Metsi ke a rona.” A raya leina la sediba a re: “Eseke,” ke go re: Kgang, gonne ba ganetsanya nae.

²¹ Ba epa sediba se sengwe; le sone ba se lwela; a se raya leina a re: “Sitena,” ke go re Bobaba.

²² A huduga gone a epa sediba se sengwe; sone ba se ka ba se lwela; a se raya leina a re: “Rehobothe,” ke gore Bonno, a re: “Ka gonne jaanong, Jehofa o re diretse bonno, re tlaa ata mo lefatsheng.”

²³ A tlhatloga gone a ya Beerešeba.

²⁴ Jehofa a bonala kwa go ene sigong joo, a re: “Ke nna Modimo wa ga Aberahame rraago; se boife, gonne ke na nao, ke tlaa go segofatsa, ke ntsifatsa losika lwa gago ka ntlha ya ga Aberahame motlhanka wa me.”

²⁵ A aga aletara gone, a bitsa leina la ga Jehofa, a ba a tlhoma mogope wa gagwe gone; le gone batlhanka ba ga Isake ba epa sediba gone.

²⁶ Foo Abimeleke a ya kwa go ene a tswa Gerare, a na le Ahusathe tsala ya gagwe, le Pikole molaodi wa ntwa ya gagwe.

²⁷ Isake a ba raya a re: “Lo tletseng kwano go nna e tswa lo nkila, lo ntelekile mo go lona?”

²⁸ Ba re: “Re bonye sentle fela fa Jehofa a nna nao; mme ra re, a jaana go nne maikano fa gare ga rona, e bong fa gare ga rona le wena; re dire kgolagano nao;

²⁹ ya gore, ga o ketla o re utlwisa botlhoko, jaaka le rona re senke re go ama; le jaaka re senke re go direla sepe fa e se molemo fela, ra go tsamaisa ka kagiso; jaanong o mosegofadiwa wa ga Jehofa.”

³⁰ A ba direla moletlo, ba a ja, ba a nwa.

³¹ Ya re ka moso ba tsoga go sa le gale, ba ikanalana; Isake a ba naya tsela ba, tsamaya ka kagiso.

³² Mme ga dirala ya re ka letsatsi leo, batlhanka ba ga Isake ba tla, ba mmolelela ka ga sediba se ba se epileng, ba mo raya ba re: “Re bonye metsi.”

³³ A se raya leina a re: “Sheba”. Ke gone ka moo le gompieno leina la motse oo go tweng Beerešeba.

³⁴ E rile Esau a le dinyaga di le 40 a tsaya mosadi go twe Judithe, morwadia Beeri wa Mohite, le Basemathe morwadia Elone wa Mohite.

³⁵ Basadi ba, ba utlwisa pelo ya ga Isake le ya ga Rebeka botlhoko jo bo galakang.

27

¹ E rile Isake a tsofetse, matlho a gagwe a le lotobo, a sa bone sentle, a bitsa Esau morwawe yo mogolo a mo raya a re: “Morwaaka!” A re: “Ke fano.”

² A re: “A ko o bone jaana, ke tsofetse, ga ke itse letsatsi la loso lwa me.

³ Jaana, ke a go rapela, ka re, tsaya dibolao tsa gago, mokotlopo wa gago le bora jwa gago, o tswele kwa nageng, o ntsomele phologolo.

⁴ O nkapeele dijo tse di monate, jaaka tse ke di ratang, o di lere kwano go nna gore ke je; gore mowa wa me o go segofatse ke ise ke swe.”

⁵ E rile Isake a bua le Esau morwawe, Rebeka a bo a utlwa. Esau a tswela kwa nageng a ya go tsoma phologolo le go e lere.

⁶ Rebeka a bua le Jakobe morwawe a re: “Bona, ke utlwile rraago a bua le Esau mogoloo, a re:

⁷ ‘Nteretse phologolo, o nkapeele dijo tse di monate, gore ke je, ke go segofatse fa pele ga Jehofa ke ise ke swe.’

⁸ Mme jaana, ka re, morwaaka, o utlwe lentswe la me ka fa ke tlaa go laolang ka gone.

⁹ Tloga jaana o ye letsomaneng, o ntlele dipotsane di le pedi tse dintle mo dipoding, mme ke tlaa di apela rraago dijo tse di monate, jaaka tse o di ratang.

¹⁰ O tlaa di isa kwa go rraago gore a je, gore a tle a go segofatse a ise a swe.”

¹¹ Jakobe a raya Rebeka mmaagwe a re: “Bona, mogolole Esau ke motho yo o bobowa, nna ke motho yo o borethe.

¹² E tlaa re gongwe rre a nkapaape mme ke nne mo go ene jaaka motsietsi, ke itlisetse khutso e seng tshegofatso.”

¹³ Mmaagwe a mo raya a re: “Phutso ya gago e nne mo go nna, morwaaka, utlwa lentswe la me le le losi fela, o ye o di ntlisetse.”

¹⁴ A ya, a di tshwara a di tlisa mo go mmaagwe; mmaagwe a apaya dijo tse di monate, jaaka tse rraagwe a di ratang.

¹⁵ Rebeka a tsaya diaparo tse dintle tsa ga Esau morwawe yo mogolo, tse a nang natso mo ntlong, a di apesa Jakobe morwawe yo mmotlana.

¹⁶ Le matlalo a dipotsane a a mo apesa mo mabogong le mo boretheng jwa thamo ya gagwe.

¹⁷ Dijo tse di monate tseo, le senkgwe se o se baakantseng, a di tsenya mo seatleng sa ga Jakobe morwawe.

¹⁸ A ya kwa go rraagwe a re: “Rra!” mme a re: “Ke fano, o mang ngwanaka?”

¹⁹ Jakobe a raya rraagwe a re: “Ke Esau, ngwana wa gago wa ntlha; ke dirile ka fa o ntheileng ka gone. Ke a go rapela, tsoga, o dule, o je phologolo ya me, gore mowa wa gago o ntshegofatse.”

²⁰ Isake a raya morwawe a re: “Go tlile jang, gore o bo o e bonye ka bonako jaana morwaaka?” A re: “Ke ka gonne Jehofa Modimo wa gago o nneile letlhogonolo.”

²¹ Isake a raya Jakobe a re: “Ke a go rapela, a ko o atamele morwaaka, gore ke go apaape boo o morwaake Esau tota kgotsa nnyaa.”

²² Jakobe a atamela Isake rraagwe; a mo apaapa a re: “Lentswe lone ke lentswe la ga Jakobe, mabogo ke a ga Esau.”

²³ A se ka a mo lemoga ka mabogo a gagwe a le bobowa jaaka mabogo a ga Esau mogolowe; jalo o mo segofatsa.

²⁴ A re: “A o morwaake Esau ka mmaanete?” Ene a re: “Ke nna.”

²⁵ A re: “E nkatametse ke je phologolo ya ga morwaake gore mowa wa me o go segofatse.” A e atametsa fa go ene, a ja, a ba a mo tlisetsa bojalwa jwa mofine a nwa.

²⁶ Isake rraagwe a mo raya a re: “Atamela jaana morwaaka, o nkatle.”

²⁷ A atamela, a mo atla, a dupa lonko lwa diaparo tsa gagwe, a mo segofatsa, a re: “Bona, lonko lwa ga morwaake lo ntse jaaka lwa naga e Jehofa o e segofaditseng.

²⁸ A Modimo o go neye monyo wa legodimo, le monono wa lefatshe, le letlotlo la mabele, le bojalwa jwa mofine.

²⁹ A ditšhaba di go direle, le merafe e go ikobele, o nne morena wa bana ba ga rraago, a bana ba ga mmaago ba go ikobele, go hutsiwe mongwe le mongwe yo o go hutsang, go nne sego mongwe le mongwe yo o go segofatsang.”

³⁰ Ya re Isake a sena go khutla go segofatsa Jakobe, a sa ntse a tswa fela fa pele ga Isake rraagwe, Esau mogolowe a tsena a tswa kwa letsomong.

³¹ Le ene a apaya dijo tse di monate, a di isa kwa go rraagwe; a raya rraagwe a re: “A rre a tsoge a je phologolo ya ga morwawe, gore mowa wa gago o ntshegofatse.”

³² Isake rraagwe a mo raya a re: “Wena o mang?” A re: “Ke morwao, ngwana wa ntlha wa gago, Esau.”

³³ Isake a roroma mo gogolo thata a re: “Fa e le jalo e ne e le mang yo o tshotseng phologolo a e tlisa mo go nna, ke bile ke jele gotlhe pele o ise o tle, mme ke mo segofaditse? Ee, o tlaa segofala.”

³⁴ E rile Esau a utlwa mafoko a ga rraagwe, a gala ka legalo le legolo le le botlhoko, a raya rraagwe a re: “Rra we! Ntshegofatsa, le nna o ntshegofatse.”

³⁵ A re: “Monnao o tsile ka boferefere, o go gapetse lesego.”

³⁶ A re: “A ga a a rewa leina sentle ga twe Jakobe, ka jaana a ntseetse boemo gabedi; a tsaya botsalo jwa ntlha jwa me; bona, gompieno o nkgapetse lesego la me.” A re: “A ga o a ntshadisetsa tshegofatso nngwe fela?”

³⁷ Isake a fetola Esau a mo raya a re: “Bona, ke mo dirile morena wa gago, bana ba ga rraagwe botlhe ke ba mo neile go nna batlhanka; ke mo otlile ka mabele le bojalwa jwa mofine; mme wena morwaaka ke a bo ke ka go direlang?”

³⁸ Esau a raya rraagwe a re: “Rra, a o na le tshegofatso e le nngwe fela? Rra we, ntshegofatsa le nna o ntshegofatse.” Esau a tsholetsa lentswe la gagwe a lela.

³⁹ Isake a mo fetola a mo raya a re: “Bona, bonno jwa gago bo tlaa katogana le monono wa lefatshe le monyo wa legodimo.

⁴⁰ O tlaa tshela ka tšhaka ya gago, o tlaa direla monnao; go tlaa dirala gore mogang o mo tsogologelang o tlaa tlosa jokwe ya gagwe mo thamong ya gago.”

⁴¹ Esau a ila Jakobe ka ntlha ya tshegofatso e rraagwe o mo segofaditseng ka yone. Esau a ithaya mo pelong a re: “Malatsi a go lelela rre a gaufi; foo ke tlaa bolaya Jakobe nnake.”

⁴² Mafoko a ga Esau morwawe yo mogolo a bolelelwa Rebeka, a roma a bitsa Jakobe morwawe yo mmotlana, a mo raya, a re: “Bona, mogoloo Esau o ikgomotsa ka ga gago, o ikaeletse go go bolaya.

⁴³ Ke gone jaana morwaaka, utlwa lentswe la me, o nanoge o tshabele kwa go Labane, kgaitsadiake kwa Harane.

⁴⁴ O tlhole nae malatsinyana mangwe go tle go tsamaye tšarafalo ya ga mogoloo e fete.

⁴⁵ Go tsamaye bogale jwa ga mogoloo bo boye mo go wena, a lebale se o se mo diretseng. Foo ke tlaa roma ke ya go go tsaya gone. Ana ke tlaa bo ke lo tloselediwang loo babedi ka letsatsi le le lengwe fela?”

⁴⁶ Rebeka a raya Isake a re: “Ke lapisitswe ke botshelo jwa me ka ntlha ya bomorwadia Hethe. Fa Jakobe a tsaya mosadi mo go bomorwadia Hethe, ba ba etsang ba, ba bomorwadia lefatshe le, botshelo jwa me bo tlaa nna le molemo wa eng mo go nna?”

28

¹ Isake a bitse Jakobe, a mo segofatsa, a mo laya a re: “O se ka wa tsaya mosadi wa bomorwadia Kanana.

² Nanoga o ye kwa Patanaarame, kwa ntlong ya ga Bethuele rra mmaago; o tseye mosadi gone wa bomorwadia Labane, kgaitsadia mmaago.

³ A Modimo Mothatayotlhe o go segofatse, o go atise, o go ntsifatse gore o tle o nne lesomo la ditšhaba.

⁴ O go neye lesego la ga Aberahame le losika lwa gago nao; gore o tle o rue lefatshe la majako a gago, le Modimo o le neileng Aberahame.”

⁵ Isake a naya Jakobe tsela a ya Patanaarame, kwa go Labane morwa Bethuele wa Mosiria, kgaitsadia Rebeka, mma Jakobe le Esau.

⁶ Jaana Esau a bona fa Isake a segofaditse Jakobe, a bile a mo neile tsela go ya Patanaarame gore a tseye mosadi gone, le jaaka a re a mo segofatsa a mo laya, a re: “O se ka wa tsaya mosadi wa bomorwadia Kanana;”

⁷ le gone fa Jakobe a utlwile rraagwe le mmaagwe a ile Patanaarame.

⁸ Esau a ba a bona fa bomorwadia Kanana ba sa kgatlhe rraagwe Isake.

⁹ Foo Esau a ya kwa go Išemaele, a oketsa basadi ba a nang nabo ka go tsaya Mahalathe morwadia Išemaele, morwa Aberahame, kgaitsadia Nebaiothe, go nna mosadi wa gagwe.

¹⁰ Jakobe a tswa mo Beerešeba, a leba kwa Harane.

¹¹ A wela felo gongwe, a lala gone, ka gobo letsatsi le ne le phirimile. A tsaya lentswe lengwe la felo foo a le sama, a robala.

¹² A lora, mme bonang, ga bo go tlhomilwe sepalamo fa fatshe, setlhoa sa sone se fitlha kwa legodimong; mme bonang; ga bo go tlhatloga go bo go fologa baengele ba Modimo ka sone.

¹³ Mme bonang, Jehofa a bo a eme fa godimo ga sone a re: “Ke nna Jehofa Modimo wa ga Aberahame rraago, le Modimo wa ga Isake. Lefatshe le o letseng mo go lone ke tlaa le naya wena, le losika lwa gago.

¹⁴ Losika lwa gago lo tlaa nna jaaka lorole lwa lefatshe, o tlaa anamela kwa bophirimatsatsi, le kwa botlhabatsatsi, le kwa botsheka, le kwa borwa; mo go wena le mo losikeng lwa gago ditshika tsotlhe tsa lefatshe di tlaa segofala.

¹⁵ Bona, ke na nao, ke tlaa go boloka kwa le kwa o yang gone, ke ba ke go lere gape mo lefatsheng le; gonne ga nketla ke go tlogela go tle go tsamaye ke dire se ke se buileng nao.”

¹⁶ Jakobe a thanya mo borokong jwa gagwe a re: “A bo Jehofa a le felong fano! mme ke ne ke sa itse.”

¹⁷ A boifa a re: “Kana felo fano go boitshega jang! Ga se gope go sele fa e se ntlo ya Modimo fela; fano ke mojako wa legodimo.”

¹⁸ Jakobe a phakela ka moso a tsaya lentswe le o letseng a le samile a le tlhoma go nna segopotso, a ba a thela lookwane mo godimo ga lone.

¹⁹ Mme a raya leina la felo foo a re: “Bethele,” mme leina la motse gale go ne go twe Luse.

²⁰ Jakobe a itlama ka maikano a re: “E tlaa re fa Modimo o nna le nna, fa o mpoloka mo tseleng e ke e tsamayang, o nnaya dijo go ja le diaparo go apara,

²¹ gore ke be ke boele ntlong ya ga rre ka kagiso, foo Jehofa o tlaa nna Modimo wa me.

²² Lentswe le ke le tlhomileng motloutlo le tlaa nna ntlo ya Modimo; mo go tsotlhe tse o tlaa di nnayang, ruri ke tlaa go naya sa bosome.”

29

¹ Jakobe a tswelela mo loetong lwa gagwe, a fitlha mo lefatsheng la bana ba botlhabatsatsi.

² A leba, mme bonang, ga bo go le sediba mo nageng; mme bonang ga bo go bothile matsomane a le mararo a dinku fa go sone; gonne ba ne ba tle ba gelelele matsomane mo sedibeng seo. Letlapa le le mo molomong wa sediba la bo le le legolo.

³ Matsomane otlhe a ne a tle a phuthegele foo, mme ba pitike letlapa ba le tlose mo molomong wa sediba ba gelelele dinku, mme ba itse go ba ba baya letlapa mo bonnong jwa lone mo molomong wa sediba.

⁴ Jakobe a ba raya a re: “Bagaetsho, lo ba kae?” Ba re: “Re ba Harane.”

⁵ A ba raya a re: “A lo itse Labane morwa Nahore?” Ba re: “Re a mo itse.”

⁶ A ba raya a re: “A o tshedile sentle?” Ba re: “O tshedile sentle; bona, Ragele morwadie o etla, o tla le dinku.”

⁷ A re: “Bona, go sa le motshegare ga e ise e nne lobaka lwa go phutha dikgomo; gelelelang dinku lo tsamaye lo ye go di fudisa.”

⁸ Ba re: “Ga re ka ke ra dira jalo matsomane a ise a phuthege, ba pitike letlapa mo molomong wa sediba; e be e le gone re gelelelang dinku.”

⁹ A re a sa ntse a bua nabo Ragele a tla a na le dinku tsoo rraagwe; gonne e ne e le ene yo o di disang.

¹⁰ Ya re Jakobe a bona Ragele morwadia Labane, kgaitsadia mmaagwe, le dinku tsoo Labane kgaitsadia mmaagwe, Jakobe a atamela a pitika letlapa a le tlosa mo molomong wa sediba, a gelelela letsomane la ga Labane kgaitsadia mmaagwe.

¹¹ Jakobe a atla Ragele; a tsholetsa lentswe la gagwe a lela.

¹² Jakobe a bolelela Ragele fa a le oo rra rraagwe, fa a bile a le morwa Rebeka; morweetsana a siana a ya a bolelela rraagwe.

¹³ Ya re Labane a utlwa mafoko a ga Jakobe ngwana wa ga kgaitsadie a siana a ya go mo kgatlhantsha, a mo tlamparela, a mo atla, a mo tlisa kwa ntlong ya gagwe, a bolelela Labane dilo tse tsotlhe fela.

¹⁴ Labane a mo raya a re: “Ntla, o lesapo la me le nama ya me.” A tlhola nae lobaka lwa kgwedi.

¹⁵ Labane a raya Jakobe a re: “E re ka o le ngwana wa ga rre a ke gore o tshwanetse go ntirela fela o sa bone sepe ka foo? Mpolelela tlhe, go re maduo a gago a tlaa nna eng?”

¹⁶ Labane o ne a na le bana ba basetsane ba le babedi. Leina la yo mogolo go twe Lea, leina la yo mmotlana go twe Ragele.

¹⁷ Lea a bo a le matlho a bokowa; Ragele a le montle, a bopegile sentle.

¹⁸ Jakobe a rata Ragele; a re: “Ke tlaa go direla dinyaga di supa ka ntlha ya ga Ragele morwadio yo mmotlana.”

¹⁹ Labane a re: “Go molemo fa ke ka mo naya wena bogolo go go mo naya monna o sele; nna le nna.”

²⁰ Jakobe a direla Ragele dinyaga di supa; tsa nna mo go ene jaaka ekete ke malatsinyana fela, ka ntlha ya lorato lo a mo ratileng ka lone.

²¹ Jakobe a raya Labane a re: “Nnaya mosadi wa me, gonne malatsi a me a fetile, gore ke tsene kwa go ene.”

²² Labane a phutha batho botlhe ba felo foo, a dira modiro.

²³ Mme ga dirala ya re go le ka maitseboa a tsaya Lea morwadie, a mo isa kwa go ene, Jakobe a tsena kwa go ene.

²⁴ Labane a ntsha Silepa lelata la gagwe a mo naya Lea go nna lelata la gagwe.

²⁵ Ga dirala ya re ka moso, bonang, ya bo e le Lea; Jakobe a raya Labane a re: “Ke eng se o se ntiretseng? A ga ke a go direlela Ragele? Ke ka ntlha yang o ntsieditse jaana?”

²⁶ Labane a re: “Ga go ke go dirwa jalo mono ga rona go ntsha yo mmotlana pele ga yo mogolo.

²⁷ Swetsa beke ya yo, re tlaa go naya yo mongwe le ene, ka ntlha ya tiro e o tlaa ntirelang ka yone ka dinyaga tse dingwe di supa.”

²⁸ Jakobe a dira jalo, a swetsa beke ya gagwe; Labane a mo naya Ragele morwadie go nna mosadi wa gagwe.

²⁹ Labane a ntsha Bileha lelata la gagwe a mo naya Ragele go nna lelata la gagwe.

³⁰ Jakobe a tsena le kwa go ene Ragele, a bo a bile a rata Ragele bogolo go Lea, a dira nae dinyaga tse dingwe di supa.

³¹ Jehofa a bona fa Lea a ilwa, mme a bula sebopelo sa gagwe; Ragele a bo a le moopa.

³² Lea a nna moimana, a bona ngwana wa mosimane, a mo raya leina a re, Rubene; ka a re: “Ka gobo Jehofa o lebile patikego ya me; ka jaana monna wa me a tlaa nthata.”

³³ A nna moimana gape a bona ngwana wa mosimane; a re: “E re ka Jehofa a utlwile fa ke ilwa, ke gone ka moo o nneileng ngwana wa mosimane,” yo le ene a mo raya leina a re, Simeone.

³⁴ A nna moimana gape, a bona ngwana wa mosimane; a re: “Jaana gompieno monna wa me o tlaa kopanngwa le nna, gonne ke bonye bana ba basimane ba le bararo nae:” Ka moo leina la gagwe la rewa ga twe, Lefi.

³⁵ A nna moimana gape, a bona ngwana wa mosimane, mme a re: “Gompieno ke tlaa baka Jehofa;” ka gone moo a mo raya leina a re, Juta; mme a khutla go bona bana.

30

¹ E rile Ragele a bona fa a sa bone bana le Jakobe, Ragele a hufegela mogolowe; a raya Jakobe a re: “Nnaya bana; fa go sa nne jalo nkaa swa.”

² Bogale jwa ga Jakobe jwa tukela Ragele a re: “A ke mo boemong jwa Modimo o o go timileng loungo lwa sebopelo?”

³ A re: “Bona Bileha, lelata la me ke yo, tsena kwa go ene, mme o tlaa khubama a le mo mangoleng a me, gore ke tle ke bone bana ka ene.”

⁴ A mo naya Bileha lelata la gagwe go nna mosadi; Jakobe a tsena kwa go ene.

⁵ Bileha a nna moimana, a bona ngwana wa mosimane le Jakobe.

⁶ Ragele a re: “Modimo o nkatlholetse o bile o utlwile lentswe la me, o nneile ngwana wa mosimane;” ke gone ka moo a mo raya leina a re, Dane.

⁷ Bileha lelata la ga Ragele a nna moimana gape, a bona ngwana wa mosimane wa bobedi le Jakobe.

⁸ Ragele a re: “Ke sokasokanye le mogolole ka tshokatshokano tse dikgolo, mme ke fentse:” A raya ngwana leina a re, Nafetali.

⁹ E rile Lea a bona fa a khutlile go bona bana, a tsaya Silepa lelata la gagwe a mo naya Jakobe go nna mosadi wa gagwe.

¹⁰ Silepa lelata la ga Lea a bona ngwana wa mosimane le Jakobe.

¹¹ Lea a re: “A lesego!” A mo raya leina a re, Gate.

¹² Silepa lelata la ga Lea a bona ngwana wa mosimane wa bobedi le Jakobe.

¹³ Lea a re: “A bo ke le sego! gonne bana ba basetsana ba tlaa nthaya ba re, Ke sego!” A raya ngwana leina a re, Ašere.

¹⁴ E rile ka lobaka lwa thobo ya mabele Rubene a ya a bona ditholwana tsa meithatiso mo nageng, mme a di isa kwa go Lea mmaagwe. Foo Ragele a raya Lea a re: “Ke a go rapela, mpha ditholwana tsa ga morwao tsa meithatiso.”

¹⁵ A mo raya a re: “A ke selo se sennyennye fa o ntseetse monna wa me? Jaanong o rata go tsaya le tsone ditholwana tsa ga morwaake?” Ragele a re: “Jakobe o tlaa lala nao bosigo jono, fa o nnaya ditholwana tsa meithatiso tsa ga morwao.”

¹⁶ Jakobe a tswa kwa nageng go le maitseboa. Lea a tswa a ya go mo kgatlhantsha a re: “O na le go tsena kwa go nna, gonne ruri ke go thapile ka tuelo ya ditholwana tsa ga morwaake tsa meithatiso.” Mme a lala nae bosigo joo.

¹⁷ Modimo wa reetsa Lea, a nna moimana, a bona ngwana wa mosimane wa botlhano le Jakobe.

¹⁸ Lea a re: “Modimo o nneile tuelo ya me; ka gobo ke neile monna wa me lelata la me;” a raya ngwana leina a re, Isakare.

¹⁹ Lea a nna moimana gape a bona ngwana wa mosimane wa borataro le Jakobe.

²⁰ Lea a re: “Modimo o nketleeditse ka ketleetso e e molemo; jaanong monna wa me o tlaa aga le nna ka gobo ke bonye bana ba basimane ba le barataro nae;” a raya ngwana leina a re, Sebulone.

²¹ Morago a bona ngwana wa mosetsana, a mo raya leina a re, Dina.

²² Modimo wa gakologelwa Ragele, Modimo wa mo reetsa wa bula sebopelo sa gagwe.

²³ A nna moimana, a bona ngwana wa mosimane, a re: “Modimo o ntlositse kgobo.”

²⁴ A mo raya leina a re, Josefe, a re: “A Jehofa a nkokeletse ka mosimane yo mongwe.”

²⁵ Ga dirala e rile Ragele a sena go bona Josefe, Jakobe a raya Labane a re: “Nnaya tsela gore ke ye kwa gaetsho le kwa lefatsheng la gaetsho.

²⁶ Nthebolela basadi ba me le bana ba me ba ke ba go diretseng, ka ntlha ya bone, o mme ke tsamaye, gonne o itse tirelo ya me e ke go diretseng ka yone.”

²⁷ Labane a mo raya a re: “E re ka jaana ke bonye tsalano mo matlhong a gago, nama o sa ntse; gonne ke lemogile fa Jehofa a ntshegofaditse ka ntlha ya gago.”

²⁸ A re: “Ntlhaloganyetsa maduo a gago mme ke tlaa a go naya.”

²⁹ A mo raya a re: “O a itse ka fa ke go diretseng ka gone, le ka fa dikgomo tsa gago di ntseng tsa nna tsa tshela ka gone ke na natso.

³⁰ Gonne se e rileng ke tla wa bo o na naso se ne se le sebotlana, mme se kokotlegetse se ntse sentsintsi. Jehofa o go segofaditse gongwe le gongwe kwa ke ntseng ka menoga gone; jaana ntlo ya me le yone ke tlaa e batlela leng?”

³¹ A re: “Ke tlaa go naya eng?” Jakobe a re: “Se nneye sepe. E tlaa re fa o ntirela selo se jaana: ke tlaa ba ke hudisa letsomane la gago ke le disa.

³² Ke tlaa ralala letsomane lotlhe la gago gompieno ke tlosa tse di mmala o maragaraga le o o dibata, le tse dipirwana mo dinkung, le tse di mmala o dibata le o maragaraga mo dipoding; tse di ntseng jalo e tlaa nna tuelo ya me.

³³ Jalo tshiamo ya me e tlaa mphetolela mo motlheng o o tlang, fa o tla go bua ka ga tuelo ya me e le fa pele ga gago. Nngwe le nngwe e e seng mmala o dibata le fa e le o maragaraga mo dipoding, le e e seng pirwana mo dinkung, fa e bonwa mo go nna e tlaa kaiwa e utswilwe.”

³⁴ Labane a re: “Bona ke rata gore go nne ka fa lefokong la gago.”

³⁵ Ka tsatsi leo Labane a tlhaola diphoko tse dingolo, le tse di dibata le dipodi tse dinamagadi tsotlhe tse di mmala o maragaraga, le o o dibata, nngwe le nngwe e e nang le bosweu mo go tsone, le tse dipirwa tsotlhe mo dinkung, a di tsenya mo diatleng tsa bomorwawe.

³⁶ A baya sebaka sa loeto lwa malatsi a le mararo fa gare ga gagwe le Jakobe. Mme Jakobe a hudisa matsomane a a setseng a ga Labane.

³⁷ Jakobe a tsaya dithupa tse dinana tsa mopopelara le tsa thamane le tsa morolwane; a di khumolotsa methaladi, a bonatsa bosweu jo bo mo dithupeng.

³⁸ A tlhoma dithupa tse a di khumoloditseng go lebagana le matsomane mo meelong ya metsi, mo mekorong e matsomane a nwelang mo go yone; mme ya re a tsile go nwa a emere.

³⁹ Matsomane a emera fa pele ga dithupa, matsomane a tsala bongolwana le mmala o o maragaraga le o o dibata.

⁴⁰ Jakobe a tlhaola dikwanyana, a lebisa matsomane kwa go tse di mmala o mongolo le kwa go tse dipirwana tsotlhe mo letsomaneng la ga Labane. A beela matsomane a gagwe kwa thoko, a se ka a a tlhakanya le letsomane la ga Labane.

⁴¹ E ne e tle e re go emera tse di nonofileng bogolo go tse dingwe mo letsomaneng, Jakobe a beye dithupa fa pele ga matlho a matsomane mo meelong ya metsi, gore di tle di emere fa dithupeng.

⁴² E ne e tle e re fa letsomane le sa nonofa sentle a se ke a di beele dithupa; jalo tse di sa nonofang sentle e bo e le tsa ga Labane, mme tse di nonifileng e nne tsa ga Jakobe.

⁴³ Monna yo a huma mo go golo thata, a ba a nna le matsomane a magolo, le malata, le batlhanka, le dikamela, le diesela.

31

¹ A utlwa mafoko a bomorwa Labane jaaka ba re: “Jakobe o tshotse tsotlhe tse e neng e le tsoo rraetsho; khumo e yotlhe o e bonye ka se e neng e le sa ga rraetsho.”

² Jakobe a leba sefatlhogo sa ga Labane, mme bonang, sa bo se sa mo lebe jaaka gale.

³ Jehofa a raya Jakobe a re: “Boela kwa lefatsheng la borraago, le kwa go bagaeno; mme ke tlaa nna nao.”

⁴ Jakobe a roma a ya go bitsa Ragele le Lea gore ba tle kwa nageng kwa letsomaneng.

⁵ A ba raya a re: “Ke bona sefatlhogo sa ga rraeno gore ga se a nteba jaaka gale; Modimo wa ga rre o ntse o na le nna.

⁶ Lo a itse fa ke diretse rraeno ka thata ya me yotlhe fela.

⁷ Mme rraeno o ntsieditse o fetotse maduo a me gasome. Modimo ga o a ka wa mo leseletsa go nkutlwisa botlhoko.

⁸ E ne e tle e re fa a bua jaana a re: ‘Tse di mmala o maragaraga e tlaa nna maduo a gago;’ foo letsomane lotlhe le tsale tse di maragaraga; mme e re fa a re: ‘Tse dingolwana di tlaa nna maduo a gago,’ foo letsomane lotlhe le tsale bongolwana.

⁹ Jalo Modimo o tlositse dikgomo tsoo rraeno wa di nnaya.

¹⁰ “Ga dirala ya re lobaka lo letsomane le emerang ka lone, ka tsholetsa matlho a me, ka bona mo torong, mme bonang, diphoko tse di bekarang letsomane e le tse dingolo, le tse di maragaraga, le tse dithamaga.

¹¹ Moengele wa Modimo o ntheile mo torong a re: ‘Jakobe!’ mme ka re: ‘Ke fano.’

¹² A re: ‘Tsholetsa matlho a gago jaana o bone, diphoko tsotlhe tse di bekarang letsomane ke tse di ngolo, le tse di maragaraga, le tse di thamaga; gonne ke bonye tsotlhe tse Labane o di go direlang.

¹³ Ke nna Modimo wa Bethele, kwa o tloleditseng lentswe le o le tlhomileng gone, kwa o ikanetseng maikano gone. Jaanong nanoga o tswe mo fatsheng le, o boele kwa lefatsheng la botsalelo jwa gago.’ ”

¹⁴ Ragele le Lea ba mo fetola ba re: “A go sa ntse go na le kabelo nngwe le fa e le boswa bongwe mo ntlong ya ga rraetsho?

¹⁵ A ga re kaiwe baeng fela ke ene, ka a re rekisitse, a bile a jele a sweditse magadi a rona?

¹⁶ Gonne mahumo otlhe a Modimo o a tlositseng mo go rraetsho, ke a rona le a bana ba rona; jaana le fa e le eng se Modimo o se go reileng, o se dire fela.”

¹⁷ Foo Jakobe a nanoga, a pagamisa bomorwawe le basadi ba gagwe mo dikameleng;

¹⁸ a tsamaya le dikgomo tsotlhe tsa gagwe le thoto ya gagwe yotlhe fela e o neng a e phuthile, dikgomo tse o di bapetseng, tse o neng a di phuthile mo Patanaarame, gore a ye kwa go Isake rraagwe kwa lefatsheng la Kanana.

¹⁹ Jaana Labane o ne a ile go beola dinku tsa gagwe; mme Ragele a utswa medimo ya disetwa ya ga rraagwe.

²⁰ Jakobe a ngwega Labane wa Mosiria a sa itse, ka gobo a se ka a mmolelela fa a tshaba.

²¹ Jalo a tshaba ka tsotlhe tse o neng a na natso; a nanoga a kgabaganya Noka, a leba thaba ya Gileate.

²² E rile ka letsatsi la boraro Labane a bolelelwa fa Jakobe a tshabile.

²³ A tsaya ba ga gabo, a ya nabo, a mo latela loeto lwa malatsi a supa, mme a mo fitlhela mo thabeng ya Gileate.

²⁴ Modimo wa tla kwa go Labane wa Mosiria ka toro ya bosigo, wa mo raya wa re: “O itise gore o se ka wa bua le Jakobe molemo le fa e le bosula.”

²⁵ Labane a fitlha kwa go Jakobe; mme Jakobe o ne a tlhomile mogope wa gagwe mo thabeng; Labane a na le ba ga gabo, a tlhoma wa gagwe mo thabeng ya Gileate.

²⁶ Labane a raya Jakobe a re: “O dirile jang fa e le fa o ngwegile jaana ke sa itse, mme wa tsamaisa bomorwadiake jaaka ditshwarwa tsa tšhaka fela?

²⁷ O ne o tshabelang go sa itsiwe, o nngwegela o sa mpolelela? Aitse nkabo ke go neile tsela ka go direla mokete, le ka dipina, ka meropa, le harepe.

²⁸ Wa se ka wa ntesa ka atla bomorwaake le bomorwadiake. Aitse o dirile ka boeleele.

²⁹ Go mo thateng ya seatla sa me go lo utlwisa botlhoko; mme Modimo wa ga rraago o letse o buile le nna bosigo wa re: ‘O itise gore o se ka wa bua le Jakobe molemo le fa e le bosula.’

³⁰ Jaana le fa o ne o tlhoafaletse go tsamaya, ka o tlhologeletswe ntlo ya ga rraago mo go botlhoko, le fa go ntse jalo, ana o utswetseng medimo ya me?”

³¹ Jakobe a fetola Labane, a mo raya a re: “Ke ka gonne ke ne ke boifa; ka ke ithaya ke re o ka tla wa ntseela bomorwadio ka thata.

³² Le fa e le mang yo o tlaa fitlhelang medimo ya gago mo go ene, ga a ketla a tshela; fa pele ga ba ga rona, o tlhaloganye se e leng sa gago se ke nang naso o se tseye.” Ka go bo Jakobe a sa itse fa Ragele a e utswile.

³³ Labane a tsena mo mogopeng wa ga Jakobe le mo mogopeng wa ga Lea, le mo mogopeng wa malata oo mabedi; mme a se ka a e bona. A tswa mo mogopeng wa ga Lea a tsena mo mogopeng wa ga Ragele.

³⁴ Jaana Ragele o ne a tshotse medimo eo, a e tsentse mo dipeeletsong tsa dikamela, a e ntse godimo. Labane a phuruphutsa mogope otlhe, mme a se ka a e bona.

³⁵ Ragele a raya rraagwe a re: “A morena wa me a se nne bogale ka ke sa ka ke ka nanoga fa pele ga gago; gonne mokgwa wa basadi o mo go nna.” Mme a hukutsa, mme a se ka a bona mereo.

³⁶ Jakobe a nna bogale a omana le Labane; Jakobe a fetola Labane a mo raya a re: “Tlolo ya me ke eng? Boleo jwa me ke bofe fa o tla o ntshetse morago ka bogale jo bo tukang jaana?

³⁷ E re ka o phuruphuditse thoto ya me yotlhe fela, o bonye eng sa thoto yotlhe ya gago? Se beye fa, fa pele ga bagaetsho le bagaeno, gore ba tle ba atlhole fa gare ga rona roo babedi.

³⁸ Ke ntse ka nna nao dinyaga tse di 20; dinku tsa gago tse dinamagadi le dipodi tse dinamagadi tsa gago ga di a folotsa, le diphelefu tsa letsomane la gago ga ke a di ja.

³⁹ Se se gagotsweng ke dibatana, ga ke a ka ka se isa kwa go wena, mme ka se emisetsa; wa se lopa mo seatleng sa me le fa se utswilwe motshegare le fa e le bosigo.

⁴⁰ Ka nna fela jaana; e re motshegare ka jewa ke letsatsi le ke serame bosigo; boroko jwa me jwa tshaba matlho a me.

⁴¹ Dinyaga tse di 20 ke ntse ke le mo ntlong ya gago; ke go diretse ka ntata ya bomorwadio ba babedi, dinyaga di le 14, ka direla letsomane la gago dinyaga di le thataro; o fetotse maduo a me gasome.

⁴² Fa Modimo wa ga rre le Modimo wa ga Aberahame, le o o boifiwang ke Isake o ka bo o se ka wa nna le nna, ruri e ka bo e le fano o mpusitse ke iphotlhere fela. Modimo o bonye patikego ya me le tiro ya diatla tsa me, mme o letse o go kgalemetse bosigo.”

⁴³ Labane a fetola Jakobe a mo raya a re: “Bana bao ba basetsana ke bomorwadiake, le banyana bao ke bongwanake, matsomane ao ke matsomane a me, le tsotlhe tse o di bonang ke tsa me; ke ne ke ka dirang ka ga bomorwadiake ba, gompieno, le fa e le bana ba bone ba ba ba bonyeng?

⁴⁴ Jaana, a re dire kgolagano, nna le wena; e nne sesupo gare ga me nao.”

⁴⁵ Jakobe a tsaya lentswe a le emisa jaaka segopotso.

⁴⁶ Jakobe a raya ba ga gabo a re: “Rorang maje;” mme ba tsaya maje ba a dira sefikantswe; ba jela gone fa sefikantsweng.

⁴⁷ Labane a se raya leina a re: “Jegare-Sahadutha”; mme Jakobe ene a se bitsa “Galeete.”

⁴⁸ Labane a re: “Sefikantswe se ke sesupo fa gare ga me nao gompieno.” Ke gone ka moo leina la sone go ne go twe Galeete,

⁴⁹ le Misepa, ka a re: “A Jehofa a lebelele gare ga me nao, motlhang re sa tlholeng re bonana.

⁵⁰ E tlaa re fa o patika bomorwadiake, le gone fa o tsaya basadi ba sele kwa ntle ga bomorwadiake; gobo go se na motho ope le rona; bona, Modimo ke one mosupi gare ga me nao.”

⁵¹ Labane a raya Jakobe a re: “Bona sefikantswe se, o bo o bone lentswe le, tse ke di tlhomileng gare ga me le wena.

⁵² Sefikantswe se e nne sesupo, le lentswe le nne sesupo, fa ke se ketla ke feta sefikantswe ke ya foo go wena le gone le wena fa o se ketla o feta sefikantswe se, le lentswe le, go tla kwa go nna go utlwisanya botlhoko.

⁵³ A Modimo wa ga Aberahame, le Modimo wa ga Nahore, Modimo wa ga rraago, o atlhole fa gare ga rona.” Mme Jakobe a ikana ka o o boifiwang ke Isake rraagwe.

⁵⁴ Jakobe a isa setlhabelo mo thabeng, a bitsa ba ga gabo ba tla go ja dijo, mme ba a ja, mme ba lala mo thabeng.

⁵⁵ Labane a phakela ka moso, a atla bomorwawe le bomorwadie, a ba segofatsa. Labane a tsamaya a boela kwa ga gabo.

32

¹ Jakobe a tswelela mo tseleng ya gagwe, baengele ba Modimo ba rakana nae.

² E rile Jakobe a ba bona a re: “Le ke lesomo la Modimo.” A raya felo foo leina a re Mahanaime.

³ Jakobe a roma batho ba mo etelela pele ba ya kwa go Esau mogolowe, kwa lefatsheng la Seire, naga ya Etome.

⁴ A ba laya a re: “Lo tlaa bua jaana le morena wa me Esau lo re: ‘Motlhanka wa gago Jakobe o bua jaana a re: Ke jakile kwa go Labane ke diegile gone go tla nakong eno.

⁵ Ke na le dikgomo, le diesela, le matsomane, le batlhanka, le malata. Ke rometse go bolelela morena wa me gore ke bone tsalano mo matlhong a gago.’ ”

⁶ Barongwa ba ya ba boela mo go Jakobe ba re: “Re ile ra fitlha kwa go mogoloo Esau, le gone ene o e tla go go kgatlhantsha, banna ba ba 400 ba bile ba na nae.”

⁷ Foo Jakobe a boifa thata, a pitlagana; a kgaoganya batho ba o nang nabo, le matsomane, le matlhape, le dikamela a dira masomo a le mabedi.

⁸ A re: “E tlaa re fa Esau a fithela lesomo lengwe a le kgemetha, foo lesomo le lengwe le le setseng le tlaa falola.”

⁹ Jakobe a rapela a re: “Modimo wa ga Aberahame rre, le Modimo wa ga Isake rre, Jehofa, yo o ntheileng wa re: ‘Boela kwa lefatsheng la gaeno, le kwa go bagaeno, ke tlaa go direla molemo.’

¹⁰ Ga ke a tshwanelwa ke bope le fa e le jo bonnye jwa mapelonomi otlhe le fa e le jwa boammaaruri jotlhe jo o bo supeditseng motlhanka wa gago, gonne ke ne ka tlola noka e ya Joretane ke na le thobane ya me fela, mme gompieno ke diregile masomo a le mabedi.

¹¹ Ke a go rapela, a ko o nkgolole mo seatleng sa ga mogolole, mo seatleng sa ga Esau; gonne ke a mmoifa, o ka tla a nkgemetha, le mma bana le bana.

¹² Wena o rile: ‘Ruri ke tlaa go direla molemo, ke tlaa dira losika lwa gago go nna jaaka mošawa wa lewatle o o sa ka keng wa balwa ka bontsi.’ ”

¹³ A lala gone bosigo joo, a tsaya mo go tse a nang natso, a baakanyetsa Esau mogolowe mpho:

¹⁴ dipodi tse dinamagadi di le 200, le diphoko di le 20, dinku tse dinamagadi di le 200, le diphelefu di le 20,

¹⁵ dikamela tse di amusang di le 30 le dikamelana tsa tsone, dikgomo tse dinamagadi di le 40, le dipoo di le some, diesela tse dinamagadi di le 20 le dieselana di le some.

¹⁶ A di neela batlhanka, setlhophana sengwe le sengwe se le sosi; a raya batlhanka ba gagwe a re: “Tsamaelang kwa pele ga me, lo ntshe sebaka fa gare ga setlhophana le setlhophana.”

¹⁷ Yo o kwa pele pele a mo laya a re: “E tlaa re Esau mogolole a kgatlhana nao, a go botsa a re: ‘O wa ga mang? O ya kae? Le dilo tse di fapele ga gago ke tsa ga mang?’

¹⁸ Foo o re: ‘Ke tsa ga Jakobe motlhanka wa gago; ke mpho e e newang morena wa me Esau. Bona, le ene o kwa morago ga rona.’ ”

¹⁹ A laya le wa bobedi le wa boraro, le botlhe ba ba setseng ditlhophana morago a re: “Lo tlaa bua le Esau ka mokgwa o o ntseng jalo fa lo mmona.

²⁰ Lo tlaa re: ‘Le gone, bona, motlhanka wa gago Jakobe o kwa morago ga rona.’ ” Gonne a re: “Ke tlaa mo tima bogale ka mpho e e nketeletseng pele, morago ke tlaa bona sefatlhogo sa gagwe; e tlaa re gongwe a nkamogele.”

²¹ Jalo mpho ya tshelela noka kwa pele ga gawe; mme ene ka esi a lala le lesomo bosigo joo.

²² A tsoga bosigo joo, a tsaya basadi ba gagwe ba babedi, le malata a gagwe a mabedi, le bana ba gagwe ba le some le motso, a kgabaganya ka letsibogo ja Jaboke.

²³ A ba tsaya a ba kgabagantsha noka a ba a kgabagantsha dilo tse a nang natso.

²⁴ Jakobe a sala a le esi; mme ga sokasokana nae monna mongwe go tsamaya bosigo jwa a sa.

²⁵ Mme a re a bona a sa mo fenye, a ama tswinke ya noka ya gagwe; tswinke ya noka ya ga Jakobe ya khumoga ka a sokasokana nae.

²⁶ A mo raya a re: “Ntesa ke tsamaye gonne bosigo bo a sa.” Mme a re: “Ga nketla ke go lesa o tsamaya fa o sa ntshegofatse.”

²⁷ A mo raya a re: “Leina la gago e mang?” A re: “Jakobe.”

²⁸ Mme a re: “Leina la gago ga le ketla le tlhola le bidiwa Jakobe, le tlaa bidiwa Iseraele, gonne o ganetse le Modimo le batho, mme o fentse.”

²⁹ Jakobe a mmotsa a re: “Ke a go rapela, a ko o mpolelele leina la gago.” Mme a re: “Ke ka ntlha yang fa o botsa leina la me?” Mme a mo segofatsa gone.

³⁰ Jakobe a raya leina la felo foo a re, Peniele; gonne a re: “Ke bonye Modimo re lebanye difatlhogo, mme botshelo jwa me bo bolokilwe.”

³¹ Letsatsi la mo tlhabela a fapaanya Peniele, a bo a bolawa ke noka.

³² Ke gone ka moo bana ba Iseraele ba sa jeng mosifa wa noka o o mo tswinkeng ya serope le gompieno; gonne a ama tswinke ya serope sa ga Jakobe mo mosifeng wa noka.

33

¹ Jakobe a tsholetsa matlho a gagwe a leba, mme bonang, Esau a bo a tla le banna ba le 400 nae. Mme bana a ba kgaoganyetsa Lea, le Ragele le malata a mabedi.

² A baya malata a mabedi le bana ba one kwa pele pele, Lea le bana ba gagwe fa morago, Ragele le Josefe kwa moragorago.

³ Ene ka esi a fetela kwa pele ga bone, a inamela fa fatshe gasupa, a ba a tla a atamela fa go mogolowe.

⁴ Esau a siana a ya go mo kgatlhantsha, a mo kamatlela, a mo atla; mme ba lela.

⁵ A tsholetsa matlho a gagwe a bona basadi le banyana; mme a re: “Ba o nang nabo ke bomang?” A re: “Ke bana ba Modimo o ba neileng motlhanka wa gago ka bopelonamagadi jwa one.”

⁶ Foo malata a atamela, one le bana ba one, mme ba inama.

⁷ Lea le ene a atamela le bana ba gagwe, ba inama; morago ga tla Josefe le Ragele, ba inama.

⁸ Mme a re: “O a reng ka lesomo le le kanakana le ke kopanyeng nalo?” Jakobe a re: “Ke gore ke bone tsalano mo matlhong a morena wa me.”

⁹ Esau a re: “Ke na le tsetsho, di ntekanye; a se o nang naso e nne sa gago fela nnaka.”

¹⁰ Jakobe a re: “Nnyaa, ke a go rapela, a e re fa ke bonye tsalano mo matlhong a gago, foo o amogele mpho ya me mo seatleng sa me; ka e le fa ke bonye sefatlhogo sa gago, mme ka go natefela fela jaaka motho a bona sefatlhogo sa Modimo.

¹¹ Ke a go rapela, a ko o amogele mpho ya me e e isitsweng kwa go wena; ka gobo Modimo o ntiretse ka pelonamagadi, ka ke bile ke na le mo go ntekanyeng.” A mo emelela, mme a e tsaya.

¹² A re: “A re nanoge, re tsamaye mmogo, ke tlaa go etelela pele.”

¹³ A mo raya a re: “Morena wa me o a itse fa bana ba sa le diramatlana le go re matsomane le matlhape a ke nang nao a a amusa. Mme fa ba ka di kgweetsa ka potlako letsatsi le le lengwe fela, matsomane otlhe a ka swa.

¹⁴ Ke a go rapela, a morena wa me a fetele kwa pele ga motlhanka wa gagwe; nna ke tlaa goga ka papetletso ka fa mosepeleng wa matlhape a a kwa pele ga me, le ka fa mosepeleng wa banyana, ke tle ke tsamaye ke fitlhe koo go morena wa me kwa Seire.”

¹⁵ Esau a re: “Mma ke go tlogelele batho bangwe ba ke nang nabo.” Mme a re: “E tlaa bo e le ka ntlha yang? A nke ke bone tsalano mo matlhong a morena wa me.”

¹⁶ Jalo Esau a boa ka letsatsi leo a leba kwa Seire.

¹⁷ Jakobe a etela kwa Sukothe, a ikagela ntlo, a direla dikgomo tsa gagwe diobo; ke gone ka moo leina la felo foo le bidiwang Sukothe.

¹⁸ Jakobe a fitlha ka kagiso kwa motseng wa Shekeme, o o mo lefatsheng la Kanana, ka a tswa kwa Patanaarame; a thibelela fa pele ga motse.

¹⁹ Sebata sa lefatshe sa fa o tsharolotseng mogope wa gagwe gone, a se reka mo seatleng sa bana ba ga Hamore rra Shekeme, ka dipapetla tsa madi di le lekgolo.

²⁰ A aga aletara gone, a e raya leina a re: Elelohe-Iseraele. (Ke go re: Modimo wa Iseraele.)

34

¹ Dina, morwadia Lea, yo o mmonyeng le Jakobe, a tswa a ya go bona bomorwadia lefatshe.

² Shekeme morwa Hamore wa Mohife, kgosana ya lefatshe leo, a mmona; mme a mo tsaya a lala nae, a mo senya.

³ Pelo ya gagwe ya ngaparela Dina morwadia Jakobe, a rata morweetsana yo; mafoko a gagwe a tsena mo pelong ya morweetsana.

⁴ Shekeme a bua le Hamore rraagwe a re: “Mpatlela morweetsana yo, a nne mosadi wa me.”

⁵ Jaana Jakobe a utlwa fa a leswefaditse Dina morwadie; bomorwawe ba bo ba na le dikgomo tsa gagwe kwa nageng; Jakobe a itidimalela fela ba tsamaya ba tla.

⁶ Hamore rra Shekeme, a tswela kwa go Jakobe a ya go bua nae.

⁷ E rile bomorwa Jakobe ba utlwa ba tloga ba tla gae ba tswa kwa nageng; banna bao ba hutsafala, ba nna bogale thata ka a dirile boatla mo go Iseraele ka go lala le morwadia Jakobe; e le selo se se sa tshwanelang go dirwa.

⁸ Hamore a bua nabo a re: “Pelo ya ga morwaake Shekeme e tlhoafaletse morwadia lona; ke a lo rapela, lo mo mo neye gore a nne mosadi wa gagwe,

⁹ mme lo nyalane le rona; re neeleng bomorwadia lona, le lona lo tseye bomorwadia rona.

¹⁰ Lo tlaa aga le rona; lefatshe le tlaa nna fa pele ga lona, agang lo bo lo bapale mo go lone lo bone dithuo mo go lone.”

¹¹ Shekeme a raya rra morweetsana le bokgaitsadie a re: “A nke ke bone tsalano mo matlhong a lona, se lo tlaa se mpalelang ke tlaa se ntsha.

¹² Le fa lo ntopa bogadi le ketleetso le fa go le kae, ke tlaa ntsha ka fa lo tlaa ntopang ka gone; se se gone fela ke gore nnayang morweetsana a nne mosadi wa me.”

¹³ Bomorwa Jakobe ba fetola Shekeme le rraagwe Hamore ka boferefere, ba bua ka a ne a leswefaditse Dina kgaitsadia bone.

¹⁴ Ba ba raya ba re: “Ga re ka ke ra dira selo se, go neela motho yo o sa rupang kgaitsadia rona; gonne selo seo e tlaa bo e le kgobo mo go rona.

¹⁵ Re tla dumalana le lona ka selo se, se le sosi fela; fa lo ka nna jaaka rona, fa banna botlhe ba lona ba ka rupisiwa.

¹⁶ Foo re tlaa lo neela bomorwadia rona, re ba re tsaya bomorwadia lona, re aga le lona, mme re tlaa tswa batho ba le bangwe fela.

¹⁷ E tlaa re fa lo gana go re utlwa, go rupa, foo re tlaa tsaya morwadia rona, mme re tsamaye.”

¹⁸ Mafoko a bone a kgatlha Hamore le Shekeme morwa Hamore.

¹⁹ Lekau ga le a ka la diega go dira selo se, gonne le ne le kgatlhilwe ke morwadia Jakobe; le ne le tlotlwa bogolo go botlhe ba ntlo ya ga rraagwe.

²⁰ Hamore le Shekeme morwawe ba tla mo kgorong ya motse wa bone, ba bua le banna ba motse wa bone ba re:

²¹ “Banna ba ba kagiso le rona; ke gone a ba age mo lefatsheng le, ba bapale mo go lone; gonne, bonang lefatshe le ba lekanye. A re ba tseeleng bomorwadia bone go nna basadi ba rona le rona, re ba neeleng bomorwadia rona.

²² Banna bao ba ka dumalana le rona go aga le rona le go tswa batho ba le bangwe fela ka selo se, se le sosi fela, fa banna botlhe ba ba mo go rona ba ka rupa jaaka bone ba rupile.

²³ Dikgomo tsa bone le thoto ya bone le dilo tsotlhe tsa bone, a ga di ketla di nna tsa rona? A re dumalaneng le bone fela, mme ba tlaa aga le rona.”

²⁴ Botlhe ba ba tswang ka kgoro ya motse wa gagwe ba utlwa Hamore, le Shekeme morwawe; mme banna botlhe ba rupisiwa, e bong botlhe ba ba tswang ka kgoro ya motse wa gagwe.

²⁵ Ga dirala ya re ka letsatsi la boraro ka ba le botlhokong, bomorwa Jakobe ba le babedi, e bong Simeone le Lefi, bokgaitsadia Dina mongwe le mongwe a tsaya tšhaka ya gagwe, ba wela motse ka pelokgale, ba bolaya banna botlhe fela.

²⁶ Ba bolaya Hamore le Shekeme morwawe ka bogale jwa tšhaka, ba ntsha Dina mo ntlong ya ga Shekeme ba tswa ba tsamaya.

²⁷ Bomorwa Jakobe ba tla mo go ba ba bolailweng, ba thopa motse, ka gobo ba ne ba leswefaditse kgaitsadia bone.

²⁸ Ba gapa matsomane a bone, le matlhape a bone, le diesela tsa bone, le se se mo motseng, le se se kwa nageng.

²⁹ Le lohumo lotlhe lwa bone, le banyana botlhe ba bone, le basadi ba bone, ba ba tshwara ba ba thopa, e bong tsotlhe tse di mo matlong.

³⁰ Jakobe a raya Simeone le Lefi a re: “Lo ntshwentse, lo nnkgisitse sebodu mo banning ba lefatshe le mo go Bakanana, le mo go Baperise. Nna ka ke le mmotlana mo palong, ba tlaa nkokoanela ba mpolaya; ke tlaa nyelediwa, nna le ba ntlo ya me.”

³¹ Ba re: “A o ne a ka direla kgaitsadia rona jaaka seaka?”

35

¹ Modimo wa raya Jakobe wa re: “Nanoga o tlhatlogele kwa Bethele, o age gone; o dire aletara gone, o se direle Modimo o o kileng wa go iponaletsa gone jale ka o tshaba sefatlhogo sa ga mogoloo Esau.”

² Foo Jakobe a raya ba ntlo ya gagwe le botlhe ba o nang nabo a re: “Tlosang medimo e sele e e mo go lona, lo iitshekise, lo apare diaparo di sele.

³ A re nanogeng re tlhatlogeleng kwa Bethele; ke tlaa dira aletara gone, ke e direla Modimo o o nkarabileng mo letsatsing la pitlagano ya me, wa ba wa nna le mo tseleng e ke neng ke tsamaya ka yone.”

⁴ Ba neela Jakobe medimo yotlhe e sele e e mo diatleng tsa bone, le manyena a a mo ditsebeng tsa bone; Jakobe a di fitlha ka fa tlase ga setlhare sa mooka se se leng ka fa Shekeme.

⁵ Ba eta; mme ga bo go le therego e kgolo mo metseng e e mo tikologong ya bone, mme ba se ka ba latela bomorwa Jakobe.

⁶ Jalo Jakobe a fitlha kwa Luse o o mo lefatsheng la Kanana, ke go re, Bethele, ene le batho botlhe ba o nang nabo.

⁷ A aga aletara gone, a raya felo foo leina a re, Elebethe-ele; ka gobo Modimo o ne wa mo senogela gone jale ka a tshaba sefatlhogo sa ga mogolowe.

⁸ Mme Debora, mmelegi wa ga Rebeka a swa, a fitlhwa ka fa tlase ga setlhare sa Bethele, fa tlase ga mooka, ke gone leina la one la bidiwa Alonabakutha.

⁹ Modimo wa bonala kwa go Jakobe gape, ka a tswa Patanaarame, wa mo segofatsa.

¹⁰ Modimo wa mo raya wa re: “Leina la gago ke Jakobe; leina la gago ga le ketla le tlhola le bidiwa Jakobe, mme leina la gago go tlaa twe, Iseraele:” A mo raya leina a re, Iseraele.

¹¹ Modimo wa mo raya wa re: “Ke nna Modimo Mothatayotlhe; ata, o ntsifale. Morafe o tlaa tswa mo go wena le lesomo la merafe, le dikgosi di tlaa tswa mankopeng a gago.

¹² Lefatshe le ke kileng ka le naya Aberahame le Isake, ke tlaa le go naya; le losika lwa gago sehularong sa gago ke tlaa lo naya lefatshe le.”

¹³ Modimo wa tlhatloga wa tswa fa go ene fa felong fa o buileng nae gone.

¹⁴ Jakobe a tlhoma segopotso felong fa o buileng nae gone, e le segopotso sa lentswe, a thela tshupelo e e nowang mo go sone, a ba a thela lookwane mo go sone.

¹⁵ Jakobe a raya leina la felo fa Modimo o buileng nae gone a re, Bethele.

¹⁶ Ba eta ba tswa Bethele; mme ga bo go sa ntse go na le sebaka ba ise ba fitlhe kwa Eferatha, Ragele a simolola go belega a bona pelego e e thata.

¹⁷ Ga dirala ya re a le mo pelegong e e thata mmelegisi a mo raya a re: “O se ka wa boifa ka jaana o tlaa bona ngwana yo mongwe wa mosimane.”

¹⁸ Ga dirala ya re mowa wa gagwe o tswa, ka a ne a swa, a raya leina la ngwana a re, Bononi; rraagwe a mmitsa Benjamine.

¹⁹ Ragele a swa, a fitlhwa mo tseleng e e yang Eferatha, ke one Bethelehema.

²⁰ Jakobe a emisa sefikantswe fa godimo ga phupu ya gagwe; ke sone segopotso sa phupu ya ga Ragele le gompieno.

²¹ Iseraele a eta, a tsharolola mogope wa gagwe ka kwa pele ga kago e e godileng ya phemelo ya Etere.

²² Ga dirala ya re Iseraele a sa ntse a agile mo lefatsheng leo, Rubene a ya a lala le Bileha mogadingwana wa ga rraagwe; mme Iseraele a utlwa. Jaana bomorwa Jakobe ba bo ba le 12.

²³ Bomorwa Lea ke ba; Rubene, wa ntlha wa ga Jakobe, Simeone, Lefi, Juta, Isakare le Sebulone.

²⁴ Bomorwa Ragele ke ba; Josefe le Benjamine.

²⁵ Bomorwa Bileha, lelata la ga Ragele ke ba: Dane le Nafetali.

²⁶ Bomorwa Silepa, lelata la ga Lea ke ba: Gate le Ašere. Ba ke bone bomorwa Jakobe ba o ba bonyeng kwa Patanaarame.

²⁷ Jakobe a fitlha kwa go Isake rraagwe, kwa Mamere, kwa motseng wa Kiriathe-areba, o e leng Heberone, kwa Aberahame le Isake ba neng ba jaka gone.

²⁸ Malatsi a ga Isake e ne e le dinyaga di le 180.

²⁹ Isake a khutla, a swa, a phuthwa a ya kwa bathong ba ga gabo a tsofetse, a tletse malatsi; mme bomorwawe, Esau le Jakobe ba mo fitlha.

36

¹ Jaana tse ke tsone ditshika tsa ga Esau, ke ene Etome:

² Esau a tsaya bomorwadia lefatshe la Kanana go nna basadi ba gagwe; Ata morwadia Elone wa Mohite, le Oholibama morwadia Ana, morwadia Sibeone wa Mohife;

³ le Basemathe morwadia Išemaele, kgaitsadia Nebaiothe.

⁴ Ata a bona le Esau Elifase; Basemathe a bona Reuele;

⁵ Oholibama a bona Jeuše, le Jalame, le Kora; ba, ke bomorwa Esau, ba o ba tsetseng mo lefatsheng la Kanana.

⁶ Esau a tsaya basadi ba gagwe le bomorwawe le bomorwadie, le batho botlhe ba motse wa gagwe le dikgomo tsa gagwe, le dilo tsotlhe tsa gagwe tse di utlwang le dithuo tsotlhe tsa gagwe tse o neng a di phuthile mo lefatsheng la Kanana; mme a ya kwa lefatsheng le le katoganyeng le Jakobe monnawe.

⁷ Gonne dilo tsa bone di ne di le dikgolo thata, go ne go retetse fa ba ka nna mmogo; mme lefatshe la majako a bone le ne le sa kake la ba tshola ka ntlha ya dikgomo tsa bone.

⁸ Esau a aga mo thabeng ya Seire; Esau ke ene Etome.

⁹ Mme tse, ke tsone ditshika tsa ga Esau rraabo Baetome ba thaba ya Seire.

¹⁰ A ke one maina a bomorwa Esau: Elifase morwa Ata mosadi wa ga Esau, Reuele morwa Basemathe mosadi wa ga Esau.

¹¹ Bomorwa Elifase e ne e le Temane, Omare, Sefo, Gatame, le Kenase.

¹² Timena e ne e le mogadingwana wa ga Elifase morwa Esau; mme a bona le Elifase Amaleke; bao ke bomorwa Ata mosadi wa ga Esau.

¹³ Ba ke bomorwa Reuele: Nahathe, Sera, Shamma, le Misa; bao e ne e le bomorwa Basemathe, mosadi wa ga Esau.

¹⁴ Ba e ne e le bomorwa Oholibama morwadia Ana, morwadia Sibeone, mosadi wa ga Esau; mme a bona le Esau Jeuše, Jalame, le Kora.

¹⁵ Ba ke dikgosana mo go bomorwa Esau, bomorwa Elifase motsalwapele wa ga Esau: Kgosana Temane, kgosana Omare, kgosana Sefo, kgosana Kenase.

¹⁶ Kgosana Kora, kgosana Gatame, kgosana Amaleke; tse ke dikgosana tse di duleng mo go Elifase mo lefatsheng la Etome; bao ke bomorwa Ata.

¹⁷ Ba ke bomorwa Reuele morwa Esau; kgosana Nahathe, kgosana Sera, kgosana Shamma, kgosana Misa. Tseo ke dikgosana tse di duleng mo go Reuele mo lefatsheng la Etome; bao ke bomorwa Basemathe mosadi wa ga Esau.

¹⁸ Ba ke bomorwa Oholibama mosadi wa ga Esau: Kgosana Jeuše, kgosana Jalame, kgosana Kora; tseo ke dikgosana tse di duleng mo go Oholibama, morwadia Ana, mosadi wa ga Esau.

¹⁹ Bao ke bomorwa Esau, mme tseo ke dikgosana tsa bone; Esau ke ene Etome.

²⁰ Ba ke bomorwa Seire wa Mohori, banni ba lefatshe: Lotane, le Shobale, Sibeone, le Ana.

²¹ Le Dišone, Esere, le Dišane; tseo ke dikgosana tse di duleng mo Bahoreng, bana ba ga Seire mo lefatsheng la Etome.

²² Bana ba ga Lotane e ne e le Hori le Hemame; mme kgaitsadia Lotane e ne e le Timena.

²³ Ba ke bana ba ga Shobale: Alefane, Manahathe, Ebale, Shefo le Oname.

²⁴ Ba ke bana ba ga Sibeone: Aia le Ana; yo ke ene Ana yo o bonyeng metswedi e e metsi a a molelo mo nageng, ka a hudisa diesela tsa ga Sibeone rraagwe.

²⁵ Ba ke bana ba ga Ana: Dišone le Oholibama morwadia Ana.

²⁶ Ba ke bana ba ga Dišone: Hemetane, le Ešebane, le Itherane, le Kerane.

²⁷ Ba ke bana ba ga Esere: Bilehane, le Saafane, le Akane.

²⁸ Ba ke bana ba ga Dišane; Use le Arane.

²⁹ Tse ke dikgosana tse di duleng mo Bahoreng: kgosana Lotane, kgosana Shobale, kgosana Sibeone, kgosana Ana,

³⁰ kgosana Dišone, kgosana Esere, kgosana Dišane; tseo ke dikgosana tse di duleng mo Bahoreng, ka fa dikgosaneng tsa bone mo lefatsheng la Seire.

³¹ Tse ke dikgosi tse di busitseng mo lefatsheng la Etome go ise go buse kgosi epe mo baneng ba Iseraele.

³² Bele morwa Beore a busa mo Etome; leina la motse wa ga gabo e ne e le Dinehaba.

³³ Bele a swa, mme Jobabe morwa Sera wa Bosera a busa mo boemong jwa gagwe.

³⁴ Jobabe a swa, mme Hušame wa lefatshe la Batemane a busa mo boemong jwa gagwe.

³⁵ Hušame a swa, mme Hatate morwa Betate, yo o kgemethetseng Midiane mo nageng ya Moabe, a busa mo boemong jwa gagwe; leina la motse wa ga gabo e ne e le Afithe.

³⁶ Hatate a swa, mme Samela wa Masereka a busa mo boemong jwa gagwe.

³⁷ Samela a swa, mme Shaule wa Rehobothe o o fa Nokeng, a busa mo boemong jwa gagwe.

³⁸ Shaule a swa, mme Baale-hanane morwa Akebore a busa mo boemong jwa gagwe.

³⁹ Baale-hanane morwa Akebore a swa, mme Hatare a busa mo boemong jwa gagwe; leina la motse wa ga gabo e ne e le Pau; leina la mosadi wa gagwe e le Mehetabele morwadia Matere, morwadia Mesahabe.

⁴⁰ A, ke maina a dikgosana tse di duleng mo go Esau, ka fa makgotleng a tsone, le ka fa mafelong a tsone, ka maina a tsone: Kgosana Timena, kgosana Alefa, kgosana Jethethe.

⁴¹ Kgosana Oholibama, kgosana Ela, kgosana Pinone;

⁴² kgosana Kenase, kgosana Temane, kgosana Mibesare;

⁴³ kgosana Magadiele, kgosana Irame; tseo ke dikgosana tsa Etome, ka fa mannong a tsone mo lefatsheng le di le ruileng. Yo ke ene Esau rraabo Baetome.

37

¹ Jakobe a aga mo lefatsheng la majako a ga rraagwe, mo lefatsheng la Kanana.

² Tse ke dipolelo kaga ba ga Jakobe. Josefe a le dinyaga di le 17, a disa letsomane a na le bomogolowe; a bo a le lekawana a na le bomorwa Bileha, le bomorwa Silepa, basadi ba ga rraagwe. Josefe a isa polelo e e bosula ka ga bone kwa go rraagwe.

³ Jaana Iseraele a bo a rata Josefe bogolo go bana botlhe ba gagwe, ka gobo e le ngwana wa botsofe jwa gagwe; mme a mo direla kobo e e mebala mentsi.

⁴ Bomogolowe ba bona fa rraabo a mo rata bogolo go bone botlhe; mme ba mo ila, ba ne ba sa kake ba bua nae sentle gope.

⁵ Josefe a lora toro, a e bolelela bomogolowe; mme ba mo ila segolo bogolo.

⁶ A ba raya a re: “Ke a lo rapela, a ko lo utlwe toro e ke e lorileng:

⁷ Gonne, bonang, re ne re bofa dingata tsa mabele mo leoteng, mme ka tshoganetso ngata ya me ya nanoga ya ba ya ema ya tsepalala, mme dingata tsa lona tsa tla tsa e dikanyetsa, tsa ikobela ngata ya me.”

⁸ Bomogolowe ba mo raya ba re: “A tota o gopola gore o ka re busa? Le gone a o gopola gore o ka re laola?” Ba fela ba mo ila segolo bogolo ka ntlha ya ditoro tsa gagwe le mafoko a gagwe.

⁹ A fela a lora toro e nngwe, a e bolelela bomogolowe a re: “Bonang, ke bile ke lorile toro e nngwe gape: Letsatsi le kgwedi, le dinaledi di le 11 tsa inkobela.”

¹⁰ A e bolelela rraagwe, le bomogolowe; rraagwe a mo kgalemela a mo raya a re: “Toro e o e lorileng ke yang? A ruri nna le mmaago, le bomogoloo, re tlaa tla go go ikobela fa fatshe?”

¹¹ Bomogolowe ba mo hufegela; mme rraagwe ene a tshola polelo e ka pelo.

¹² Bomogolowe ba ya go fudisa letsomane la ga rraabo kwa Shekeme.

¹³ Mme Iseraele a raya Josefe a re: “Kana bomogoloo ba hudisa letsomane kwa Shekeme? Ntlo, ke tlaa go roma kwa go bone.” Mme a mo raya a re: “Ke fano.”

¹⁴ A mo raya a re: “A ko o tsamaye jaana, o ye go bona bomogoloo gore a ba sa tshedile sentle, le letsomane a le ntse sentle; o itse go ba o tla o mpolela.” A mo roma a tswa mokgatšheng wa Heberone, mme a fitlha kwa Shekeme.

¹⁵ Monna mongwe a mo fitlhela, a kaila kaila fela mo nageng; mme monna yo a mmotsa a re: “O batlang?”

¹⁶ A re: “Ke batla bomogolole; ke a go rapela, a ko o mpolelele kwa ba hudisang gone.”

¹⁷ Monna yo a re: “Ba hudugile mono; gonne ke ba utlwile ba re: ‘A re yeng kwa Dothane.’ ” Josefe a latela bomogolowe, a ba fitlhela kwa Dothane.

¹⁸ Ba mmona a sa le kgakala; mme a re a ise a ba atamele, ba mo rera gore ba tle ba mmolaye.

¹⁹ Ba raana ba re: “Bonang rraditoro ke yole o etla.

²⁰ Ntlong jaana; a re mmolayeng re mo latlhele mo mokoleng mongwe, re tle re re: ‘Sebatana se mo jele;’ re tlaa bona se se tlaa tswang mo ditorong tsa gagwe.”

²¹ Rubene a utlwa, mme a mo golola mo seatleng sa bone, a re: “A re se tloseng botshelo jwa gagwe.”

²² Rubene a ba raya a re: “Se tshololeng madi; mo latlheleng mo mokoleng o, o o mo nageng, lo se ka lwa baya seatla sepe mo go ene;” ya bo e le gore a mo golole mo seatleng sa bone, a tle a mo rebolele rraagwe.

²³ Ga dirala ya re Josefe a fitlha kwa go bomogolowe, ba mo apola kobo ya gagwe, e bong kobo e e mebala mentsi e o e apereng.

²⁴ Ba mo tsaya, ba mo latlhela mo mokoleng; mme mokole o ne o se na sepe, go ne go se na metsi mo go one.

²⁵ Ba nna fa fatshe ba a ja dijo. Ba tsholetsa matlho a bone, ba leba, mme bonang, go bo go tla lesomo le le etileng la Baišemaele, ba tswa Gileate ba na le dikamela tsa bone di belesitse dilo tse di lonko lo lo monate tsa malao, le balema, le mura, ba re ba di isa kwa Egepeto.

²⁶ Mme Juta a raya bomorwa rraagwe a re: “Go tlaa re thusa eng fa re bolaya monnaa rona, re loba madi a gagwe?

²⁷ Ntlong, re mmapatseng mo go Baišemaele, mme a seatla sa rona se se ka sa nna mo go ene; gonne ke monnaa rona, nama ya rona.” Mme bomorwa rraagwe ba mo dumela.

²⁸ Ga feta Bamidiane, e le babapatsi. Bomogoloa Josefe ba goga Josefe ba mo ntsha mo mokoleng; ba mo rekisa mo go Baišemaele ka dipapetla tsa selefera di le 20. Mme ba isa Josefe kwa Egepeto.

²⁹ Rubene a boela kwa mokoleng; a ya a fitlhela Josefe a seyo mo mokoleng; mme a gagola diaparo tsa gagwe.

³⁰ A boela kwa go bomonnawe a re: “Ngwana ga a yo; mme nna ke tlaa ya kae?”

³¹ Ba tsaya kobo ya ga Josefe, ba bolaya potsane, ba ina kobo mo mading.

³² Ba isa kobo e e mebala mentsi, ba e fitlhisa kwa go rraabo; ba re: “Selo se re se begile; a ko o sekaseke o bone gore a ke kobo ya ga morwao kgotsa nnyaa.”

³³ A e itse, a re: “Ke kobo ya ga morwaake; sebatana se mo jele; ga go na pelaelo Josefe o gagogantswe.”

³⁴ Jakobe a gagola diaparo tsa gagwe, a tswala letsela la kgetsi mo lothekeng, a lelela morwawe ka malatsi a le mantsi.

³⁵ Bomorwawe botlhe, le bomorwadie botlhe ba nanoga, ba re ba a mo gomotsa; mme a gana go gomodiwa a re: “Ka gonne ke tlaa fologela mo lebitleng kwa go morwaake ke ntse ke hutsafetse fela.” Mme rraagwe a mo lelela.

³⁶ Bamidiane ba feta ba mo rekisa kwa Egepeto mo go Potifare, mogolwane wa ga Faro, kgosana ya maotlana.

38

¹ Mme ga dirala ya re ka lobaka loo, Juta a huduga a tswa mo go bomorwa rraagwe, a menogela kwa monneng mongwe wa Moadulame, leina la gagwe go twe Hira.

² Juta a bona morwadia Mokanana mongwe gone, leina la gagwe go twe Shua; a mo tsaya, a tsena kwa go ene.

³ Mme a nna moimana, a bona ngwana wa mosimane; a mo raya leina a re, Ere.

⁴ A ba a nna moimana gape, a bona ngwana wa mosimane; a mo raya leina a re, Onane.

⁵ A fela a bona ngwana wa mosimane gape, a mo raya leina a re, Shela. Juta a bo a le kwa Kesibe fa mosadi a bona ngwana yo.

⁶ Juta a tseisa Ere ngwana wa gagwe wa ntlha mosadi, leina la gagwe go twe, Tamare.

⁷ Ere, ngwana wa ntlha wa ga Juta a bo a le bosula mo matlhong a ga Jehofa; mme Jehofa a mmolaya.

⁸ Juta a raya Onane a re: “Tsena kwa go mogatsa mogoloo, o mo tlhatswe ka fa tshwanelong ya monnaa motho, o tsosetse mogoloo losika.”

⁹ Onane a bo a itse fa losika e tlaa bo e se lwa gagwe; mme ga dirala e ne e tle e re a tsena mo go mogatsa mogolowe a thololele fa fatshe, gore e se ka ya re gongwe a tsosetsa mogolowe losika.

¹⁰ Selo se o se dirileng se ne se le bosula mo matlhong a ga Jehofa; mme le ene a mmolaya.

¹¹ Foo, Juta a raya Tamare ngwetsi ya gagwe a re: “Nna fela mo ntlong ya ga rraago o le motlholagadi, e bo e tle Shela morwaake a gole.” A ithaya a re: “E se ka ya re gongwe le ene a swa jaaka bomogolowe.” Tamare a ya a nna mo ntlong ya ga rraagwe.

¹² Ya tla ya re motlha mongwe morwadia Shua, mosadi wa ga Juta, a swa; mme Juta a gomotsega, a tlhatlogela kwa babeoding ba dinku tsa gagwe kwa Timena, le tsala ya gagwe Hira wa Moadulame.

¹³ Tamare a bolelelwa ga twe: “Bona, matsalaago o tlhatlogela kwa Timena go beola dinku tsa gagwe.”

¹⁴ Mme a apola diaparo tsa gagwe tsa botlholagadi, a ipipa ka losire lwa gagwe, a ipopaganya, a dula fa kgorong ya Enaime o o fa tseleng e e yang Timena; gonne a bona fa Shela a setse a godile, a sa mo neelwe go nna mosadi wa gagwe.

¹⁵ E rile Juta a mmona a ithaya a re, ke seaka; gonne o ne a ipipile sefatlhogo.

¹⁶ A fapogela kwa go ene fa tseleng a re: “Ke a go rapela, a re ye koo, o mme ke ye mo go wena;” gonne a sa itse fa e le ngwetsi wa gagwe. Mme a re: “O tlaa nnaya eng gore o tle o tle mo go nna.”

¹⁷ A re: “Ke tlaa go romela potsane ya dipodi e tswa kwa letsomaneng.” Mosadi a re: “A o tlaa mpeela sengwe o tle o tsamaye o bo o e tlise?”

¹⁸ Mme a re: “Ke tlaa go beela eng?” A re: “Sekano sa gago, le mogala wa sone, le thobane ya gago e e mo seatleng sa gago.” Mme a di mo neela, a ya mo go ene, a mo imisa.

¹⁹ Tamare a nanoga a tsamaya, a apola losire lwa gagwe, a apara diaparo tsa botlholagadi jwa gagwe.

²⁰ Juta a romela potsane ka seatla sa tsala ya gagwe ya Moadulame, gore a amogele peelo mo seatleng sa mosadi; mme a se ka a mo fitlhela.

²¹ Foo a botsa banna ba ga gabo mosadi, a re: “Se kae seaka se se neng se le kwa Enaime ka fa tseleng?” Ba re: “Ga go ise go ke go nne seaka mono.”

²² A boela kwa go Juta a re: “Ga ke a ka ka mo fitlhela; le bone banna ba felo foo ba re: ‘Ga go ise go ke go nne seaka mono.’ ”

²³ Juta a re: “A a se itseele, e se re gongwe ra tlhabisiwa ditlhong; bona, ke rometse potsane e, mme ga o a ka wa mo fitlhela.”

²⁴ Ga dirala ya re e ka ne e le dikgwedi di le tharo morago, ga bolelelwa Juta ga twe: “Tamare ngwetsi wa gago, o akafetse; le gone o moimana ka boaka.” Juta a re: “Mo ntshetseng kwa ntle, a fisiwe.”

²⁵ E rile a ntshediwa kwa ntle a roma kwa go matsalaagwe a re: “Ke ka monna yo dilo tse e leng tsa gagwe ke leng moimana ka ene; a ba a re ke a go rapela, sekaseka dilo tse, o bone gore ke tsa ga mang, sekano, le megala, le thobane?”

²⁶ Juta a di dumela a re: “Ee, tsa me;” a ba a re: “Ene o siame bogolo go nna: ka gobo ke se ka ka mo neela Shela morwaake.” Mme a se ka a ba a tlhola a mo itse.

²⁷ Ya re mo motlheng wa go belega ga gagwe, bonang, ga bo go le bana ba mafatlha mo sebopelong sa gagwe.

²⁸ Ga dirala ya re a iteka, mongwe a ntsha letsogo; mme mmelegisi a tsaya tlhale e khibidu a e bofelela mo letsogong la gagwe, a re: “Yo o dule pele.”

²⁹ Mme ya re a busa seatla, bonang, monnawe a tswa; mme mmelegisi a re: “O no o intsheletsang phatlha?” Ke gone ka moo leina la gagwe go tweng Perese.

³⁰ Morago ga tswa mogolowe yo o nang le tlhale e khibidu mo letsogong; mme a rewa leina ga twe, Sera.

39

¹ Josefe a isiwa kwa Egepeto. Potifare mogolwane wa ga Faro le kgosana ya maotlana, wa Moegepeto a mo reka mo seatleng sa Baišemaele ba ba mo isitseng gone.

² Jehofa a nna le Josefe, a ba a nna monna yo o tlhogonolofetseng, a nna mo ntlong ya mong wa gagwe wa Moegepeto.

³ Mong wa gagwe a bona fa Jehofa a na nae, le go re, Jehofa o tlhogonolofatsa dilo tsotlhe tse o di dirang.

⁴ Josefe a bona tsalano mo matlhong a gagwe, mme a mo direla; a mmaya molebalebi wa ntlo ya gagwe, le dilo tsotlhe tse o nang natso a di tsenya mo seatleng sa gagwe.

⁵ Ga dirala e sale ka lobaka lo o mmeileng molebalebi ka lone wa ntlo ya gagwe, le wa dilo tsotlhe tse a nang natso, Jehofa o na a segofatsa ntlo ya Moegepeto ka ntlha ya ga Josefe; mme tshegofatso ya ga Jehofa ya nna mo go tsotlhe tse a nang natso, mo ntlong le kwa nageng.

⁶ A lesa tsotlhe tse a nang natso mo seatleng sa ga Josefe; a sa itse sepe se a nang naso, fa e se dijo tse o di jang fela. Josefe a bo a le montle, a bopegile sentle.

⁷ Ga dirala ya re morago ga dilo tse, mogatsa mong wa gagwe a eletsa Josefe ka matlho; mme a re: “Robala le nna.”

⁸ Mme a gana, a raya mogatsa mong wa gagwe a re: “Bona, monngwake ga a itse sepe se se mo go nna mo ntlong, o tsentse tsotlhe tse a nang natso mo seatleng sa me;

⁹ mo ntlong e, ga go na ope yo o mogolo mo go nna, le gone ga a a baya sepe kwa ntle ga me, fa e se wena, ka gobo o le mosadi wa gagwe; kana foo bosula jo bogolo jo ke ka bo dira jang, ke leofela Modimo?”

¹⁰ Mme ya re a ntse a bua le Josefe ka malatsi go tlhomagana, a se ka a mo reetsa go rapama fa go ene le fa e le go nna nae.

¹¹ Ga dirala ya re ka lobaka loo Josefe a tsena mo ntlong go dira tiro ya gagwe; mme go ne go se na ope wa banna ba ntlo gone mo teng.

¹² Mosadi a mo phamola ka seaparo a re: “Robala le nna.” Josefe a tlogela seaparo sa gagwe mo seatleng sa mosadi a tshaba, a tswela kwa ntle.

¹³ Ga dirala ya re mosadi a bona fa a tlogetse seaparo sa gagwe mo seatleng sa gagwe, a bile a tshabetse kwa ntle,

¹⁴ a kua banna ba ntlo ya gagwe, a bua nabo, a re: “Bonang, o tsentse motho wa Mohebere mo go rona go re sotla; o ne a tsena kwa go nna gore a robale le nna, mme ka goa ka lentswe le legolo.

¹⁵ Ga dirala ya re a utlwa ke tsholetsa lentswe la me ke goa, a tlogela seaparo sa gagwe fa go nna a tshaba, a tswela kwa ntle.”

¹⁶ A baya seaparo sa gagwe fa go ene, ya ba ya tla mong wa gagwe a tla gae.

¹⁷ A bua nae ka mafoko a, a re: “Motlhanka wa Mohebere yo o mo tlisitseng mo go rona o ne a tsena kwa go nna go ntshotla.

¹⁸ Ga dirala e rile ke tsholetsa lentswe la me ke goa, a tlogela seaparo sa gagwe fa go nna a tshabela kwa ntle.”

¹⁹ Ga dirala ya re mong wa gagwe a utlwa mafoko a mosadi wa gagwe o a buang nae a re: “Motlhanka wa gago o ntirile jaana,” bogale jwa gagwe jwa tuka.

²⁰ Mong wa ga Josefe a mo tsenya mo ntlong ya kgolegelo, felo kwa bagolegwa ba kgosi ba golegelwang gone; a nna gone mo ntlong ya kgolegelo.

²¹ Jehofa a nna le Josefe, a mo supetsa pelonomi, a mo naya tsalano mo matlhong a modisa wa ntlo ya kgolegelo.

²² Modisa wa ntlo ya kgolegelo a tsenya bagolegwa botlhe ba ba mo ntlong ya kgolegelo mo seatleng sa ga Josefe; sengwe le sengwe se se dirwang gone ya nna ene modiri wa sone.

²³ Modisa wa ntlo ya kgolegelo ga a ka a tlhokomela sepe se se mo thateng ya ga Josefe ka gobo Jehofa a na nae; se o se dirang Jehofa a se tlhogonolofatsa fela.

40

¹ Ga dirala ya re morago ga dilo tse, motshola phafana wa kgosi ya Egepeto le moapei wa yone, ba kgopisa morena wa bone, kgosi ya Egepeto.

² Mme Faro a nna bogale le bagolwane ba gagwe ba babedi, e bong mogolo wa batshola diphafana le mogolo wa baapei.

³ A ba tsenya mo tisong mo ntlong ya kgosana ya maotlana, mo ntlong ya kgolegelo, felo kwa Josefe o golegilweng gone.

⁴ Kgosana ya maotlana a ba tsenya mo thateng ya ga Josefe, mme a ba direla; ba sala ba ntse mo tisong ka lobaka.

⁵ Mme ba lora toro boo babedi mo bosigong bo le bongwe fela, mongwe le mongwe ka fa phuthololong ya toro ya gagwe, motshola phafana le moapeedi wa kgosi ya Egepeto, ba ba golegilweng mo ntlong ya kgolegelo.

⁶ Josefe a tla a tsena kwa go bone ka moso, a ba leba, mme bonang, ba bo ba tlhontse.

⁷ Mme a botsa bagolwane ba ga Faro ba a nang nabo mo tisong, mo ntlong ya mong wa gagwe a re: “Ana lo tlhonyeditseng difatlhogo mo go kanakana gompieno?”

⁸ Ba mo raya ba re: “Re lorile toro, mme ga go na ope yo o ka e phuthololang.” Josefe a ba raya a re: “Diphuthololo a ga se tsa Modimo? Ke a lo rapela, e mpoleleleng.”

⁹ Motshola phafana yo mogolo a bolelela Josefe toro ya gagwe, a mo raya a re: “Mo torong ya me, bona, go ne go le mofine fa pele ga me;

¹⁰ mo mofineng ga bo go le dikala di le tharo; mme wa nna jaka e kete o a kukunya, le dithunya tsa one tsa, thunya; le masitlha a tswa mafine a a buduleng.

¹¹ Phafana ya ga Faro ya bo e le mo seatleng sa me; ka tsaya mafine ka a gamolela mo phafaneng ya ga Faro, ka neela Faro phafana mo seatleng.”

¹² Josefe a mo raya a re: “Phuthololo ya yone ke e: Dikala tse tharo ke malatsi a le mararo.

¹³ E tlaa re malatsi a ise a nne mararo Faro a tsholetse tlhogo ya gago, a go busetse kwa tirong ya gago; mme o tlaa neela Faro phafana mo seatleng, ka fa mokgweng wa gale, jaaka fa o sa ntse o le motshola phafana wa gagwe.

¹⁴ E tle e re o tshela sentle o nkgopole, ke a go rapela, o ntshupetse pelonomi o nkumake kwa go Faro, o ntseye ke tswe mo ntlong e.

¹⁵ Gonne ruri ke utswilwe ka ngwegisiwa mo lefatsheng la Bahebere; le gone mono ga ke a dira sepe se e ka bong e le fano ba ntsentse mo moleteng o ka ga sone.”

¹⁶ E rile moapei yo mogolo a bona fa phuthololo e le molemo, a raya Josefe a re: “Le nna ke ne ke le mo tirong, mme bona, diroto di le tharo tsa senkgwe se sesweu di ne di le mo tlhogong ya me.

¹⁷ Mo serotong se se kwa godimodimo ga bo go le dijo dingwe le dingwe tse di besitsweng tsa ga Faro; mme dinonyane tsa di ja di le mo serotong mo tlhogong ya me.”

¹⁸ Mme Josefe a mo fetola, a mo raya a re: “Phuthololo ya yone ke e: Diroto tse tharo ke malatsi a le mararo.

¹⁹ E tlaa re malatsi a ise a nne mararo Faro a tsholetse tlhogo ya gago a e tlose mo go wena, a go pege mo setlhareng; mme dinonyane di tlaa ja nama ya gago.”

²⁰ Ga dirala ya re ka letsatsi la boraro, e le letsatsi la botsalo jwa ga Faro, a direla batlhanka botlhe ba gagwe modiro, a tsholetsa tlhogo ya motshola phafana yo mogolo le tlhogo ya moapei yo mogolo mo gare ga batlhanka ba gagwe.

²¹ A busetsa motshola phafana yo mogolo mo go tsholeng phafana ga gagwe gape; mme a neela Faro phafana mo seatleng.

²² Moapei yo mogolo a mo pega; jaaka Josefe a ne a ba phuthololetse.

²³ Le fa go ntse jalo motshola phafana yo mogolo ga a ka a gakologelwa Josefe; a mo lebala fela.

41

¹ Ga dirala ya re kwa bokhutlong jwa dinyaga di le pedi tse di tletseng, Faro a lora, mme bonang a bo a eme fa nokeng.

² Mme bonang, ga tlhatloga dikgomo tse dinamagadi di supa mo nokeng di le mebele mentle, di nonne; tsa fula mo motlhakeng.

³ Morago ga tsone ga tlhatloga dikgomo tse dingwe tse dinamagadi di supa, di le mebele e maswe, di le mekoduwe, tsa ema fa dikgomong tse dingwe tse dinamagadi, fa losing lwa noka.

⁴ Dikgomo tse dinamagadi tse di mebele e maswe, tse di mekoduwe, tsa a ja tsa fetsa dikgomo tse dinamagadi tse di mebele mentle, tse di nonneng. Foo Faro a thanya.

⁵ A robala a ba a lora lwa bobedi; mme bona diako tsa mabele di supa tsa tswa mo lotlhakeng lo le longwe fela, di nonne, di le molemo.

⁶ Mme bonang, diako di supa, tse di se nang sepe, tse di tshubilweng ke phefo ya botlhabatsatsi, di tlhoga morago ga tsone.

⁷ Diako tse di swabileng tsa kometsa diako tse supa tse di nonneng tse di tletseng; Faro a thanya, a lemoga fa a ne a lora.

⁸ Ga dirala ya re ka moso mowa wa gagwe wa bo o fuduegile, ka moo a roma a bitsa dingaka tsotlhe tsa Egepeto, le ba botlhale botlhe ba gone. Faro a ba bolelela toro ya gagwe; mme ga bo go se na ope yo o ka e mo phuthololelang.

⁹ Foo, ga bua motshola phafana yo mogolo, a raya Faro a re: “Ke gakologelwa melato ya me gompieno.

¹⁰ Faro o kile a re a le bogale le batlhanka ba gagwe, a ntsenya mo tisong mo ntlong ya kgosana ya maotlana, nna le moapei yo mogolo.

¹¹ Ra lora toro mo bosigong bo le bongwe fela, nna le ene; ra lora mongwe le mongwe ka fa phuthololong ya toro ya gagwe.

¹² Ga bo go na le lekau gone le rona, la Mohebere, motlhanka wa kgosana ya maotlana; mme ra mmolelela, mme a re phuthololela ditoro tsa rona; a phuthololela mongwe le mongwe ka fa torong ya gagwe.

¹³ Ga dirala fela jaaka a re phuthololetse, ga nna fela jalo; nna a mpusetsa mo tirong ya me, ene a mo pega.”

¹⁴ Foo Faro a roma a bitsa Josefe, mme ba mo ntsha ka potlako mo moleteng, mme a ipeola, a apara diaparo di sele, a ya a tsena kwa go Faro.

¹⁵ Faro a raya Josefe a re: “Ke lorile toro, mme ga go na ope yo o ka e mphuthololelang; ke utlwile ka ga gago ga twe, e a re fa o utlwa toro o e phutholole.”

¹⁶ Josefe a fetola Faro a re: “Ga go yo mo go nna; Modimo o tlaa naya Faro phetolo ya kagiso.”

¹⁷ Faro a raya Josefe a re: “Mo torong ya me, bona, ke ne ke eme fa losing lwa noka.

¹⁸ Mme bona, ga tlhatloga dikgomo tse dinamagadi di supa mo nokeng, di nonne di le mebele mentle; tsa fula mo motlhakeng.

¹⁹ Mme bona, dikgomo tse dinamagadi di supa tsa tlhatloga morago ga tsone, di le mekoduwe, di le mebele e maswe thata, di le lopatiko, tse ke iseng ke ke ke bone tse di tshwanang natso gope mo lefatsheng lotlhe la Egepeto ka bomaswe jwa tsone.

²⁰ Dikgomo tse dinamagadi, tse di mekoduwe tse di mebele e maswe, tsa a ja tsa swetsa dikgomo tse dinamagadi tsa pele tse di nonneng.

²¹ E rile di sena go di ja di di swetsa, go ne go sa ka ke ga itsiwe fa di di jele; tsa bo di sa ntse di le mebele e maswe jaaka mo tshimologong. Foo ka thanya.

²² Ka bona mo torong ya me, bonang, go tswa diako di supa mo lotlhakeng lo le longwe fela, di tletse, di le molemo.

²³ Mme bona, diako di supa tse di swabileng, tse di se nang sepe, di tshubilwe ke phefo ya botlhabatsatsi, tsa tlhoga morago ga tsone.

²⁴ Diako tse di se nang sepe tsa kometsa diako tse supa tse dintle; mme ka e bolelela dingaka, ga bo go se na ope yo o ka e nthanolelang.”

²⁵ Josefe a raya Faro a re: “Toro ya ga Faro nngwe fela; se Modimo o tlogang o se dira, o se boleletse Faro.

²⁶ Dikgomo tse dinamagadi, tse supa, tse di molemo, ke dinyaga di supa; le diako tse supa tse di molemo, ke dinyaga di supa; toro nngwe fela.

²⁷ Dikgomo tse dinamagadi tse di mekoduwe, tse di mebele a maswe, tse di tlhatlogileng morago ga tsone, ke dinyaga di supa, le tsone diako tse di se nang sepe, tse di tshubilweng ke phefo ya botlhabatsatsi, di tlaa nna dinyaga di supa tsa leuba.

²⁸ Ke sone se ke se buileng le Faro; se Modimo o tlogang o se dira o se supeditse Faro.

²⁹ Bona, go tla dinyaga di supa tsa letlotlo le legolo la dijo mo lefatsheng lotlhe la Egepeto.

³⁰ Morago ga tsone go tlaa tsoga dinyaga di supa tsa leuba; letlotlo lotlhe le tlaa lebalwa mo lefatsheng la Egepeto; mme leuba le tlaa fedisa lefatshe.

³¹ Letlotlo ga le ketla le itsiwe mo lefatsheng ka ntlha ya leuba leo le le le latelang; ka le tlaa nna botlhoko thata.

³² E re ka toro e le sebedi e diretswe Faro gabedi, ke ka gonne selo se se tlhomamisitswe ke Modimo, Modimo o tlaa akofa o se dirafatsa.

³³ “Ke gone jaana, a Faro a lebalebe monna yo o tlhaloganyang, yo o botlhale, a mo tlhome go nna tlhogo ya lefatshe la Egepeto.

³⁴ A Faro a dire mo, a tlhome balebalebedi ba lefatshe, ba tseye sa botlhano sa lefatshe la Egepeto ka dinyaga tse supa tsa letlotlo.

³⁵ Ba kgobokanye dijo tsotlhe tsa dinyaga tse di molemo, tse di tlang, ba phuthele mabele mo seatleng sa ga Faro, go nna dijo mo metseng, mme ba a boloke.

³⁶ Dijo tse di tlaa nna sebolokelwa lefatshe, go lebelela dinyaga tse di supang tsa leuba, tse di tlaa nnang mo lefatsheng la Egepeto; gore lefatshe le se ka la nyelela ka leuba.”

³⁷ Selo se sa nna molemo mo matlhong a ga Faro le mo matlhong a batlhanka botlhe ba gagwe.

³⁸ Faro a raya batlhanka ba gagwe a re: “A re ka bona mongwe yo o ntseng jaaka yo, e le monna yo mowa wa Modimo o ntseng mo go ene?”

³⁹ Faro a raya Josefe a re: “E re ka Modimo o go supeditse tsotlhe tse, ga go na ope yo o tlhaloganyang le fa e le yo o botlhale jaaka wena.

⁴⁰ O tlaa nna tlhogo ya ntlo ya me: batho botlhe ba me ba tlaa laolwa ka fa lefokong la gago; fa e se mo setulong sa bogosi fela, ke tlaa nna mogolo mo go wena.”

⁴¹ Faro a raya Josefe a re: “Bona, ke go tlhomile go nna tlhogo ya lefatshe lotlhe la Egepeto.”

⁴² Faro a rola lenyena le le kanang mo seatleng sa gagwe, a le rwesa Josefe mo seatleng, a mo apesa diaparo tsa leloba le le boleta, a ba a mo apesa mpolokwane wa gouta ma thamong ya gagwe.

⁴³ A mo palamisa kara ya bobedi e o nang nayo; mme ba goa fa pele ga gagwe ba re: “Khubamang ka mangole;” a mo tlhoma go nna tlhogo ya lefatshe lotlhe la Egepeto.

⁴⁴ Faro a raya Josefe a re: “Ke nna Faro, kwa ntle ga gago ga go ketla go tsholetsa ope letsogo la gagwe le fa e le lonao lwa gagwe mo lefatsheng lotlhe la Egepeto.”

⁴⁵ Faro a raya Josefe leina a re, Safenathe-panea; a mo naya Asenathe morwadia Potifera, moperesiti wa One, go nna mosadi wa gagwe. Josefe a tswa a ralala-ralala lefatshe la Egepeto.

⁴⁶ Josefe o rile a ema fa pele ga Faro kgosi ya Egepeto a bo a le dinyaga di le 30. Mme Josefe a tswa fa pele ga Faro, a ya a ralala-ralala lefatshe lotlhe la Egepeto.

⁴⁷ Ya re mo dinyageng tse di supang tsa letlotlo lefatshe la ungwa ka thata e kgolo.

⁴⁸ A kgobokanya dijo tsotlhe tse di mo lefatsheng la Egepeto tsa dinyaga tseo tse di supang, a baya dijo tseo mo metseng; dijo tsa naga e e tikologong ya motse mongwe le mongwe a di beye mo motseng oo.

⁴⁹ Josefe a kgobokanya mabele a nna jaaka mošawa wa lewatle, a le magolo thata, a ba a tla a lesa go bala; gonne a ne e se na palo.

⁵⁰ Josefe a bona bana ba basimane ba le babedi ngwaga wa leuba o ise o tle, ba Asenathe morwadia Potifera, moperesiti wa One, a ba bonyeng nae.

⁵¹ Josefe a raya wa ntlha leina a re Manase; gonne a re: “Modimo o ntebaditse letsapa lotlhe la me le ntlo yotlhe ya ga rre.”

⁵² A raya wa bobedi leina a re Eferaime; gonne a re: “Modimo o nkungwisitse mo lefatsheng la pogiso ya me.”

⁵³ Dinyaga tse, tse di supang tsa letlotlo le le mo lefatsheng la Egepeto, tsa khutla.

⁵⁴ Dinyaga tse di supang tsa leuba tsa simolola go tla, ka fa Josefe o buileng ka gone; mme ga nna leuba mo mafatsheng otlhe; mme mo lefatsheng la Egepeto ga bo go na le dijo.

⁵⁵ E rile lefatshe lotlhe la Egepeto le bolailwe ke tlala, batho ba ikuela Faro, ba batla dijo. Faro a raya Baegepeto botlhe a re: “Yang kwa go Josefe; se o se lo rayang lo se dire.”

⁵⁶ Leuba la bo le wetse lefatshe lotlhe fela; mme Josefe a bula matlo otlhe a a boloketseng, a rekisa mo go Baegepeto; mme leuba la nna botlhoko mo lefatsheng la Egepeto.

⁵⁷ Mafatshe otlhe a ya kwa Egepeto kwa go Josefe go reka mabele; ka gobo leuba le ne le le botlhoko mo lefatsheng lotlhe fela.

42

¹ Jakobe a bona fa go na le mabele kwa Egepeto; mme a raya bomorwawe a re: “Lo lebanelang?”

² A re: “Bonang, ke utlwile fa go na le mabele kwa Egepeto; fologelang gone, lo re rekele mabele gone, gore re tle re tshele, re se ka ra a swa.”

³ Bomogoloa Josefe ba ba some ba bolola ba ya go reka mabele kwa Egepeto.

⁴ Mme Benjamine, monnaa Josefe, Jakobe ga a ka a mo roma le bomogolowe gonne a re, e se re kgotsa tatlhego ya mo wela.

⁵ Bomorwa Iseraele ba ya go reka ba tlhakana le ba ba yang gone, gonne leuba le ne le le mo lefatsheng la Kanana.

⁶ Josefe e ne e le molaodi wa lefatshe; ya bo e le ene yo o rekisang mo bathong botlhe ba lefatshe. Bomogoloa Josefe ba tla ba mo ikobela fa fatshe ka difatlhogo tsa bone.

⁷ Mme Josefe a bona bomogolowe, mme a ba itse, mme a ipaya moeng mo go bone, a bua nabo ka thata. A ba raya a re: “Lo tswa kae?” Ba re: “Re tswa kwa lefatsheng la Kanana, re tsile go reka dijo.”

⁸ Josefe a bo a itse bomogolowe; mme bone ba se ka ba mo itse.

⁹ Josefe a gakologelwa ditoro tse o kileng a di lora ka ga bone, mme a ba raya a re: “Lo ditlhola fela; lo tsile gore lo bone bosaikategang jwa lefatshe.”

¹⁰ Ba mo raya ba re: “Nnyaa, morena wa me, batlhanka ba gago ba tsile go reka dijo.

¹¹ Rotlhe re bomorwa monna a le mongwe fela; re banna ba mmaanete, batlhanka ba gago ga se ditlhola.”

¹² A ba raya a re: “Nnyaa, lo tsile gore lo bone bosaikategang jwa lefatshe fela.”

¹³ Ba re: “Rona batlhanka ba gago re bana ba le 12, re bomorwa monna a le mongwe fela kwa lefatsheng la Kanana; mme bona, yo mmotlana gompieno o na le rraarona, yo mongwe ga a yo.”

¹⁴ Josefe a ba raya a re: “Aitse ke sone se ke se buileng le lona ka re lo ditlhola.

¹⁵ Lo tlaa lekwa ka mo; ka botshelo jwa ga Faro ga lo ketla lo tswa mono fa monnaa lona yo mmotlana a sa tle kwano pele.

¹⁶ Romang mongwe wa lona a ye go tlisa monnaa lona, lona lo tlaa golegwa, gore mafoko a lona a lekwe boo go na le boammaaruri mo go lona; fa go sa nna jalo, ke ikana ka botshelo jwa ga Faro lo tla bo lo le ditlhola ruri.”

¹⁷ A ba tsenya botlhe mmogo mo tisong ka malatsi a le moraro.

¹⁸ Ka letsatsi le boraro Josefe a ba raya a re: “Dirang se, lo tshele; gonne nna ke boifa Modimo.

¹⁹ A e re fa lo le banna ba mmaanete, a mongwe wa bomorwa rraa lona a golegelwe mo ntlong ya lona ya kgolegelo; lona lo tsamaye lo isetse tlala ya matlo a lona mabele.

²⁰ Lo lere monnaa lona yo mmotlana kwano go nna; jalo mafoko a lona a tlaa bo a le mabolelela ruri, ga lo ketla loo swa.” Ba dira jalo.

²¹ Ba raana ba re: “Ruri re molato ka ga monnaa rona, jaaka e rile re bona tlalelo ya mowa wa gagwe jale, ka a re rapela, ra gana go utlwa; ke gone ka fa tlalelo e e tsileng mo go rona ka gone.”

²² Rubene a ba fetola a re: “A ga ke a ka ka lo raya jale ka re: ‘Se leofeleng ngwana,’ mme lwa gana go utlwa? Ke gone, bonang, madi a gagwe a a lopiwa.”

²³ Ba bo ba sa itse fa Josefe a ba utlwa, gonne go ne go na le mofetoledi wa puo gare ga bone.

²⁴ Mme a ba fularela, a lela; a boela kwa go bone, a bua nabo, mme a tshwara Simeone a mo tsaya mo go bone, a mo golega fa pele ga matlho a bone.

²⁵ Foo Josefe a laola gore dilwana tsa bone di thelwe mabele di tlale, le gore madi a mongwe le mongwe a rebolelwe mo kgetseng ya gagwe, le gore ba fiwe mofago; ba ba direla jalo.

²⁶ Ba belesa mabele mo dieseleng, ba tswa gone ba tsamaya.

²⁷ E rile mongwe wa bone a bofolola kgetse ya gagwe go fa esela ya gagwe dijo ba le felong fa ba lalang gone, a kwaa madi a gagwe; mme bonang, a bo a le mo molomong wa kgetse ya gagwe.

²⁸ A raya bomorwa rraagwe a re: “Madi a me a rebotswe, mme bonang, a mo kgetsing ya me”; mme pelo tsa bone tsa sula, ba lebana, ba roroma ba re: “Selo se ke eng, se Modimo o se re diretseng?”

²⁹ Mme ba fitlha kwa go Jakobe rraabo mo lefatsheng la Kanana, ba mmolelela tsotlhe tse di ba diraletseng; ba re:

³⁰ “Monna yole, morena wa lefatshe lele, a bua le rona ka thata, a ba a re, re ditlhola tsa lefatshe.

³¹ Ra mo raya ra re: ‘Re banna ba mmaanete; ga re ditlhola;

³² re bana ba le 12 ba monna, re bomorwa rraa rona; mongwe ga a yo, yo mmotlana gompieno o na le rraa rona kwa lefatsheng la Kanana.’

³³ Monna yole morena wa lefatshe leo, a re raya a re: ‘Ke tlaa itse ka moo lo le banna ba mmaanete; tlogelang mongwe wa bomorwa rraeno le nna, lo isetse tlala ya matlo a lona mabele, mme lo tsamaye.

³⁴ Lo lere monnaa lona yo mmotlana kwano go nna, foo ke tlaa itse fa lo se ditlhola, lo le banna ba mmaanete; jalo ke tlaa lo neela morwa rraa lona, lo tlaa nna lo bapala mo lefatsheng.’ ”

³⁵ Ga dirala ya re ba ntsha mabele mo dikgetseng tsa bone, bonang, phuthela ya madi a mongwe le mongwe ya bo e le mo kgetseng ya gagwe. Ba re ba bona, le rraabo a bona diphuthela tsa madi, ba tshoga.

³⁶ Jakobe rraabo, a ba raya a re: “Nna lo nthopile bana; Josefe ga a yo, le Simeone ga a yo, lo bile lo rata go tlosa Benjamine; dilo tse tsotlhe di nkwela maswe.”

³⁷ Rubene a raya rraagwe a re: “E tlaa re fa ke sa mo tlise kwano go wena, o tle o bolaye bomorwaake ba babedi; mo tsenye mo tisong ya me fela, ke tlaa ba ke mo tlisa mo go wena gape.”

³⁸ Mme a re: “Morwaake ga a ketla a fologa le lona; gonne mogolowe o sule, ke ene esi yo o setseng. E tlaa re fa tatlhego e mo wela mo tseleng e lo e tsamayang foo moriri wa me o o thuntseng lo tlaa o folosetsa ka bohutsana mo phupung.”

43

¹ Leuba le ne le le botlhoko mo lefatsheng.

² Ga dirala ya re ba sena go ja ba swetsa mabele a ba tsileng nao kwa Egepeto, rraabo a ba raya a re: “Yang gape, lo re rekele dijonyana.”

³ Juta a bua nae a re: “Monna yole o ne a re tlhomamiseletsa ruri a re: ‘Ga lo ketla lo bona sefatlhogo sa me fa monnaa lona a sa tle le lona.’

⁴ Fa o ka lesa monnaa rona ra tsamaya nae, re tlaa fologa re go rekela dijo.

⁵ Fa o sa mo lese, ga re nka re fologa; gonne monna yole o re reile a re: ‘Ga lo nka lo bona sefatlhogo sa me fa monnaa lona a sa tle le lona.’ ”

⁶ Iseraele a re: “Ana lo ne lo ntirelelang bosula lo bolelela monna yoo fa lo sa na le mongwe monnaa lona?”

⁷ Ba re: “Monna yoo o re boditse thata ka ga rona ka rosi, le ka ba ga rona a re: ‘A rraeno o sa tshedile? A lo sa na le mongwe monnaa lona?’ Ra mmolelela ka fa mafoko ao a ne a ntse ka gone; a re ne re ka itse fa a tlaa re raya a re: ‘Lo tle le monnaa lona’?”

⁸ Juta a raya Iseraele rraagwe a re: “Lesa mosimane ke tsamaye nae, re tlaa tloga re tsamaya, gore re tshele, re se ka ra a swa, rona le wena, le bone banyana ba rona.

⁹ Nna ke tlaa tlhomamisa pabalesego ya gagwe; o tlaa mo lopa mo seatleng sa me. E tlaa re fa ke sa tle nae ka mmaya fa pele ga gago, foo molato o tlaa bo o ntshwere ka bosakhutleng.

¹⁰ Gonne fa re ka bo re ne re sa ka ra diega, ruri re ka bo re bile re boile lwa bobedi.”

¹¹ Rraabo Iseraele a ba raya a re: “Fa go ntse jalo, a lo ko lo dire jaana; lo tsee maungo a a tlhophegileng a lefatshe mo dilwaneng tsa lona, lo isetse monna yoo mpho, balemonyana, le dinotshenyana, le dilo tse di lonko lo monate, tsa malao le mura, le dinuta, le dithamane.

¹² Lo tseye madi sebedi mo seatleng sa lona; madi a lo neng lo a reboletswe mo melomong ya dikgetse tse tsa lona, lo a tshole gape mo atleng sa lona; e tlaa re gongwe e bo e ne e le go a tlodisa matlho fela.

¹³ Le gone ene monnaa lona lo mo tseye, lo nanoge, lo ye kwa go monna yoo.

¹⁴ Modimo Mothatayotlhe a lo neye kutlwelo botlhoko fa pele ga monna yoo, gore a tle a lo gololele morwa rraeno yo mongwe le Benjamine. Mme fa ke thopiwa bana ba me, ke a thopiwa.”

¹⁵ Banna ba, ba tshola mpho, ba ba ba tshola madi sebedi mo seatleng sa bone, le Benjamine; ba nanoga ba fologela kwa Egepeto, ba ema fa pele ga Josefe.

¹⁶ E rile Josefe a bona fa Benjamine a na nabo, a raya molebalebi wa ntlo ya gagwe a re: “Isa banna bao mo ntlong; o tlhabe, o etleetse, gonne banna bao ba tlaa ja le nna motshegare o mogolo.”

¹⁷ Monna yo a dira jaaka Josefe a buile; mme monna yo a isa banna ba mo ntlong ya ga Josefe.

¹⁸ Banna ba, ba boifa, ka gobo ba isiwa mo ntlong ya ga Josefe; ba re: “Re isiwa mo ntlong ka ntlha ya madi a re a reboletsweng mo dikgetseng tsa rona lwa ntlha, gore a re bonele seipato, a itse go re wela, a re ntsha batlhanka, le diesela tsa rona a di gapa.”

¹⁹ Ba atamela molebalebi wa ntlo ya ga Josefe, ba bua nae fa mojakong wa ntlo.

²⁰ Ba re: “Ao morena, re kile ra tla ruri lwa ntlha go reka dijo.

²¹ Ga dirala, e rile re fitlha felo kwa re lalang gone, ra bofolola dikgetse tsa rona, mme bona, madi a mongwe le mongwe a bo a le mo molomong wa kgetse, madi a rona a le selekanyo se se tletseng; re bile re a tshotse gape mo seatleng sa rona.

²² Le madi a mangwe re tsile nao go tla go reka dijo; ga re itse yo o tsentseng madi a rona mo dikgetseng tsa rona.”

²³ Mme a re: “A kagiso e nne le lona, se boifeng. Modimo wa lona, le Modimo wa ga rraeno o lo neile khumo mo dikgetseng tsa lona; ke ne ka amogela madi a lona.” Mme a ntshetsa Simeone kwa go bone.

²⁴ Monna yo a isa banna bao mo ntlong ya ga Josefe, a ba naya metsi, ba itlhapisa dinao; a ba a fa diesela tsa bone dijo.

²⁵ Ba baakanya mpho ya bone ba lebelela go tla ga Josefe motshegare o mogolo; gonne ba utlwile fa ba tlaa ja dijo gone.

²⁶ E rile Josefe a tla gae, ba isa mpho e ba e tshotseng kwa go ene mo ntlong, ba mo ikobelela fa fatshe.

²⁷ A ba botsa go tshela ga bone a re: “A rraeno o sa tshedile, ke raya monnamogolo yo lo kileng lwa bua ka ga gagwe, a o sa tshedile?”

²⁸ Ba re: “Motlhanka wa gago rraa rona o tshedile sentle, o sa ntse a tshela.” Mme ba oba ditlhogo tsa bone, ba ikokobetsa.

²⁹ A tsholetsa matlho a gagwe, a bona Benjamine, monnawe, ngwana wa ga mmaagwe a re: “A yo ke ene monnaa lona yo mmotlana, yo lo mo mpoleletseng?” Mme a re: “A Modimo o nne pelontle nao morwaaka.”

³⁰ Josefe a akofa, ka gobo mateng a gagwe a hohomela monnawe; a senka fa o ka lelelang gone; a tsena mo ntlong ya gagwe e e kwa teng, a lelela gone.

³¹ Mme a tlhapa sefatlhogo, a tswa; a ithiba, a re: “Tsholang dijo.”

³² Ene ba mo tsholela a le esi, le bone ba tsholelwa ba le bosi, le bone Baegepeto ba ba jang nae, ba le bosi; gonne Baegepeto ba ne ba sa ka ke ba a ja dijo le Bahebere; gonne moo, ke moila mo go Baegepeto.

³³ Ba dula fa pele ga gagwe, wa ntlha ka fa go tsalweng ga gagwe, le yo mmotlana ka fa bobotlaneng jwa gagwe; banna ba, ba gakgamalelana.

³⁴ A tloga a ba tabolela dijo, tsa isiwa kwa go bone; tse di tabolelwang Benjamine tsa bo di le kana ka tsa ba bangwe ba le batlhano. Ba a nwa, ba dira mokete nae.

44

¹ A laola molebalebi wa ntlo ya gagwe a re: “Thela mabele mo dikgetseng tsa banna bao, ka fa ba nonofileng go tsaya ka gone, o tsenye madi a mongwe le mongwe mo molomong wa kgetse ya gagwe.

² Senwelo sa me, senwelo sa selefera, o se tsenye mo molomong wa kgetse ya yo mmotlana, le madi a gagwe a mabele.” A dira ka fa lefokong le Josefe o le buileng.

³ E rile bosigo bo sena go sa, banna bao ba newa tsela, bone le diesela tsa bone.

⁴ E rile ba sena go tswa mo motseng, ba ise ba ye kgakala, Josefe a raya molebalebedi wa gagwe a re: “Nanoga o latele banna bale; o tlaa re o ba tshwara, o ba reye o re: ‘Ana lo dueletseng molemo ka bosula?

⁵ A ga se sone se morena wa me o nwelang mo go sone, e bile e le sone, ruri, bola jo o laolang ka jone? Lo dirile bosula ka go dira jalo.’ ”

⁶ Mme a ba tshwara, a bua mafoko a nabo.

⁷ Ba mo raya ba re: “Morena wa rona, o buelang mafoko a a ntseng jaana? A go se tualo go re, batlhanka ba gago ba ka dira se se ntseng jalo.

⁸ Bona, madi a re a fitlhetseng mo melomong ya dikgetse tsa rona, ra ba ra a tlisa gape kwa go wena re tswa lefatsheng la Kanana; ana foo re ne re tlaa utswa jang selefera le fa e le gouta mo ntlong ya morena wa gago?

⁹ Le fa e le mang wa batlhanka ba gago yo se tlaa bonwang mo go ene a a swe, le rona re nne batlhanka ba morena wa rona.”

¹⁰ Mme a re: “Jaana le gale a go nne ka fa mafokong a lona; ene yo se tlaa bonwang mo go ene, o tlaa nna motlhanka wa me, lona lo tlaa bo lo se na molato.”

¹¹ Foo ba akofa, mongwe le mongwe a pagolola kgetse ya gagwe a e baya fa fatshe, mme mongwe le mongwe a bofolola kgetse ya gagwe.

¹² A hukutsa, a simolola ka yo mogolo, a khutla ka yo mmotlana; mme senwelo sa fitlhelwa mo kgetseng ya ga Benjamine.

¹³ Foo ba ikgagola diaparo, mongwe le mongwe a belesa esela ya gagwe, ba boela kwa motseng.

¹⁴ Juta le bomorwa rraagwe ba fitlha kwa ntlong ya ga Josefe, mme a bo a sa ntse a le gone; mme ba wela fa fatshe fa pele ga gagwe.

¹⁵ Josefe a ba raya a re: “Ana tiro e lo e dirileng ke efe? A ga lo itse fa ruri motho yo o ntseng jaaka nna a ka laola ka bola?”

¹⁶ Juta a re: “Re tlaa bua le morena wa me re reng? Ana re tlaa buang, kgotsa re tlaa ikgolola jang mo molatong? Modimo o tshwere boleo jwa batlhanka ba gago; bona, re batlhanka ba gago morena, rona le ene yo senwelo se bonyweng mo seatleng sa gagwe.”

¹⁷ Mme a re: “A go se tualo, gore ke ka dira jalo; monna yo senwelo se bonyweng mo seatleng sa gagwe, ene o tlaa nna motlhanka wa me; ka ga lona, tlhatlogelang kwa go rraa lona ka kagiso.”

¹⁸ Foo Juta a atamela fa go ene a re: “Morena wee, ke a go rapela, a ko o mme motlhanka wa gago a bue lefoko mo ditsebeng tsa morena wa me, a bogale jwa gago bo se tukele motlhanka wa gago; gonne o ntse fela jaaka Faro.

¹⁹ Morena wa me o kile a botsa batlhanka ba gagwe a re: ‘A lo na le rraeno, le fa e le monnaa lona?’

²⁰ Ra raya morena wa me ra re: ‘Re na le rraa rona, monnamogolo, o na le ngwana wa botsofe jwa gagwe, yo monnye; mogolowe o sule, mme o setse a le esi wa ga mmaagwe, rraagwe o a mo rata.’

²¹ Mme wa raya batlhanka ba gago wa re: ‘Lo tle nae kwano go nna gore ke mmone.’

²² Ra raya morena wa me ra re: ‘Mosimane ga a ka ke a tlogela rraagwe; gonne e tlaa re fa a ka tlogela rraagwe, rraagwe o ka swa.’

²³ Wena wa raya batlhanka ba gago wa re: ‘Fa monnaa lona yo mmotlana a sa tle le lona, ga lo ketla lo tlhola lo bona sefatlhogo sa me.’

²⁴ “Mme ya re re fitlha kwa go rre motlhanka wa gago, ra mmolelela mafoko a morena wa me.

²⁵ Mme rraetsho a re: ‘Yang gape, lo re rekele dijonyana.’

²⁶ Ra re ga re ka ke ra fologa; fa monnaa rona yo mmotlana re sa ye nae, foo ga re nka re fologa; gonne ga re ka ke ra bona sefatlhogo sa monna yole fa monnaa rona yo mmotlana re sa na nae.

²⁷ Motlhanka wa gago rre, a re raya a re: ‘Lo a itse fa mosadi wa me a ne a bona bana ba basimane ba le babedi le nna,

²⁸ mme yo mongwe a tswa mo go nna, mme ka re ruri o gagogantswe; e sa le jalo ga ke ise ke be ke mmone.

²⁹ Fa lo ntseela yo le ene, mme tatlhego e mo wela, lo tlaa folosetsa moriri wa me o o thuntseng ka bohutsana mo phupung.’

³⁰ “Ke gone jaana e tlaa re ke fitlha kwa go motlhanka wa gago rre, mosimane re se na nae, e re ka botshelo jwa gagwe bo bofilwe mmogo le botshelo jwa mosimane,

³¹ go tlaa dirala gore e tlaa re a bona fa mosimane re se na nae, foo a swe; batlhanka ba gago ba folosetse moriri o o thuntseng wa motlhanka wa gago rraetsho, ka bohutsana mo phupung.

³² Gonne nna motlhanka wa gago ka ipaya boipeelo jwa mosimane kwa go rre, ka re: ‘Fa ke sa mo tlise kwa go wena, foo ke tlaa bo ke tshwerwe ke molato mo go rre ka bosakhutleng.’

³³ Ke gone jaana, ke a go rapela, a motlhanka wa gago a sale boemong jwa mosimane, ke nne motlhanka mo go morena wa me; mme a mosimane a tlhatloge le bomogolowe.

³⁴ Gonne ke tlaa tlhatlogela jang kwa go rre, mosimane ke se na nae? Ke raya gore ke tle ke se ka ka bona bosula jo bo tlaa welang rre.”

45

¹ Foo Josefe a palelwa ke go itshwara fa pele ga botlhe ba ba emeng fa go ene, mme a kua a re: “Ntshang banna botlhe ba tswe fa go nna.” Mme ga se ka ga ema ope nae fa Josefe a ikitsise bomorwa rraagwe.

² A tsholetsa lentswe la gagwe ka selelo; mme Baegepeto ba utlwa, le ntlo ya ga Faro ya utlwa.

³ Josefe a raya bomorwa rraagwe a re: “Ke nna Josefe; a rre o sa ntse a tshedile?” Bomorwa rraagwe ba retelelwa ke go mo fetola; gonne ba huduilwe ke go mmona.

⁴ Josefe a raya bomorwa rraagwe a re: “Ke a lo rapela, a ko lo nkatamele.” Ba atamela. Mme a re: “Ke Josefe, monnaa lona, yo lo mo rekisitseng a tlisiwa Egepeto.

⁵ Jaana lo se ka lwa hutsafala le fa e le go ikgalefela ka gobo lo ne lwa nthekisa ka tla kwano; gonne Modimo o nthomile fa pele ga lona go boloka botshelo.

⁶ Gonne leuba le dikile le ntse dinyaga tse pedi tse mo lefatsheng; go sa na le dinyaga di le tlhano tse go se ketlang go nna le letsema le fa e le thobo mo go tsone.

⁷ Modimo o nthomile pele ga lona go lo bolokela masalela mo lefatsheng, le go lo tshetsa ka kgololo e kgolo.

⁸ Jalo e ne e se lona ba lo ntlisitseng kwano, e ne e le Modimo; mme o ntirile go nna rraagwe Faro, le morena wa ntlo yotlhe ya gagwe, le molaodi wa lefatshe lotlhe la Egepeto.

⁹ “Itlhaganeleng, lo tlhatlogele kwa go rre, lo mo reye lo re: ‘Morwao Josefe o bua jaana a re: Modimo o ntirile morena wa lefatshe la Egepeto lotlhe fela, hudugela kwano go nna, o se ka wa diega.

¹⁰ O tlaa aga mo lefatsheng la Gošene; o tlaa nna gaufi le nna, wena, le bana ba gago, le bana ba bana ba gago, le matsomane a gago, le matlhape a gago, le tsotlhe tse o nang natso.

¹¹ Ke tlaa go otlela gone; gonne go sa ntse go na le dinyaga di le tlhano tsa leuba; e se re gongwe wa humanega, wena, le ba ntlo ya gago le tsotlhe tse o nang natso.’

¹² “Mme, bonang, matlho a lona a a bona, le matlho a ga nnake Benjamine, fa e le molomo wa me o o buang le lona.

¹³ Lo bolelele rre ka ga kgalalelo yotlhe ya me mo Egepeto, le ka ga tsotlhe tse lo di bonyeng; mme rre lo akofe lo mo lere kwano.”

¹⁴ A wela mo thamong ya ga Benjamine monnawe, a lela a le mo thamong ya gagwe.

¹⁵ A atla bomorwa rraagwe botlhe, a lelela mo go bone; morago ga mo, bomorwa rraagwe ba bua nae.

¹⁶ Tumo ya gone ya utlwala mo ntlong ya ga Faro, ga twe: “Bomorwa rraagwe Josefe ba tsile;” mme ga kgatlha Faro thata le batlhanka ba gagwe.

¹⁷ Foo Faro a raya Josefe a re: “Raya bomorwa rraago o re: ‘Dirang se: Belesang dipelesa tsa lona, lo tsamaye, lo ye kwa lefatsheng la Kanana.

¹⁸ Lo tseye rraeno le ba matlo a lona, lo tle kwano go nna; ke tlaa lo naya molemo wa lefatshe la Egepeto, lo tlaa ja mafura a lefatshe.’

¹⁹ Jaanong o laotswe, lona dirang jaana; lo tseele banyana ba lona le basadi ba lona dikoloi mo lefatsheng la Egepeto, lo lere rraeno lo tle.

²⁰ Le gone se tlhokomeleng thoto ya lona gonne molemo wa lefatshe la Egepeto ke wa lona.”

²¹ Bomorwa Iseraele ba dira jalo; Josefe a ba neela dikoloi, ka fa taolong ya ga Faro, a ba a ba naya mefago.

²² Botlhe fela, a naya mongwe le mongwe diaparo tsa go fapaanya, Benjamine ene a mo naya dipapetla tsa selefera di le makgolo mararo le diaparo di le tlhano tsa go fapaanya.

²³ Tsa ga rraagwe a di ba neelela jaana; e bong diesela di le some di belesitswe dilo tse di monate tsa Egepeto, le diesela tse dinamagadi di le some di belesitswe mabele le senkgwe le dijo tse rraagwe o tlaa di jelang mo tseleng.

²⁴ Jalo a naya bomorwa rraagwe tsela, ba tsamaya; a ba raya a re: “Lo bone gore lo se omane mo tseleng.”

²⁵ Ba tswa mo Egepeto, ba tla mo lefatsheng la Kanana kwa go Jakobe rraabo.

²⁶ Ba mmolelela ba re: “Josefe o sa tshedile e bile o molaodi wa lefatshe lotlhe la Egepeto.” Pelo ya gagwe ya idibala, gonne a sa ba dumele.

²⁷ Ba mmolelela mafoko otlhe a ga Josefe a o a buileng nabo; o rile a bona dikoloi tse Josefe o di rometseng go mo tsaya ka tsone, mowa wa ga Jakobe rraabo wa idibologa.

²⁸ Iseraele a re: “Go lekanye; Josefe morwaake o sa tshedile; ke tlaa ya ke mmona ke ise ke swe.”

46

¹ Iseraele a ineela mo loetong le tsotlhe tse o nang natso, mme a fitlha kwa Beerešeba, a isetsa Modimo wa ga Isake rraagwe ditlhabelo gone.

² Modimo wa bua le Iseraele ka diponatshegelo tsa bosigo wa re: “Jakobe, Jakobe!” a re: “Ke fano.”

³ Wa re: “Ke nna Modimo, Modimo wa ga rraago; o se ka wa boifa go hudugela kwa Egepeto; gonne ke tlaa dira morafe o mogolo ka wena gone.

⁴ Ke tlaa ya nao kwa Egepeto; le gone ruri ke tlaa ba ke go tlhatlosa gape; Josefe o tlaa baya seatla sa gagwe mo matlhong a gago.”

⁵ Jakobe a nanoga mo Beerešeba; mme bomorwa Iseraele ba tsaya Jakobe rraabo, le banyana ba bone, le basadi ba bone ka dikoloi tse Faro o neng a di rometse go ba tsaya ka tsone.

⁶ Ba tsaya dikgomo tsa bone, le dilwana tsa bone tse ba di bapetseng mo lefatsheng la Kanana, ba tla mo Egepeto, Jakobe le losika lotlhe lwa gagwe nae.

⁷ Bomorwawe le barwa bomorwawe nae, bomorwadie le bomorwadia bomorwawe, le losika lotlhe lwa gagwe a ya nalo kwa Egepeto.

⁸ Mme ake one maina a bana ba ga Iseraele ba ba fitlhileng mo Egepeto (Jakobe le bomorwawe): Rubene, motsalwapele wa ga Jakobe.

⁹ Bomorwa Rubene: Hanoke, le Palu, le Heserone le Karemi.

¹⁰ Bomorwa Simeone: Jemuele, le Jamine, le Ohate, le Jakine, Sohare, le Shaule, morwa mosadi mongwe wa Mokanana.

¹¹ Bomorwa Lefi: Gerešone, le Kohathe, le Merari.

¹² Bomorwa Juta: Ere, le Onane, Shela, le Perese, le Sera: boEre le Onane ba ne ba swetse mo lefatsheng la Kanana, mme bomorwa Perese e ne e le Heserone le Hamule.

¹³ Bomorwa Isakare: Tola, le Pua, le Jobe, le Shimerone.

¹⁴ Bomorwa Sebulone: Serete, le Elone, le Jahaleele.

¹⁵ Bao ke bomorwa Lea, ba o ne a ba bona le Jakobe kwa Patane-arame, ba na le morwadie Dina; batho botlhe ba e neng e le bomorwawe le bomorwadie ba ne ba le 33.

¹⁶ Bomorwa Gate: Sifione, le Hagi, Shuni, le Esebone, Eri, le Arote, le Areli.

¹⁷ Bomorwa Ašere: Imena, le Išefa, le Išifi, le Beria, le Sera kgaitsadia bone; le bomorwa Beria; Hebere, le Malekiele.

¹⁸ Bao ke bomorwa Silepa yo Labane o neng a mo naya Lea morwadie, bao o ne a ba bona le Jakobe, e bong batho ba le 16.

¹⁹ Bomorwa Ragele mogatsa Jakobe: Josefe le Benjamine.

²⁰ Josefe a tshola Manase le Eferaime mo lefatsheng la Egepeto, Asenathe morwadia Potifera moperesiti wa One, o ne a ba bona nae.

²¹ Bomorwa Benjamine: Bela, le Bekere, le Ašabele, le Gera, Naamane, le Ehi, le Roše, le Mupime, le Hupime le Arete.

²² Bao ke bomorwa Ragele, ba ba tsetsweng ke Jakobe, mme fa ba le mmogo e ne e le batho ba le 14.

²³ Bomorwa Dane: Hušime.

²⁴ Le bomorwa Nafetali: Jahaseele, le Guni, le Jesere le Shileme.

²⁵ Bao ke bomorwa Bileha; yo Labane o neng a mo naya morwadie Ragele, mme bao a ba bona le Jakobe; e ne e le batho ba supa ba le mmogo.

²⁶ Batho botlhe ba ba tsileng le Jakobe mo Egepeto, ba ba duleng mo mankopeng a gagwe, kwa ntle ga basadi ba bomorwa Jakobe, ba le mmogo e ne e le batho ba 66.

²⁷ Bomorwa Josefe ba o ba bonyeng mo Egepeto e ne e le batho ba le babedi; batho botlhe ba ntlo ya ga Jakobe ba ba tsileng mo Egepeto e ne e le 70.

²⁸ Mme a eteletsa Juta kwa pele ga gagwe go ya kwa go Josefe gore a tle a mo supetse tsela e e yang kwa Gošene; mme ba fitlha mo lefatsheng la Gošene.

²⁹ Josefe a baakanya kara ya gagwe a tlhatloga a ya go kgatlhantsha Iseraele rraagwe kwa Gošene. Mme a ya kwa go ene a wela mo thamong ya gagwe, a lela ka lobaka lo loleele a le fa thamong ya gagwe.

³⁰ Iseraele a raya Josefe a re: “Jaanong a nke ke swe ka ke bonye sefatlhogo sa gago fa o sa ntse o tshedile.”

³¹ Josefe a raya bomorwa rraagwe le ba ntlo ya ga rraagwe a re: “Ke tlaa tlhatloga ke ya go begela Faro ke mo raya ke re: ‘Bomorwa rre le ba ntlo ya ga rre, ba ba ntseng ba le kwa lefatsheng la Kanana ba nkgorogetse.

³² Banna bao ke badisa, gonne tiro ya bone e ntse e le dikgomo; ba tsile le matsomane a bone, le matlhape a bone, le tsotlhe tse ba nang natso.’

³³ Go tlaa dirala gore motlhang Faro o lo bitsang a re: ‘Tiro ya lona ke eng?’

³⁴ Lo re: ‘Batlhanka ba gago, tiro ya bone e ntse e le dikgomo fela, e sa le ka bokau jwa rona le gompieno, rona le borraetsho;’ gore lo tle lo age mo lefatsheng la Gošene; gonne modisa mongwe le mongwe ke moila mo go Baegepeto.”

47

¹ Foo Josefe a tsena a bolelela Faro a re: “Rre le bomorwa rre ba tsile ba tswa lefatsheng la Kanana, ba na le matsomane a bone, le matlhape a bone, le tsotlhe tse ba nang natso. Mme ba mo lefatsheng la Gošene.”

² Mo go bomorwa rraagwe a tsaya banna ba le batlhano a ba isa fa pele ga Faro.

³ Faro a raya bomorwa rra Josefe a re: “Tiro ya lona ke eng?” Ba raya Faro ba re: “Batlhanka ba gago re badisa, rona le borraetsho.”

⁴ Ba raya Faro ba re: “Re tsile go jaka fela mo lefatsheng; gonne ga go na bohulo jwa matsomane a batlhanka ba gago; gonne leuba le botlhoko kwa lefatsheng la Kanana. Ke gone re reng: Mma batlhanka ba gago ba age mo lefatsheng la Gošene.”

⁵ Faro a bua le Josefe a re: “Rraago le bomorwa rraago ba tsile mo go wena.

⁶ Lefatshe la Egepeto le fa pele ga gago; baya rraago le bomorwa rraago kwa lefatshe le gaisang ka molemo gone. A ba age mo lefatsheng la Gošene; mme fa o itse banna bangwe ba ba tlhaga mo go bone o ba beye balaodi ba dikgomo tsetsho.”

⁷ Josefe a isa Jakobe rraagwe mo teng, a mmaya fa pele ga Faro; mme Jakobe a segofatsa Faro.

⁸ Faro a raya Jakobe a re: “Malatsi a dinyaga tsa botshelo jwa gago a kae?”

⁹ Jakobe a raya Faro a re: “Malatsi a dinyaga tsa loeto lwa me ke dinyaga di le 130, a ntse a le mannye fela, a bile a bosula, mme ga a a fitlha kwa malatsing a dinyaga tsa botshelo jwa borre mo malatsing a diketo tsa bone.”

¹⁰ Jakobe a segofatsa Faro; mme a tswa fa pele ga Faro.

¹¹ Josefe a baya rraagwe le bomorwa rraagwe, a ba naya boswa mo lefatsheng la Egepeto kwa lefatshe le gaisang ka molemo gone, mo lefatsheng la Ramesese, jaaka Faro a laotse.

¹² Josefe a otla rraagwe le bomorwa rraagwe le botlhe ba ntlo ya ga rraagwe ka dijo, ka fa malwapeng a bone.

¹³ Go ne go se na dijo mo lefatsheng lotlhe, gonne leuba le ne le le botlhoko thata, mafatshe a Egepeto le a Kanana a ba a tla a idibala ka ntlha ya lone leuba.

¹⁴ Josefe a kgobokanya madi otlhe a a bonwang mo lefatsheng la Egepeto le mo lefatsheng la Kanana ka mabele a ba neng ba a reka. Josefe a isa madi ao mo ntlong ya ga Faro.

¹⁵ E rile madi a setse a fedile mo lefatsheng la Egepeto le mo lefatsheng la Kanana, Baegepeto botlhe fela ba ya kwa go Josefe ba re: “Re fe dijo. Ana re ka bo re swelang fa pele ga gago?” Gonne madi a tlhaetse.

¹⁶ Josefe a re: “Ntshang dikgomo; ke tlaa lo fa ka dikgomo tsa lona fa madi a tlhaetse.”

¹⁷ Ba isa dikgomo tsa bone kwa go Josefe; Josefe a ba naya dijo mo boemong jwa dipitse, le jwa matsomane, le jwa matlhape, le jwa diesela; a ba jesa ka ngwaga oo, a amogela dikgomo tsotlhe tsa bone mo boemong jwa dijo.

¹⁸ E rile ngwaga oo o sena go feta ba ya kwa go ene ka ngwaga wa bobedi ba mo raya ba re: “Ga re nka re lobela morena wa rona jaaka madi a rona a ile otlhe; le jaaka matlhape a dikgomo e le a morena wa rona. Ga go a sala sepe mo matlhong a morena wa rona fa e se mebele ya rona le matlhagare a rona fela.

¹⁹ Ana re ka bo re swelang fa pele ga matlho a gago, rona le lefatshe la rona? Re reke, rona le lefatshe la rona ka dijo, mme rona, le lefatshe la rona re tlaa nna batlhanka ba ga Faro. Re neye peo gore re tle re tshele, re se ka ra a swa, le gore lefatshe le se ka la swafala fela.”

²⁰ Josefe a rekela Faro lefatshe lotlhe la Egepeto; gonne Baegepeto mongwe le mongwe a rekisa tshimo ya gagwe, ka leuba le ne le le botlhoko mo go bone; mme lefatshe la nna la ga Faro.

²¹ Ka ga batho, a ba hudusetsa mo metseng, go simolola ka sekhutlo sengwe sa molelwane wa Egepeto go ya kwa sekhutlong se sengwe sa gone.

²² Fa e se lefatshe la baperesiti le le losi, ga a ka a le reka; gonne baperesiti ba ne ba tle ba amogele kabelo mo go Faro, ba je kabelo e Faro o e ba nayang. Ke gone ka moo ba neng ba se ka ba rekisa lefatshe la bone.

²³ Foo Josefe a raya batho a re: “Bonang, ke lo rekile gompieno le lefatshe la lona, ke lo reketse Faro. Bonang peo ke e, ke ya lona, lo tlaa lema lefatshe.

²⁴ Go tlaa dirala gore e tle e re ka nako ya thobo, sa botlhano lo se neye Faro, tse nne e nne tsa lona, go nna peo ya leota le go nna dijo tsa lona, le tsa matlo a lona, go nna dijo tsa banyana ba lona.”

²⁵ Mme ba re: “O re tshedisitse; a re ke re bone tsalano mo matlhong a morena wa rona, mme re tlaa nna batlhanka ba ga Faro.”

²⁶ Josefe a tlhoma molao mo lefatsheng la Egepeto, o eme le gompieno, gore Faro a tseye sa botlhano; fa e se lefatshe la Baperesiti le le losi ga le a ka la nna la ga Faro.

²⁷ Iseraele a aga mo lefatsheng la Egepeto, mo lefatsheng la Gošene; mme ba bapala maruo gone, ba ata, ba ntsifala thata thata.

²⁸ Jakobe a aga mo lefatsheng la Egepeto dinyaga di le 17; jalo malatsi a ga Jakobe, a dinyaga tsa botshelo jwa gagwe e ne e le dinyaga di le 147.

²⁹ Lobaka lwa atamela lo Iseraele o tlaa swang ka lone. Mme a bitsa Josefe morwawe, a mo raya a re: “A e re fa jaana ke bonye tsalano mo matlhong a gago, ke a go rapela, baya seatla sa gago fa tlase ga serope sa me, o ntirele ka pelonomi le ka boammaaruri; ke a go rapela, o se ka wa mphitlha mono Egepeto.

³⁰ Motlhang ke robalang le borraetsho, o mpelege ke tswe mo Egepeto, o ye go mphitlha mo felong ga phitlhelo ya bone.” Mme a re: “Ke tlaa dira jaaka o buile.”

³¹ A re: “Inkanele.” Mme a mo ikanela. Mme Iseraele a ikobela mo tlhogong ya bolao.

48

¹ Ga dirala e rile morago ga dilo tse, mongwe a raya Josefe a re: “Bona, rraago o a lwala;” mme a tsaya bomorwawe ba babedi, e bong Manase, le Eferaime a ya nabo.

² Mongwe a bolelela Jakobe a re: “Bona, Josefe morwao o tla kwano go wena.” Mme Iseraele a ikakatlolola a dula mo bolaong.

³ Jakobe a raya Josefe a re: “Modimo Mothatayotlhe o ne wa bonala kwa go nna ke le kwa Luse mo lefatsheng la Kanana, mme wa ntshegofatsa.

⁴ Wa nthaya wa re: ‘Bona, ke tlaa go atisa, ke go ntsifatsa, ke tlaa dira lesomo la ditšhaba ka wena, mme lefatshe le, ke tlaa le naya losika lwa gago sehularong sa gago go nna thuo ya bosakhutleng.’

⁵ “Jaana bomorwao ba babedi, ba o ba bonyeng mono mo lefatsheng la Egepeto ke ise ke tle kwano go wena mo Egepeto, ke ba me; Eferaime le Manase, fela jaaka Rubene le Simeone ba tlaa nna ba me.

⁶ Lotsalo lwa gago lo o tlaa lo bonang morago ga bone, e tlaa nna lwa gago; ba tlaa bidiwa ka fa leineng la bomorwa rraabo mo bosweng jwa bone.

⁷ Ka ga me, e rile ke tswa kwa Patana, Ragele a swela fa go nna mo lefatsheng la Kanana mo tseleng, go sa ntse go le sebaka go ya go fitlha kwa Eferatha; mme ka mo fitlha gone mo tseleng e e yang Eferatha, ke gore Bethelehema.”

⁸ Iseraele a leba bomorwa Josefe a re: “Ke bomang ba?”

⁹ Josefe a raya rraagwe a re: “Ke bomorwaake ba Modimo o ba nneileng mono.” Jakobe a ba a re: “Ke a go rapela, a ko o ba tlise fa go nna mme ke tlaa ba segofatsa.”

¹⁰ Matlho a ga Iseraele a bo a le looto ka botsofe, a sa bone. Josefe a ba atametsa fa go ene, mme a ba atla, a ba kamatlela.

¹¹ Mme Iseraele a raya Josefe a re: “Ke ne ke sa solofela fa ke ka tlhola ke bona sefatlhogo sa gago; mme bona, Modimo o mpontshitse le lone losika lwa gago.”

¹² Josefe a ba ntsha fa gare ga mangole a gagwe; a ikobela ka sefatlhogo fa fatshe.

¹³ Josefe a ba tsaya boo babedi, Eferaime ka seatla se se siameng sa gagwe, a mo lebaganya le seatla sa molema sa ga Iseraele, le Manase ka seatla sa molema sa gagwe, a mo lebaganya le seatla se se siameng sa ga Iseraele, mme a ba atametsa.

¹⁴ Iseraele a ntsha seatla sa gagwe se segolo a se baya mo tlhogong ya ga Eferaime, yo e leng yo mmotlana, le seatla sa molema sa gagwe a se baya mo tlhogong ya ga Manase, a fapaanya diatla tsa gagwe ka kitso, gonne Manase e ne e le wa ntlha.

¹⁵ A segofatsa Josefe a re: “Modimo o borraetsho Aberahame le Isake ba neng ba sepela fa pele ga one, Modimo o o nkotlileng mo botshelong jotlhe jwa me le mo nakong eno,

¹⁶ Moengele yo o nthekolotseng mo bosuleng jotlhe fela, a a segofatse basimane ba; mme a leina la me le rewe bone, le leina la borraetsho Aberahame le Isake. A ba ntsifale ba tle ba nne bantsi mo gare ga lefatshe.”

¹⁷ E rile Josefe a bona fa rraagwe a beile seatla sa gagwe se se siameng mo tlhogong ya ga Eferaime, ga mo itumolola; mme a tsholetsa seatla sa ga rraagwe go se tlosa mo tlhogong ya ga Eferaime, a re o se isa mo tlhogong ya ga Manase.

¹⁸ Josefe a raya rraagwe a re: “E seng jalo rra; gonne yo ke ene wa ntlha; baya seatla sa gago se se siameng mo tlhogong ya gagwe.”

¹⁹ Mme rraagwe a gana a re: “Ke a itse morwaaka, ke a itse; le ene o tlaa nna morafe, le ene o tlaa nna mogolo; le fa go ntse jalo monnawe o tlaa nna mogolo mo go ene, le losika lwa gagwe lo tlaa nna bontsi jwa merafe.”

²⁰ Mme a ba segofatsa ka letsatsi leo a re: “Iseraele o tlaa boka ka wena, go twe: “ ‘A Modimo o go dire o nne jaaka Eferaime le jaaka Manase;’ ” mme a baya Eferaime kwa pele ga Manase.

²¹ Iseraele a raya Josefe a re: “Bona, ke a swa; Modimo o tlaa nna le lona, o ba o lo isa gape kwa lefatsheng la borraeno.

²² Gape, ke go abetse kabelo nngwe bogolo go bomorwa rraago, ke raya e ke e gapileng mo seatleng sa Baamore ka tšhaka ya me le ka bora jwa me.”

49

¹ Jakobe a bitsa bomorwawe a re: “Phuthegang, gore ke tle ke lo bolelele se se tlaa lo diralelang mo metlheng e e tlaa tlang.

² “Phuthegang, lo utlwe, lona bomorwa Jakobe; lo reetse Iseraele rraeno.

³ Rubene, ke wena wa ntlha wa me; nonofo ya me le tshimologo ya thata ya me; tlotlomalo ya bogolo, tlotlomalo ya bonatla.

⁴ Ka go kgaphea kgaphea jaaka metsi, ga o ketla o nna le tlotlomalo: ka go bo o kile wa tlhatlogela kwa bolaong jwa ga rraago; wa bo leswefatsa; a ya mo diphateng tsa me.

⁵ Simeone le Lefi ke bana ba monna; ditšhaka tsa bone ke dibolao tsa thubakanyo.

⁶ Ao, mowa wa me, o se ka wa tsena mo maomeng a bone; kgalalelo ya me, o se ka wa kopana le phuthego ya bone; gonne ba bolaile banna ka bogale jwa bone, le mo go itaoleng ga bone ba kgaola dipholo mesifa.

⁷ A go hutsege bogale jwa bone gonne bo ne bo le bolau; le tšhakgalo ya bone, gonne e ne e le bolalome; ke tlaa ba kgaoganya mo go Jakobe, ke ba phatlalatsa mo go Iseraele.

⁸ Juta, wena bomorwa rraago ba tlaa go baka; seatla sa gago se tlaa nna mo thamong tsa baba ba gago. Bomorwa rraago ba tlaa ikoba fa pele ga gago.

⁹ Juta ke ngwana wa tau; morwaaka, o tlhatlogile mo setotong, a inama, a namalala jaaka tau, le jaaka tau e namagadi; o tlaa tsosiwa e mang?

¹⁰ Thobane ya bogosi ga e ketla e tloga mo go Juta, le fa e le lore lwa molaodi go tloga fa gare ga dinao tsa gagwe, go bo go tle go tsamaye Shilo a tle pele. Go utlwa ga ditšhaba go tlaa nna kwa go ene.

¹¹ Ka a golegelela petsana ya gagwe mo mofineng, le eselana ya gagwe mo mofineng o o tlhophegileng: o tlhatswitse diaparo tsa gagwe mo bojalweng jwa mofine, le kobo ya gagwe mo mading a loungo lwa mofine.

¹² Matlho a gagwe a tlaa hubidiwa ke bojalwa jwa mofine, le meno a gagwe a tlaa sweufadiwa ke maši.

¹³ Sebulone o tlaa aga kwa bogorogelong jwa lewatle; o tlaa nna bogorogelo jwa dikepe. Molelwane wa gagwe o tlaa tshwaragana le Sitone.

¹⁴ Isakare ke esela e e thata, e namaletse fa gare ga maraka a dinku,

¹⁵ mme a bona felo gongwe ga boikhutso fa go le molemo, le lefatshe fa le ne le le monate; a sekegela lerudi la gagwe go sikara, a tswa motlhanka yo o nnang mo tirong e o e patikelwang.

¹⁶ Dane o tla atlhola batho ba gagwe, jaaka lotso longwe lwa Iseraele.

¹⁷ Dane o tlaa nna noga mo tseleng; le šaušawane e e lomang magwejana a pitse, mopalami a wele kwa morago.

¹⁸ Jehofa, ke ntse ke lebeletse poloka ya gago.

¹⁹ Gate, setlhopha sa bonokwane se tlaa mo pitlaganyetsa: ene o tlaa ba pitlaganyetsa ba hulere.

²⁰ Mo go Ašere, dijo tsa gagwe di tlaa nna mahura, o tlaa tswa dijo tse di metsegang tsa segosi.

²¹ Nafetali ke phala e namagadi e e golotsweng; o ntsha mafoko a a molemo.

²² Josefe ke kala e e ungwang thata, kala e e ungwang fa motsweding; dikala tsa gagwe di tlolaganya lorako.

²³ Bahudi ka metswi ba mo tshwentse mo go botlhoko, ba mo hula, ba mmogisa.

²⁴ Mme bora jwa gagwe jwa nna mo thateng, mabogo a diatla tsa gagwe a thatafadiwa ke diatla tsa Mothata wa ga Jakobe, yo e leng modisa le lefika la ga Iseraele,

²⁵ e bong ka Modimo wa ga rraago o o tlaa go thusang, le ka Mothatayotlhe, yo o tlaa go segofatsang, ka masego a legodimo kwa godimo, le masego a boteng jo bo namaletseng kwa tlase, masego a mabele, le a sebopelo.

²⁶ Masego a ga rraago a feteletse bogolo go masego a batsadi ba me ba pele, go ya kwa sekhutlong sa bofelo sa dithaba tse di emeng ka bosakhutleng. A tlaa nna mo tlhogong ya ga Josefe; le mo phogong ya gagwe yo a neng a kgaoganye le bomorwa rraagwe.

²⁷ Benjamine ke phiri e e phamolaphamolang: o tlaa garola setoto ka moso, maitseboa o tlaa aba mo go bolailweng.”

²⁸ Botlhe bao ke bone ditso tse di 12 tsa Iseraele; mme se ke sone se rraabo o se buileng nabo a ba segofatsa; mongwe le mongwe ka fa tshegofatsong ya gagwe, a ba segofatsa.

²⁹ Mme a ba laya, a ba raya a re: “Ke na le go phuthelwa kwa bathong ba gaetsho; lo mphitlhe fa go borraetsho mo logageng lo lo mo sebateng sa naga sa ga Eferone wa Mohite.

³⁰ Mo logageng lo lo mo nageng ya Makapela, bolebana le Mamere, kwa lefatsheng la Kanana, lo Aberahame o lo rekileng le sebata sa naga mo go Eferone wa Mohite go nna boswa jwa phitlhelo.

³¹ Ba fitlhile Aberahame le Sara mosadi wa gagwe gone; ba fitlhile Isake le Rebeka mosadi wa gagwe gone; ka fitlha Lea gone.

³² Ke raya sebata sa naga le logaga lo lo mo go sone, mo go rekilweng mo baneng ba ga Hethe.”

³³ E rile Jakobe a sena go wetsa go laya bomorwawe, a gonela dinao tsa gagwe mo bolaong, a khutla, mme a phuthelwa kwa bathong ba ga gabo.

50

¹ Josefe a wela mo sefatlhogong sa ga rraagwe a lelela mo go ene, a mo atla.

² Josefe a laola batlhanka ba gagwe ba e leng dingaka gore ba omise rraagwe ka bongaka; dingaka tsa omisa Iseraele ka bongaka.

³ Ga feta malatsi a le 40 ka ga gone; gonne malatsi a go omisa motho ka bongaka a tle a fete a le kalo. Baegepeto ba mo lelela ka malatsi a le 70.

⁴ E rile malatsi a go mo lelela a fetile, Josefe a bua le ba ntlo ya ga Faro a re: “A e re ka jaana ke bonye tsalano mo matlhong a lona, ke a lo rapela, lo tle lo bue mo ditsebeng tsa ga Faro lo re, ga twe:

⁵ Rre o inkanisitse a re: ‘Bona, ke a swa; mme phupu e ke e ikepetseng kwa lefatsheng la Kanana ke gone kwa o tlaa mphitlhang gone.’ Mme jaana ke a go rapela, mma ke tlhatloge ke ye go fitlha rre, ke tlaa ba ke boa.”

⁶ Faro a re: “Tlhatloga o ye go fitlha rraago ka fa o go ikanisitseng ka gone.”

⁷ Josefe a tlhatloga a ya go fitlha rraagwe; mme ga tlhatloga nae batlhanka botlhe ba ga Faro, bagolwane ba ntlo ya gagwe, le bagolwane botlhe ba lefatshe la Egepeto,

⁸ le botlhe ba ntlo ya ga Josefe, le bomorwa rraagwe, le ntlo ya ga rraagwe; fa e se banyana ba bone, le matsomane a bone, le matlhape a bone, ba di tlogela mo lefatsheng la Gošene.

⁹ Ga tlhatloga nae dikara le bapagama dipitse; ya nna lesomo le legolo thata.

¹⁰ Ba fitlha fa sebuping sa ga Atate se se kwa moseja ga Joretane, ba lelela gone ka selelo se segolo se se botlhoko; mme a direla rraagwe selelo ka malatsi a supa.

¹¹ E rile banni ba lefatshe, e bong Bakanana, ba bona selelo mo sebuping sa ga Atate ba re: “Se ke selelo se se botlhoko mo go Baegepeto.” Ke gone ka mo leina la gone le reilweng ga twe, Abele-miseraime; o o kwa moseja ga Joretane.

¹² Bomorwawe ba mo direla jaaka a ba laotse.

¹³ Gonne bomorwawe ba ne ba mmelegela kwa lefatsheng la Bakanana, ba mo fitlha mo logageng lwa sebata sa naga ya Makapela lo Aberahame o lo rekileng le sebata sa naga go nna boswa jwa phitlhelo, a lo reka mo go Eferone wa Mohite bolebana le Mamere.

¹⁴ E rile ba sena go fitlha rraagwe, Josefe a boela kwa Egepeto, ene le bomorwa rraagwe, le botlhe ba ba tlhatlogileng nae ba ile go fitlha rraagwe.

¹⁵ E rile bomorwa rraagwe ba bona fa rraabo a sule, ba re: “Motlhamongwe Josefe o tlaa re ila, a itefetsa ka botlalo bosula jotlhe jo re kileng ra bo mo direla.”

¹⁶ Ba isa taetso kwa go Josefe ba re: “E rile rraago a ise a swe a laola a re:

¹⁷ ‘Lo tlaa raya Josefe jaana lo re: “Ke a go rapela, a ko o itshwarele tlolo ya bomorwa rraago le boleo jwa bone, ka gobo ba kile ba go direla bosula.” ’ Mme jaana re a go rapela a ko o itshwarele tlolo ya batlhanka ba Modimo wa ga rraago.” Mme e rile ba bua nae Josefe a lela.

¹⁸ Bomorwa rraagwe ba ya ba wela fa pele ga sefatlhogo sa gagwe ba re: “Bona, re batlhanka ba gago.”

¹⁹ Josefe a ba raya a re: “Se boifeng; ka re, a ke mo boemong jwa Modimo?

²⁰ Ka ga lona lo ne lo ntaoletse bosula; mme Modimo o no o laotse gore go nne molemo, go diratsa go nna jaaka go ntse gompieno, go tshedisa batho ba le bantsi.

²¹ Ke gone jaana se boifeng: ke tlaa lo otla le bana ba lona.” A ba gomotsa; mme mafoko a gagwe a ba tsena mo pelong.

²² Josefe a aga mo Egepeto, ene, le ntlo ya ga rraagwe. Mme a tshela dinyaga di le 110.

²³ Josefe a bona bana ba ga Eferaime ba losika lwa boraro; le bana ba ga Makire morwa Manase, ba tsalelwa mo mangoleng a gagwe.

²⁴ Josefe a raya ba ga gabo a re: “Ke a swa; Modimo o tlaa lo lekola ruri, mme o tlaa lo tlhatlosa mo lefatsheng leno, o lo isa kwa lefatsheng le o le ikaneletseng Aberahame le Isake le Jakobe.”

²⁵ Josefe a ikanisa bana ba Iseraele a re: “Modimo o tlaa lo lekola ruri mme lo tlaa rwala marapo a me lo a tlhatlosa mono.”

²⁶ Jalo Josefe a swa a le dinyaga di le 110; mme ba mo omisa ka bongaka; a tsenngwa mo letloleng mo Egepeto.